¹ Nomba kamuba icipowe mu calo, icipusuneko ne caliko mu nshiku shakwa Abraham. Isaki kaya kuli Abimeleki, imfumu yaba pelishiti pa Gera ² Nomba Yahweh kaboneka kuli ye no kumweba ati, "Uyapo ku Egypt; ikala mu calo ici nakweba ukwikalamo. ³ Ikala muli yenka nji mpanga, nande nalokuli nobe nakambi nakukupaala; pantu kuli we na bakukukonkapo, nkapela nci calo conse, nakambi nakufikilisha umulapo nalapile kuli wiso Abraham. ⁴ Nakufusha ubufyashi bobe kubati ni ntanda sha mwiulu, nakambi nkapela ubufyashi bobe icalo nci conse. Mu bufyashi bobe emo inko sha pa calo shakupalilwa. ⁵ Nebo nkacita nci pantu Abraham alingumfwilile ishiwi lyandi no kusunga ukukonkobesha kwandi, amafunde yandi, ifipope fyandi, na malamuno yandi." ⁶ Efi Isaki aikele mu Gera. ⁷ Ulo abalalume ba muli njilya ncende bamwipwishe palwa mukashi wakwe, kalabila ati, "Ni nkashi shandi." Katina ukulabila ati, "Mukashi wandi," pantu katontonkanya ati, "Abalalume ba njilya ncende bakonjipaya pakuti bapoke Rabeka, pantu aliwamishe." ⁸ Panuma ulo Isaki akokweleko nkulya, Abimeleki imfumu yaba Pelishiti kailokulolesha pa cipunda ca nanda. Kabona, boneni, Isaki alokwangasha Rabeka, umukashi wakwe. ⁹ Abimeleki kaita Isaki no kulabila ati, "Bona, cacine mukashi obe. Nindo walabilile ati, 'Ni nkashi shandi'?" Isaki kalabila ati, "Pantu kantontonkanya ati umbi anganjipaya pa kumupoka." ¹⁰ Abimeleki kalabila ati, "Nindo ii wacita kuli fwe? Umo mu bantu nga alilele no mukashi obe, nawe nga waliletele umulandu kuli fwe." ¹¹ Efi Abimeleki asokele abantu bonse no kulabila ati, "Onse uwakwikata muli ngu muntu nangula umukashi wakwe akwipaiwa." ¹² Isaki kalima ifilimwa mu ncilya calo nakambi kasombola mu mwaka umo wenka umwanda umo, pantu Yahweh alimupalile. ¹³ Uyu muntu ka nonka, nakambi aloku kula mpaka kaba umukulu sana. ¹⁴ Alikwatishe impanga ne ngombe, nakambi no lupwa ulukulu. Abapelishiti kabalo kumukumbwa. ¹⁵ Nomba imishima iyo abasha bakwa wishi baimbile mu nshiku shakwa Abraham wishi, aba Pelishiti kabakanya no kufishika ne loba. ¹⁶ Abimeleki kalabila kuli Isaki ati, "Fuma kuno, pantu wakwatisha amaka ukutucila." ¹⁷ Efi Isaki afumineko nkulya no kuya kufika mwi lungu lya Gera, no kwikala nkulya. ¹⁸ Isaki kabweleshapo ukwimba imishima ya menshi, iyo baimbilepo mu nshiku shakwa Abraham wishi. Aba Pelishiti kabaishikile panuma ya mfwa yakwa Abraham. Isaki kainika imishima amashina yenka ayo wishi ainikile. ¹⁹ Ulo abasha bakwa Isaki baimbile mwi lungu, kabasanga nkulya umushima wa menshi ayakokunka. ²⁰ Bakacema ba ku Gera kabalo kutosha na bakacema bakwa Isaki, kabalo kulabila ati, "Aya menshi yesu." Efi Isaki ainikile ngulya mushima ati, "Eseki," pantu kabatosha nakwe. ²¹ Elo baimbile naumbi umushima, nakambi kabatoseshapo, napo, efi apenikile ati, "Sitina." ²² Kafuma mpalya no kwimba umushima naumbi, lelo tabatoseshepo pali ngulya mushima. Efi apenikile ati Rehobote, nakambi kaeba ati, "Nomba Yahweh atupa incende, nakambi tukotumpuluka mu calo." ²³ Elo Isaki afumine nkulya ukuya ku Beeresheba. ²⁴ Yahweh kaboneka kuli ye bwenka mbulya bushiku no kulabila ati, "Nine Lesa wakwa wiso Abraham. Utinapo, pantu ndi nobe nakambi nakukupaala no kufusha ubufyashi bobe, pa mulandu wakwa Abraham umusha wandi." ²⁵ Isaki kapanga ulutala mpalya no kwita pe shina lyaku Yahweh. Kapope cikutuulo mpalya. na basha bakwe kabembapo umushima. ²⁶ Elo Abimeleki aile kuli ye ukufuma ku Gera, na Ahussati, umunakwe, na Fikoli, umukulu wa fita fyakwe. ²⁷ Isaki kabeba ati, "Nindo mukoishila kuli nebo, apo mwalimpata nakambi mwalintamfya?" ²⁸ Elo balabile ati, "Tulibwene ukweba ati Yahweh aliba nobe. Efi twaeba ati pabe umulapo pali fwe, ina, pakati kesu nawe. Eco leka tapange icipangano nawe, ²⁹ ukweba ati tawakatucitepo bubi, fyenka ifi nafwe tatwakucitapo bubi, nakambi fyenka ifitwakucitile bwino no kukuleka koya mu mutende. Cacine, walipalwa na Yahweh." ³⁰ Efi Isaki abatebetele, nabo kabalya no kunwa. ³¹ Kabema lucelocelo no kulapa umulapo pamo. Efi Isaki abalekele kabaya, nabo kabamusha umutende. ³² Kenka nkalya kasuba abasha bakwa Isaki kabesa no kumweba pa mushima uwo baimbile. Kabalabila ati, "Twasangana amenshi." ³³ Kainika umushima ati Shiba, efi ne shina lya ngulya musumba ni Beeresheba ukufika na nduno. ³⁴ Ulo Esau ali ne myaka amakuni yane, kaupa, Yuditi umwana mwanakashi wakwa Beeri umwina Hiti, elo na Basemati umwana mwanakashi wakwa Eloni umwina Hiti. ³⁵ Kabaleta ubulanda kuli Isaki na Rabeka.