¹ Nomba Yakobo kaumfwa amashiwi ya ba mwana Labani, kabalo kulabila ati, "Yakobo alipintile fyonse ifya bata, nakambi ati ni mu fyuma fya bata emo anonkele." ² Yakobo kalolesha imibonekele ya cinso cakwa Labani. Kabona ati imibo yakwe kuli ye ilyalukile. ³ Elo Yahweh alabile kuli Yakobo ati, "Bwelela ku calo kwa wiso na kuli ba lupwa lobe, nande nalokuli nobe." ⁴ Yakobo katuma no kwita Rakelo na Lea ku mpanga ku matanga yakwe ⁵ no kubeba ati, "Ndibwene ati imibo yakwa wishinwe kuli nebo yalyaluka, lelo Lesa waku bata aliba nande. ⁶ Mulishibile ati ni ku maka yandi yonse nabombela wishinwe. ⁷ Wishinwe alimbepeshe no kwalula amalipilo yandi imiku ikumi, lelo Lesa alimukenye ukunsansa. ⁸ Nga alabile ati, 'Inama sha fisemba shakuba e malipilo yobe,' na matanga yonse kufyala isha fisemba. Kani alabile ati, 'isha mishilwashilwa eshakuba amalipilo yobe,' na matanga yonse kufyala isha mishilwashilwa. ⁹ Muli nji nshila Lesa kapoka ifitekwa kuli wishinwe no kumpela. ¹⁰ Pa nshita ya kusampa, kambona mu ciloto ba pepe abalo kusampa pa matanga. Nshi mbushi shalalume shali ne mishilwashilwa, ifisemba, na mantonintoni. ¹¹ Malaika waku Lesa kalabila kuli nebo mu ciloto ati, 'Yakobo.' Kangasuka ati, 'Ndi mpano.' ¹² Kalabila ati, 'Sansula amenso no kubona ba pepe abakosampa pe tanga. Bali ne mishilwashilwa, ifisemba, na mantonintoni, pantu ndibwene fyonse ifi Labani akocita kuli we. ¹³ Nine Lesa waku Betele, uko wasubile icibumbili, uko walapile umulapo kuli nebo. Nomba ima no kufumako nkuno uye ku calo uko wafyalilwe.'" ¹⁴ Rakelo na Lea kabasuka no kumweba ati, "Bushe tamupo ciputulwa nangula icabupyani cesu mu nanda yaku bata? ¹⁵ Bushe tatucitilepo kubati matulatula? Pantu alitushitishe no kutupokololako ifyuma. ¹⁶ Pantu fyonse likoso ifyuma ifi Lesa apokolwele kuli bata fyesu na bana besu. Kanshi nomba, fyonse ifi Lesa akwebele, cita." ¹⁷ Elo Yakobo aimakene no kubika abana bakwe na bakashi bakwe pa ngamali. ¹⁸ Kapindulula ifitekwa fyakwe pa ntanshi yakwe, ne fipe fyakwe fyonse, ukubikapo likoso ne fitekwa anonkele mu Paddan Aram. Elo aimine ukuya kuli wishi Isaki mu calo ca Kenaani. ¹⁹ Ulo Labani aile mukubeya impaanga shakwe, Rakelo kaiba utulubi twa kwa wishi. ²⁰ Yakobo naye kabepa Labani umwina Aram, pa kutamwebapo ati akoya. ²¹ Efi ye abutukile ne fi akwete fyonse bwangu bwangu katabuka ne Nika, no kuya ukulola ku calo ca mpili ica Gileadi. ²² Pa bushiku bwa shitatu Labani kabamweba ati Yakobo alibutukile. ²³ Efi apintile balupwa pamo naye no kukonkamo pa lwendo lwa nshiku cinelubali. Kamucilila mu calo ca mpili ica Gileadi. ²⁴ Nomba Lesa kaisa kuli Labani umwina Aram mu ciloto no kumweba ati, "Ucenjele ukutalabila kuli Yakobo iciweme nangula icibipile." ²⁵ Labani kacilawila pali Yakobo. Nomba Yakobo kapopele icikutulo mu calo ca mpili. Naye Labani na ba lupwa bakwe kabekala mu calo ca mpili ica Gileadi. ²⁶ Labani kalabila kuli Yakobo ati, "Nindo ucitile, pakumbepa no kupinta abana bandi abanakashi kubati bakufungwa bamu nkondo? ²⁷ Nindo wabutukile mubumfisolo no ku nsembaika no kutanjebapo? Nga nalikulekele ukweba ati uye mukusangalala na mu nyimbo, mu kaoma ne nsango. ²⁸ Tawansuminishepo ukufyompa abeshikulu bandi abalalume na banakashi ukubalaya. Nomba wacita ubungwa. ²⁹ Cili mu maka yandi uku kusansa, lelo Lesa wa kwa wiso alabile nande mu bushiku ati, 'Ucenjele ukutalabila kuli Yakobo ifiweme nangula ifibipile.' ³⁰ Nomba waya pantu wafunga ukubwelela ku nanda yaku wiso. Nomba nindo waibile utulubi twandi?" ³¹ Yakobo ka asuka no kweba Labani ati, "Pantu nalo kutina nakambi kando kutontonkanya nati mukompokako abana benu ku maka kambutuka mu bumfisolo. ³² Onse uwibile utulubi twenu tatwalililepo kuba no mweo. Pa menso yaba lupwa besu, cencenteni fyonse kuli nebo ifili kubati fyenu no kufipoka." Pantu Yakobo taishibilepo ati Rakelo alibile. ³³ Labani kaingila mu cikutulo cakwa Yakobo, mu cikutulo cakwa Lea, na mu cikutulo ca basha banakashi babili, lelo tafisangilepo. Kafuma mu cikutulo cakwa Lea no kuya mu cikutulo cakwa Rakelo. ³⁴ Nomba Rakelo kaibile utulubi twamu nanda, nokutubika pa cakwikalapo pa ngamali, nokwikalapo. Labani kafwayafwaya mu cikutulo conse, lelo tafisangilemo. ³⁵ Kalabila kuli wishi ati, "Munkalipilapo, shikulu, pa kutemakanapo kuli mwe, pantu ndi mu musango wa banakashi. Efi afwaile lelo tatusangilepo utulubi. ³⁶ Yakobo kakalipa no kutosha na Labani. Kamweba ati, "Mulandu ndo nkwete? Ulubembu lwandi lulipi, pakuti munkonke mubukali mfi? ³⁷ Pantu mwafwayafwaya monse mu fipe fyandi. Findo mwasangapo pa fipe fya mu nanda yenu? Fibikeni mpa mu menso ya ba lupwa besu, ukweba ati bapingule pakati kesu babili. ³⁸ Pa myaka amakumi yabili nali namwe. Impaanga shenu ne mbushi shenu tashaponeshepo amafumo, nakambi nshalyapo shimbi pa shilume sha mpaanga pa matanga yenu. ³⁹ Ishacenenwe ku finama nshaletelepo kuli mwe. Sembi, nalo kulipila. Mwancitile ukulipila pa nama yonse iyaluba, Nangula ibilwe akasuba nangula ubushiku. ⁴⁰ Kandi nkulya; mu kasuba kandokupya ku kukaba, ubushiku kampita mu mpepo; nakambi nshalo kulalapo. ⁴¹ Yonse nji myaka amakumi yabili nali mu nanda yenu. Nabombele mwebo imyaka ikumi limo ne myaka ine pa bana benu abanakashi babili, ne myaka mutanda pa matanga yenu. Kamwalula namalipilo yandi imiku ikumi. ⁴² Nga te Lesa waku bata, Lesa waku Abraham, nakambi uwo Isaki atina, ukuba nande, mu cine ngamuli ntamfishe ukuya minwe likoso. Lesa alibwene ukushupikwa kwandi no kubombesha kwandi, naye eci akukalipile mubushiku." ⁴³ Labani ka asuka no kweba Yakobo ati, "Mba abana banakashi bana bandi, mba abeshikulu beshikulu bandi, na nga amatanga matanga yandi. Fyonse likoso ifi ukobona fyandi. Nindo ningacita lelo kuli mba bana banakashi bandi, nangula kuli mba abana bafyele? ⁴⁴ Kanshi nomba, katupange icipangano, webo nande, icakuba kambone pakati kobe na ndebo." ⁴⁵ Efi Yakobo abulile ibwe no kulimanika kubati cibumbili. ⁴⁶ Yakobo kalabila kuli ba lupwa bakwe ati, "Bunganikeni amabwe." Kababula amabwe no kupanga umupili. Elo balile mpalya pepi no mupili. ⁴⁷ Labani ka penika ati Jega Saga Duta, lelo Yakobo ka penika ati Galeed. ⁴⁸ Labani kalabila ati, "Ngu umupili e mboni pakati kandi na webo lelo." Ecalengele ishina lya mpalya litwe ati Galeed. ⁴⁹ Nakambi petwa ati Mispa, pantu Labani alabile ati, "Leka Yahweh alokutulola webo nande, ulo tukofuma pa menso ya umo no munakwe. ⁵⁰ Kani waya mukucusha abana bandi, nangula kani ukaye mu kupilapo na bambi abanakashi pa bana bandi, nangula tapapo uukobonako pa fwe, bona, Lesa e kambone pakati kobe na ndebo." ⁵¹ Labani kalabila kuli Yakobo ati, "Lolesha pali ngu umupili, nakambi lolesha pa cibumbili, ifi nabika pakati kobe na ndebo. ⁵² Ngu umupili e kambone, na nci cibumbili ni kambone, ukweba ati nshakacilukepo ngu umupili ukwisa kuli webo, nakambi we tawakacilukepo ngu umupili na nci cibumbili ukwisa kuli nebo, mukucita ububi. ⁵³ Lesa waku Abraham, no mulungu wakwa Nahor, imilungu sha bawishibo, bapingule pakati kesu." Yakobo kalapa mukutina wishi Isaki. ⁵⁴ Yakobo katula ilambo pa lupili no kwita ba lupwa bakwe ku kulya. Kabalya no kwikala ubushiku bonse penka palupili. ⁵⁵ Mu lucelocelo Labani kabuuka, kafyompa abeshikulu bakwe na bana banakashi bakwe no kubapaala. Efi Labani aile no kubwelela kwabo.