¹ Ulo Isaki akotele na menso yakwe kayapofula icakuti talokubonapo, kaita Esau, Ibeli lyakwe, no kumweba ati, "Mwana wandi," Esau kalabila ati "Ndi mpano," ² nakambi Isaki kalabila ati, "Lolesha nkuno, ndikotele. Nshishibilepo ubushiku nakufwa. ³ Eco bula ifyanso fyobe, imifwi no buta, no kuya mu mpanga no kunjipaila inama. ⁴ Umpangile ifilyo ifinonene, ifi natemwa, no kuleta kuli nebo ukweba ati nkalye no kukupaala apo nshingafwa." ⁵ Nomba Rabeka kaumfwa ulo Isaki alokulabila na Esau umwana wakwe. Esau kaya mu mpanga mukulunga inama nakambi kaileta. ⁶ Rabeka kalabila kuli Yakobo umwana wakwe no kumweba ati, "Lolesha nkuno, ndyumfwile uko wiso akolabila na Esau umukwanu. Amwebele ati, ⁷ 'Ndetela inama no ku mpangila ifilyo ifinonene, ukweba ati ndye no kukupaala pa menso yaku Yahweh apo nshingafwa.' ⁸ Eco nomba, mwana wandi, umfwa ifi nkokukonkobesha. ⁹ Kabiye pe tanga, no kundetelako imbushi ishana shibili ishiweme; nande nkopanga wiso ifilyo ifinonene kuli isho, fyenka ifi atemwa. ¹⁰ Ukoisa kutwalila wiso, ukweba ati alye, ukweba ati akupaale apo atangafwa." ¹¹ Yakobo kalabila kuli Rabeka inyina ati, "Boneni, Esau umukwasu alikwata ubusako, nande ndi muntu uutelele. ¹² Pambi bata banganjikatamo, nande mboneke uwabufi. Nkoiletela itipu talilipo ipalo." ¹³ Inyina kamweba ati, "Mwana wandi, leka itipu ilili lyonse limponene. Ngumfwila likoso, no kuya, undetele." ¹⁴ Efi Yakobo aile no kubula imbushi ishana no kushileta kuli nyina, na nyina kapanga ifilyo ifinonene, fyenka ifi wishi atemenwe. ¹⁵ Rabeka kabula ifyakufwala ifiweme ifya kwa Esau, umukulu wakwe, ifi amusungile mu nanda, no kufwika Yakobo, umwana wakwe umwaice. ¹⁶ Kabika impapa ya mbushi ishana ku maboko yakwe no munakile mu mukoshi. ¹⁷ Kabika ifilyo ifinonene no mufuba ifi apekenye mu minwe ya mwana wakwe Yakobo. ¹⁸ Yakobo kaya kuli wishi no kulabila ati, "Bata." Wishi kalabila ati, "Ndi mpano; niwe nani, mwana wandi?" ¹⁹ Yakobo kalabila kuli wishi ati, ''Nine Esau ibeli lyenu. Ndicitile ifimunjebele. Nomba ikaleni no kulyapo shimo pa nama shandi, ukweba ati mu mpaale." ²⁰ Isaki kalabila ku mwana wakwe ati, "Nindo cabela ati penka mpa bwangu waisanga, mwana wandi?" Ka asuka ati, "Pantu Yahweh Lesa wenu eundeteele." ²¹ Isaki kalabila kuli Yakobo ati, "Palamina apepi, ukweba ati nkukumye, mwana wandi, njishibe kani niwe umwana wandi uwacine Esau nangula tewepo." ²² Yakobo kapalamina kuli Isaki wishi; na Isaki kamukumya no kulabila ati, "Ili shiwi lyakwa Yakobo, lelo amaboko maboko yakwa Esau." ²³ Isaki tamwishibilepo, pantu amaboko yakwe kayali no busako, kubati maboko ya mukwabo Esau, efi Isaki amupalile. ²⁴ Kalabila ati, "Napo cine niwe Esau umwana wandi?" Ka asuka ati, "Nine." ²⁵ Isaki kalabila ati, "Mpela ifilyo, nande ndye inama yobe, ukweba ati nkupale." Yakobo kaleta ifilyo kuli ye. Isaki kalya, nakambi Yakobo kamuletela umwangashi, naye kanwa. ²⁶ Elo wishi Isaki alabile ati, "Palamina nomba umfyompe, mwana wandi." ²⁷ Yakobo kapalamina no kumufyompa, nakambi kanunsha icema cafya kufwala fyakwe no kumupaala. Kalabila ati, "Boneni, icema ca mwana wandi cili kubati cema ca mpanga iyo Yahweh apaala. ²⁸ Lesa akupele iciputulwa ca mume wa mwiulu, iciputulwa ca fyuma pa calo, ubusomboshi no mwangashi ifingi. ²⁹ Abantu balo kukubombela ne nko shalo ku kwinamina panshi. Wakuba shikulu pa bakwanu, nakambi abana ba bakwanu balo kwinamina webo panshi. Uwalo kukutipa akutipwa; Onse uwalo kukupaala alokupaalwa." ³⁰ Penka apo Isaki ashilile ukupaala Yakobo, nakambi ati papite likoso akanshita kanono apo Yakobo afumine pa cinso cakwa Isaki wishi, Esau kafika ukubwela ukufuma mu kulunga kwakwe. ³¹ Naye kaipika ifilyo ifinonene no kuleta kuli wishi. Kalabila kuli wishi ati, "Bata, ikaleni mulyepo shimo pa nama sha mwana wenu,ukweba ati mumpaale." ³² Isaki wishi kamweba ati, "Niwe nani?" Kalabila ati, "Ndi mwana wenu, ibeli lyenu, Esau." ³³ Isaki katutuma ukwakuti no kulabila ati, "Ninani uwasakwipaya nji inama no kuleta kuli nebo? Ndilile ninshi taungafika, nakambi ndimupalile. Cacine, akuba uupalilwe."