¹ Elo Yakobo aile pa bulwendo no kufika pa ncende ya bantu ba ku mutule suba. ² Ulo aloleshe, kabona umushima mwi bala, nakambi, boneni amatanga yatatu aya mpanga kashilele pepipepi ku mushima. Pantu kuli ngulya mushima balokunwenshako amatanga, ne bwe ilyali peulu ya kanwa ka mushima lyali ilikulu. ³ Ulo amatanga onse akumana mpalya, ba kacema balokuteshapo ibwe pa kanwa ka mushima no kunwensha impanga, elo babweleshapo ibwe nakambi peulu ya kanwa ka mushima, penka pa ncende ya liko. ⁴ Yakobo kabeba ati, "Mwebakwasu, nipi uko mwafuma?" Kabasuka ati, "twafuma ku Haran." ⁵ Kalabila kuli bo ati, "Napo mulimwishi Labani mwana Nahor?" Kabalabila ati, "Tulimwishi." ⁶ Kalabila kuli bo ati, "Napo ali bwaka?" Kabalabila ati, "Ali bwaka, nakambi, lolesha nkulya, Rakelo umwana wakwe akoisa ne mpanga." ⁷ Yakobo kalabila ati, "Boneni, pacili pakati ka kasuba. tailipo nshita ya kubunganya amatanga pamo. Nwesheni impanga elo mushileke shiye mukulya." ⁸ Kabalabila ati, "Tekuti tushinwenshepo mpaka impanga shonse shibunganine pamo. Abalalume elo balafumyapo ibwe pa kanwa ka mushima, elo nafwe tukoshinwinsha impanga." ⁹ Ulo Yakobo alokulabila nabo, Rakelo kaisa ne mpanga shakwa wishi, pantu ewalo kwembela. ¹⁰ Ulo Yakobo abwene Rakelo, umwana wa kwa Labani, ndume shakwa nyina, ne mpanga shakwa Labani, ndume shakwa nyina, Yakobo kapalaminako, kafumyapo ibwe pa kanwa ka mushima, no kunwensha itanga lya kwa Labani, ndume shakwa nyina. ¹¹ Yakobo kafyompa Rakelo no kwimya ishiwi peulu. ¹² Yakobo kaeba Rakelo ati ali mukwabo wa kwa wishi, nakambi ati ali mwana wakwa Rabeka. Elo Rakelo abutukile mukweba wishi. ¹³ Ulo Labani aumfwile ilyashi pali Yakobo umwana wa kwa nkashi shakwe, kabutukilako mukumukumanya, kamukumbatila, kamufyompa, no kumuleta mu nganda yakwe. Yakobo kaeba Labani mfi fintu fyonse. ¹⁴ Labani kaeba Yakobo ati, "We cacine uli ifupa lyandi nakambi umunafi wandi." Elo Yakobo aikele nakwe pa mwenshi umo. ¹⁵ Elo Labani aebele Yakobo ati, "Napo pakuba umukwasu epo walokumbombe bwaka ba? Njeba, ndokukulipila ndo?" ¹⁶ Nomba Labani kakwete abana banakashi babili. Ishina lya mukulu ali ni Leya, ne shina lya mwaice ali ni Rakelo. ¹⁷ Amenso yakwa Leya yali ayanakile, lelo Rakelo ali umwelele nakambi uuweme ukuboneka. ¹⁸ Yakobo atemenwe Rakelo, eco kalabila ati, "Nalokumubombela pa myaka cine lubali pali Rakelo, umwaice pa bana benu abanakashi." ¹⁹ Labani kalabila ati, "calinga ati imupele kuli we, ukucila ukumupela ku mwalalume umbi. Ikala nande." ²⁰ Eco Yakobo kabomba imyaka cinelubali pali Rakelo; nayo kaiboneka kubati ni nshiku ishinono likoso, pa kutemwa uku amukwatile. ²¹ Elo Yakobo alabile kuli Labani ati, "Mpeni umukashi wandi, pantu inshiku shandi ndipwishishe - ukweba ati imupe!" ²² Elo Labani abungenye abalalume ba ncende njilya no kupanga umutebeto. ²³ Mu cungulo, Labani kabula Leya umwana wakwe umwanakashi no kumuleta kuli Yakobo, naye kaba pamo nakwe. ²⁴ Labani kapela umusha mwanakashi Zilpa ku mwana wakwe Leya, ukuba umusha wakwe. ²⁵ Mu lucelo, boneni, ali ni Leya! Yakobo kalabila kuli Labani ati, "Bushe nindo nji mwacita kuli nebo? Bushe tanshamubombelepo pali Rakelo? Nindo iyo mwambepela?" ²⁶ Labani kalabila ati, "Tacabapo mu lutambi lwesu ukupela umwana mwanakashi umwaice apo uwakubalapo tangapelwa. ²⁷ Pwisha umulungu wa bwinga pali ngu mwana mwanakashi, elo twakukupela no munakwe pa kubomba naimbi imyaka cinelubali." ²⁸ Yakobo kacita fyenke fyo, no kupwisha umulungu wa kwa Leya. Elo Labani amupele Rakelo umwana wakwe umwanakashi ukuba umukashi naye. ²⁹ Labani nakambi kapela Bilha ku mwana wakwe Rakelo, ukuba umusha wakwe. ³⁰ Eco Yakobo aingile na kuli Rakelo, naye, lelo alitemenwe sana Rakelo ukucila Leya. Efi Yakobo abombele Labani pa myaka naimbi cinelubali. ³¹ Yahweh kabona ati Leya tabamutemenwepo, eco kamupela ubufyashi, Lelo Rakelo takwetepo mwana. ³² Leya kaimita no kufyala umwana mwalalume, naye kamwinika ati Reuben, Pantu aebele ati, "Pantu Yahweh alolesha pa bucushi bwandi; Icacine umulume wandi nomba alokuntemwa." ³³ Elo nakambi aimitile no kufyalo mwana mwalalume. Kalabila ati, "Pantu Yahweh alyumfwa ati nshatemwikwapo, pali nci ampela noyu umwana mwalalume," naye kamwinika ishina ati Simeon. ³⁴ Elo aimitile nakambi no kufyalo mwana mwalalume. Kalabila ati, "Nomba pali njino nshita umulume wandi akundambatila, pantu namufyalila abana balalume batatu." Eco ishina lyakwe bamwinikile ati Lebi. ³⁵ Kaimita nakabili no kufyala umwana mwalalume. Kalabila ati, "Nomba nduno nkolumba Yahweh." Eco amwinikile ishina ati, Juda; Elo alekele ukufyala abana.