¹ Nomba Dina, umwana mwanakashi wakwa Lea uwo afyele kuli Yakobo, kaya mukumanya abana banakashi ba muli ncilya calo. ² Shekemu mwana Hamori umwina Hibi, imfumu ya calo, kamubona. Kamupinta no kulala nakwe, nakambi ye kamufuula. ³ Umutima wakwe kaupintwa kuli Dina, umwana mwanakashi wakwa Yakobo. Ye katemwisha umwanansungu no kulabila bwino sana kuli ye. ⁴ Shekemu kalabila na wishi Hamori, ati, "Mbulileni ngu mwanansungu ukuba umukashi." ⁵ Nomba Yakobo kaumfwa ati uyo alilele na Dina umwana mwanakashi wakwe. Abana bakwe abalalume bali ne fitekwa mu mpanga, efi Yakobo atekenye mpaka kabesa. ⁶ Hamori wishi wakwa Shekemu kaya kuli Yakobo mu kulabila nakwe. ⁷ Ba mwana Yakobo kababwela ukufuma mu mpanga ulo baumfwile ngu mulandu. Mba balalume kabakalipa. Balikalipile sana pantu alisebenye Israeli pa kulala na mwana Yakobo, Nci tacalingilepo ukucita. ⁸ Hamori kalabila nabo, ati, "Shekemu umwana wandi alitemwa umwana mwanakashi wenu. Napapata nkolomba mupeni abe umukashi. ⁹ Tulokuupana, mulokutupela abana banakashi benu, no kulokubula abana banakashi besu ukubopa. ¹⁰ Mwalokwikala nafwe, ne calo cili kuli mwe ukwikalamo no kucibomfya, no kukwata ifipe." ¹¹ Shekemu kalabila kuli wishi na ku ndume shakwe ati, "Lekeni nsange uluse mu menso yenu, conse ici mukonjeba nkopela. ¹² Munjipushe na pa nsalamu iikulu no bupe bonse mungafwaya, nande nkomupa conse ici mukonjeba, lelo mumpele umwanansungu abe umukashi." ¹³ Ba mwana Yakobo kabaasuka Shekemu na Hamori wishi mu bucenjeshi, pantu Shekemu alilele na Dina nkashi shabo. ¹⁴ Kababasuka ati, "Tekuti tucipo nci cintu, ukupela inkashi yesu ku uli onse uutasembululwapo; pantu nci cakuba ca nsoni kuli fwebo. ¹⁵ Ni pali nku kumo ukumfwana epo tungasuminishanya namwe; amwaba abasembulwilwe kubati nifwebo, kani onse umwalalume pali mwe asembululwa. ¹⁶ Elo twalo kupela abana banakashi besu kuli mwe, nafwe twalo kuupa abana banakashi benu, nakambi twalokwikala namwe no kuba abantu bamo. ¹⁷ Lelo kani tamutumfwililepo no kuba abasembulwilwe, ninshi tukopinta nkashi yesu no kuya." ¹⁸ Amashiwi yabo kayasekesha Hamori na Shekemu umwana wakwe. ¹⁹ Ngu mwalalume tawayawailepo ukucite ifi balabile, pantu aloku kumbwa mwana Yakobo, na pa mulandu wakweba ati ewali uucindamishe pa bantu ba mu nanda yakwa wishi. ²⁰ Hamori na Shekemu umwana wakwe kabaya pa mulyango wa musumba no kulabila ku balalume ba mu musumba wabo, ati, ²¹ "Mba bantu tukoumfwana nabo, kanshi lekeni bekale muno calo no kubombamo pantu, cacine, incende ikulu sana kuli bo. Tulokuupa abana banakashi babo, nafwe tulokubapela abana banakashi besu. ²² Ni pali nci cimo mba bantu bakusumina ukwikala nafwe no kuba abantu bamo; kani abalalume besu bonse basembululwa, ifi nabo basembululwa. ²³ Bushe ifitekwa ne fipe fyabo - ne nama shabo shonse tafyakabepo fyesu? Kanshi katu suminishanye nabo, nabo bakwikala nafwe." ²⁴ Na balalume bonse aba mu musumba kabomfwa kuli Hamori na Shekemu, umwana wakwe. Onse umwalalume kasembululwa. ²⁵ Pa bushiku bwa shitatu, ninshi bacili bakoumfwa ubukali bwa filonda, babili pali ba mwana Yakobo (Simeon na Lebi, indume shakwa Dina), cina muntu kabula ulupanga lwakwe no kusansa umusumba uwaloku fulunganya umutende wabo, no kwipaya abalalume bonse. ²⁶ Kabepaya Hamori na Shekemu umwana wakwe ku lupanga. Kabapinta Dina mu nanda yakwa Shekemu no kuya kabaya. ²⁷ Bambi abana bakwa Yakobo kabesa ku fitumbi no kowisha umusumba, pantu abantu ebakoweseshe inkashi yabo. ²⁸ Kabapinta impaanga shabo, amaombe yabo, impunda shabo, na fyonse likoso mu musumba ne mpanga iyalipepi no musumba ne ²⁹ fyuma fyabo fyonse. Abana babo bonse na bakashi babo, kabapokwa. Kabapinta na fyonse ifyali mu mayanda. ³⁰ Yakobo kalabila kuli Simeoni na Lebi ati, "Mwandetelela, nalo kununka ku bekashi ba muno calo, abena Kenaani na bena Perisi. Tuli bace mu mpendwa. Ngabaibunganya pamo banjimine no kunsansa, ninshi nakonaulwa, nebo na bamu nanda yandi." ³¹ Lelo Simeoni na Lebi kabalabila ati, "Bushe Shekemu alingingile ukulinganya inkashi yesu kubati wabulalelale?"