¹ Isaki kaita Yakobo, kamupala, no kumukonkobesha ati, "Tekwesha ukupa umwanakashi wa ku Kenaani. ² Ima, koya ku Padan Aram, ku nganda yakwa Betuele wishi wakwa noko, no kupa umwanakashi nkulya, mu bana abanakashi ba kwa Labani, ndume yakwa noko. ³ Lesa wa maka onse alokukupala, akulenge ukufyalisha no kufulisha, ukweba ati mungaba imintapendwa. ⁴ Akupele ipalo lya kwa Abraham, kuli we, naku bana abakwisa pa numa yobe. ukweba ati mukapyane impanga umo mwikala, iyo Lesa apele kuli Abraham." ⁵ Efi Isaki atumi Yakobo ukuya. Yakobo kaya ku Paddan Aram, kuli Labani mwana Betuele umwina Aramini, ndume ya kwa Rabekah, inyina wakwa Yakobo na Esau. ⁶ Nomba ulo Esau abwene ati Isaki apala Yakobo no kumutuma ukuya ku Paddan Aram, ukuya mu kupa umwanakashi nkulya. Nakambi kabona ati Isaki amupala no kumukonkobesha, ati, "Tekwesha ukupa mu banakashi ba ku Kenaani." ⁷ Nakambi Esau kabona ati Yakobo alyumfwilile wishi na nyina, no kuya ku Paddan Aram. ⁸ Esau kabona ati abanakashi baku Kenaani tabasekeshepo Isaki wishi. ⁹ Ye kaya kuli Ishimaele, nu kubulako, pa mbali ya bakashi akwete, Mahalati umwana mwanakashi wakwa Ishimaele, umwana mwalalume wakwa Abraham, nkashi yakwa Neboti, ukuba umukashi wakwe. ¹⁰ Yakobo alifumine ku Beersheba no kulola ku Haran. ¹¹ Afikile pa ncende imo mfi no kuba mpalya ubushiku bonse, pantu akasuba kaliwile. Kabulapo limo pa mabwe ya mpalya pantu, kasaminapo, kalambalala mpalya pantu no kulala. ¹² Ye kalota nakambi kabona icikwelelo cilibikilwe pa calo. Impelo ya ciko kaifikile mu makumbi naba malaika baku Lesa balokwika no kunina pa cikwelelo. ¹³ Boneni, Yahweh kaimakana peulu ya ciko no kulabila ati, "Nine Yahweh, Lesa wakwa Abraham wiso, nakambi Lesa wakwa Isaki. Impanga apo ilele, nkapela kuli we naku bana bobe abakukukonkapo. ¹⁴ Abana bobe bakuba kubati mucanga wa pa calo, nakambi mukasalangana ukufika ku mutule suba, naku mbonshi, ku kabanga naku masamba. Muli we namu bana bobe emo indupwa shapa calo shakupalilwa. ¹⁵ Bona, ndi nobe, nalokukusunga konse uko walokuya. Nakukuleta muli njino mpanga nakabili; pantu nshakakushepo. Nakucita fyonse ifi nakulaya." ¹⁶ Yakobo kabuka mu tulo twakwe, no kulabila ati, "Icacine Yahweh ali pali njino ncende, nakambi nshasamukwishibilepo." ¹⁷ Ye kaumfwa umwenso no kulabila ati, "Mpano pantu pakutinya! Takupo nacimbi pano ni nganda yaku Lesa. Ubu bwingililo bwa ku mulu." ¹⁸ Yakobo kaima lucelocelo no kubula ibwe ili asaminepo ku mitwe. Kaliminika kubati icibumbili nokwitilapo amafuta peulu ya liko. ¹⁹ Kaita ishina lya njilya ncende ati Betele, lelo ishina lya ngulya musumba lyalokwitwa ati Lusi. ²⁰ Yakobo kalapa umulapo, kalabila ati, "Kani Lesa alokuba nande nakambi alokuncingilila muli ngu musebo umo nkoenda, nakambi nga alokumpela ifilyo, ne fya kufwala, ²¹ ukweba ati nkabwele umutende ku nganda ya kwa tata, elo Yahweh akuba Lesa wandi. ²² Elo ibwe ndi ili napanga icibumbili lyalokuba ili shilile. Pali fyonse likoso ifi mwalokumpa, nalokupela icekumi kuli mwe."