¹ Yakobo kainuna amenso nakambi, kabona, Esau akoisa, kali na balalume imyanda ine. Yakobo ka abanya abana pali Lea, Rakelo, na basha banakashi babili. ² Elo kabika abasha banakashi na abana babo pa ntanshi, elo pakonkele Lea na bana bakwe, elo pa konkele Rakelo na Yosefe ewalekelesheko. ³ Ye umwine katangila pa ntanshi yabo. Kainamina panshi imiku cinelubali, mpaka ulo afikile pa mukwabo. ⁴ Esau kabutukila mukumukumanya, kamukumbatila, kamukumya mumukoshi, no kumufyompa. Elo balilile. ⁵ Ulo Esau aloleshe, kabona banakashi na bana. Kalabila ati, "Ni bani mba bantu uli nabo?" Yakobo ka asuka ati, "Bana abo Lesa apele umusha wakwe ku nkumbu shakwe." ⁶ Elo abasha banakashi na bana babo baishile nabo kabenama panshi. ⁷ Kapakonka Lea na bana bakwe nabo kabenama panshi. Pa kupelelekesha Yosefe na Rakelo kabesa no kwinama panshi. ⁸ Esau kalabila ati, "Bakopilibula indo onse nga mabumba aba nakumanya?" Yakobo ka asuka ati, "Ukweba ati mbone uluse mu menso akwa shikulu." ⁹ Esau kalabila ati, "Ndikwete ifingi, we mukwasu, isungile ifyukwete we mwine." ¹⁰ Yakobo kalabila ati, "Awe, napapata, kani ndisangile uluse menso yobe, ninshi poka ubupe mu minwe yandi, icacine, nabona icinso cobe, cili kubati kubona icinso caku Lesa, nakambi webo wampokelela. ¹¹ Nkokulomba nati poka ubupe ubuletelwe kuli we, na pa mulandu wakuti Lesa alimpaalile, nakambi pantu ndikwete ifingi." Efi Yakobo amwebele, naye Esau kapoka. ¹² Elo Esau alabile ati, "katulokuya. Nkotangila." ¹³ Yakobo kamweba ati, "Shikulu alishibile ati abana baice, nakambi impaanga ne ngombe shiko onsha utwana. Kani twashibutusha nangula bushiku bumo, shonse shingafwa. ¹⁴ Lekeni shikulu atangilile pa musha wakwe. Nalokwenda panono panono, ulwendo lwa fitekwa ifi ndinafyo, no kulingana na matabi ya bana, mpaka nkese kufika kuli shikulu ku Seiri." ¹⁵ Esau kalabila ati, "Leka nkushilepo abalalume bambi pali mba ndi nabo." Lelo Yakobo kalabila ati, "Nindo mwakucitila ifyo? Lekeni mbe likoso ne shuko mu menso yakwa Shikulu." ¹⁶ Efi Esau nkalya kasuba abwelele ku Seiri. ¹⁷ Yakobo aile ku Sukoti, kapanga inanda yakwe, no kupanga imisakuta ya fitekwa fyakwe. Pali nci ishina lya ncende kalitwa ati Sukoti ¹⁸ Ulo Yakobo afikile ukufuma ku Padan Aram, kafika bwino bwino ku musumba wa Shekemu, uuli mu cali ca Kenaani. Kaikala pepi no musumba. ¹⁹ Elo ashitile iciputulwa ca mpanga apo apopele icikutulo ku bana bakwa Hamori, wishi wakwa Shekemu, pa mwanda umo uwa sha silufele. ²⁰ Mpalya kapangapo ulutala no kupenika ati El Elohe Israeli.