¹ Abraham kaupa naumbi umwanakashi; ishina lyakwe ali ni Ketura. ² Ye kafyala Simrani, Yokishani, Medani, Midiani, Ishibaki, na Shua. ³ Yokishani kafyala Sheba na Dedani. Abafumine muli Dedani e bantu ba ku Assyria, abantu ba ku Letushi, nabantu ba ku Leumu. ⁴ Abana bakwa Midiani bali ni Efari, Eferi, Hanoki, Abida, na Elodaa. Bonse mba bali bana bakwa Ketura. ⁵ Abraham kapela fyonse ifi akwete kuli Isaki. ⁶ Nangula cali mfi, ulo ali acili no mweo, alipeleko ifyabupe ku bana baku mbali no kubatuma ukuya ku calo ca kumutulesuba, ukutali na Isaki, umwana wakwe. ⁷ Nshi eshali inshiku sha myaka ya mweo wakwa Abraham ishi aikele, imyaka 175. ⁸ Abraham kafwa nakambi afwile umukote, umukote uwaikele ukufikapo, nakambi kashikwa ku bantu bakwe. ⁹ Isaki na Ishimaeli, abana bakwe, bamushikile mulucengo lwa Machipela, mwibala lyakwa Efroni Mwana Sohar umwina Hiti, pepi na Mamre. ¹⁰ Ili ebala Abraham ashitile kuli ba mwana Heti. Abraham bamushikile nkulya pamo na Sara umukashi wakwe. ¹¹ Panuma ya mfwa yakwa Abraham, Lesa kapaala Isaki umwana wakwe, Na Isaki aikele pepi na Beer Lahai Roi. ¹² Nomba mba e bafyelwe kuli Ishimaeli, umwana wakwa Abraham, uwo Hagar umwina Egypt, umusha wakwa Sara, afyele kuli Abraham. ¹³ Nga eyali amashina ya bana bakwa Ishimaele, ukulingana ne fibafyelwe; Nebayoti - umubele wakwa Ishimaele, Keda, Adibele, Mibisamu, ¹⁴ Mishima, Duma, Massa, ¹⁵ Hadad,, Tema, Yetu, Nafishi, na Kedema. ¹⁶ Mba e bana bakwa Ishimaele, nakambi nga eyali amashina yabo, mu mishi yabo, nakambi mu ncingo shabo; abakankala ikumi na babili ukulingana ne mikowa yabo. ¹⁷ Inji e myaka ya mweo wakwa Ishimaele, imyaka 137. Ye kafwa, nakambi kabamushika mu bantu bakwe. ¹⁸ Baikele ukufuma ku Havila ukufika ku Ashuri, pepi na Egypt, kubati kulola ku Assyria. Baikele mukutintana umo no munakwe. ¹⁹ Mfi e fyacitikile palwa kwa Isaki, mwana Abraham. Abraham kafyala Isaki. ²⁰ Isaki kali ne myaka amakumi yane ulo aupile Rabeka, mwana Betuele umwina Aramu wa ku Padan Aramu, nkashi yakwa Labani umwina Aramu. ²¹ Isaki kapepa kuli Yahweh pa mukashi wakwe pantu takwetepo mwana, na Yahweh kamwasuka ipepo lyakwe, naye Rabeka umukashi wakwe kaimita. ²² Abana kabalo kutintana abene benka mumala yakwe, naye kalabila ati, "Nindo fikoncitikila mfi fintu?" Kaya mukwipusha Yahweh pali nci. ²³ Yahweh kamweba ati, "Inko shibili eshili mu mala yobe, nakambi inko shibili bakupatukana ukutula mwifumo lyobe. Umbi akuba uulosele ukucila umunakwe, nakambi umukulu alokubombela umwaice." ²⁴ Ulo yafikile inshita ya kupaapa, boneni, kamuli ba mpundu mwifumo lyakwe. ²⁵ Umwana wakubalapo kafuma uukashikile onse kubati ni nsalu ya busako. Kabamwinika ishina ati Esau. ²⁶ Panuma, umukwabo naye kafuma. Ukuboko kwakwe kakulokwikete icitende cakwa Esau. Kabamwinika ati Yakobo. Isaki ali ne myaka amakumi mutanda ulo umukashi wakwe abafyele. ²⁷ Abalumendo kabakula, na Esau aishibishe ubulunshi, umuntu wa mu mpanga; lelo Yakobo ali uutalalile, alokwikala inshita yakwe mu fi kutuulo. ²⁸ Lelo Isaki alitemenwe Esau pantu alokulya inama ishi alokwipaya, lelo Rabeka atemenwe Yakobo. ^{29 30} Yakobo kaipikapo umuto. Esau kaisa ukufuma mu mpanga, nakambi ali ne nsala iine kantu. Esau kalabila kuli Yakobo ati, "Mpelako ngu umuto. Napapata, nkofwa!" Ecalengele alokwitwa ati Edomu. ³¹ Yakobo kalabila ati, "Tange inshitisha ububeli bobe." ³² Esau kalabila ati, "Bona, ndi likoso pepi no kufwa. Nda bwando ububeli kuli nebo?" ³³ Yakobo kalabila ati, "Tange ubale ulape kuli nebo," efi Esau alapile umulapo na muli njilya nshila ye kashitisha ububeli kuli Yakobo. ³⁴ Yakobo kapelako Esau umufuba no muto wa misalu. Kalya no kunwa, elo aimine no kuya kaya. Muli ngu musango Esau kasula ububeli.