¹ Lesa kalabila kuli Yakobo ati, "Ima, kabiye ku Betele, no kwikala nkulya. Ukapange ulutala nkulya kuli Lesa, uwabonekele kuli we ulo wabutukile ukufuma kuli Esau umukwanu." ² Elo Yakobo aebele aba mu nanda yakwe na bonse abali nakwe ati, "Poseni utulubi tonse uto mukwete, isangululeni, no kufwala fimbi. ³ Elo tufume mpano tuye ku Betele. Nakuya kupanga ulutala nkulya kuli Lesa, uwanjasukile mu kasuba ka bwafya, nakambi aliba nande konse uko naya." ⁴ Efi bapele kuli Yakobo utulubi tonse utwali mu minwe yabo, no tubangili utwali ku matwi yabo. Yakobo kafishika mu muoke uwali pepi na Shekemu. ⁵ Pakuya, Lesa kaleta umwenso pa misumba iyali pepi nabo, na mbalya bantu tabakonkelepo ba mwana Yakobo. ⁶ Efi Yakobo afikile pa Lusi (epa Betele), iyali mu calo ca Kenaani, Ye na bantu bonse abali nakwe. ⁷ Kapanga ulutala nkulya no kwinika ishina lya ncende ati El Betele, pantu mpalya epo Lesa abonekele kuli ye, ulo alo kubutuka umukwabo. ⁸ Debora, uwalo kulela Rabeka, kafwa. Kabamushika kunshi ya Betele munshi ya citi ca muoke, efi paitilwe ati Alloni Bakuti. ⁹ Ulo Yakobo afikile ukufuma ku Padan Aram, Lesa kaboneka kuli nakabili no ku mupaala. ¹⁰ Lesa kamweba ati, "Ishina lyobe niwe Yakobo, lelo ishina lyobe taulipo Yakobo. Ishina lyobe niwe Israeli." Efi Lesa amwinikile ishina ati Israeli. ¹¹ Lesa kamweba ati, "Nine Lesa wa maka yonse. Fyalaneni no kufula. Uluko ne nko ishingi shakufuma muli we, ne shamfumu shakuba mu bana bobe. ¹² Icalo napele kuli Abraham na Isaki, nakucipela kuli we. Ku bana bobe abaku kukonkapo nakubapa icalo." ¹³ Lesa kafumapo pa ncende apo alabilille nakwe. ¹⁴ Yakobo kabikapo icibumbili pa ncende apo Lesa alabilile nakwe, icibumbili ca mabwe. Kaitilapo umutulo wa ca kunwa no kwitilapo amafuta. ¹⁵ Yakobo kainika ishina lya pa ncende apo Lesa alabilile nakwe ati, Betele. ¹⁶ Kabema ukufuma pa Betele. Ulo bali akatalamukila na Efrata, Rakelo kaba mu kupaapa, nakambi kakushupa ukupaapa kwakwe. ¹⁷ Pa kumwafwako pa kupaapa kwakwe, icimbusa cakwe kacimweba ati, "Utinapo, pantu uko kwata umwana naumbi." ¹⁸ Pa kufwa, ku mupuya wakwe uwakulekelesha kamwinika ishina Benoni, lelo wishi amwinikile ati Benyamini. ¹⁹ Rakelo kafwa nakambi kabamushika mu nshila yaku Efrata (e Betelehemu). ²⁰ Yakobo kabikapo icibumbili pa manda yakwe. Ecaiminikwa pa manda yakwa Rakelo ukufika na kasuba ka lelo. ²¹ Israeli kaima kalokuya no kupopa icikutulo cakwe ku ntanshi ya lupungu lwa mpaanga. ²² Ulo Israeli alokwikala muli ncilya calo, Rubeni kalaala na Bilha uwalokulala na wishi, na Israeli wishi kaumfwa. Nomba Yakobo ali na bana balalume ikumi na babili. ²³ Abana balalume bakwe muli Lea ni Rubeni, Ibeli lyakwa Yakobo, na Simeoni, Lebi, Yuda, Isakari, na Sebuluni. ²⁴ Abana balalume bakwe muli Rakelo ni Yosefe na Benyamini. ²⁵ Abana balalume bakwe muli Bilha, umusha mwanakashi wakwa Rakelo, bali ni Dani na nefitali. ²⁶ Abana balalume bakwe muli Silpa, umusha mwanakashi wakwa Lea, ni Gadi na Asheri. Bonse mba e bana balalume bakwa Yakobo abo afyele mu Padan Aram. ²⁷ Yakobo kafika kuli Isaki, wishi, mu Mamre wamu Kiliati Ariba (e Hebroni), ukwalokwikala Abraham na Isaki. ²⁸ Isaki aikele imyaka umwanda umo na cinekonsekonse. ²⁹ Isaki kaleka umweo no kufwa, nakambi kabamushika ku fikolwe fyakwe, umukote ne nshiku ishingi. Esau na Yakobo, abana balalume bakwe, e bamushikile.