¹ Nomba Abraham kakota sana nakambi Yahweh alipalile Abraham mu fintu fyonse. ² Abraham kalabila ku musha bakwe, uwali umukulu mu nanda yakwe nakambi uwalokulolekesha pali fyonse ifi akwete ati, "Bika ukuboko kobe pe tanta lyandi ³ nande nkokulenga ulape muli Yahweh, Lesa wa mwiulu nakambi Lesa wapa calo, ukweba ati tawakambulilepo umwana wandi umukashi mu bana banakashi abena Kenaani, abo njikala nabo nkuno. ⁴ Lelo wakuya ku calo candi, nakambi ku bakwasu, no kupintako umukashi wa mwana wandi Isaki." ⁵ Umusha kalabila ati, "Mba kani umwanakashi takasuminepo ukunkonka ukwisa nkuno? Bushe nkapinte umwana wenu ukubwelela ku calo uko mwafumine?" ⁶ Abraham kalabila ati, "Ushininkishe ukweba ati tautwelepo umwana wandi kunuma nkulya! ⁷ Yahweh, Lesa wa mwiulu, uwamfumishe mu nanda ya bata naku calo caba lupwa bandi, uwandaile ne cilai ati, 'Ku bana bobe nakupela nci calo,' akutuma ba malaika ukukutangilila, nawe wakuya kubulila umwana wandi umukashi nkulya. ⁸ Lelo kani umwanakashi akana ukukukonka, wakuba uwakaele kuli ngu mulapo wandi. We ukabweleshapo umwana wandi nkulya." ⁹ Efi umusha abikile ukuboko kwakwe pa cibelo cakwa Abraham shikulu wakwe, no kulapa kuli ye pali ngu mulandu. ¹⁰ Umusha kapintapo ikumi pa ngamali shakwa shikulu wakwe no kuya. Nakambi ye kapintapo ne fyabupe ifipusene kuli shikulu wakwe. Kaima no kuya ku mpanga ya Aram Naharaimu, ku musumba wa kwa Nahor. ¹¹ Ka leka ingamali kashifukama panse ya musumba pa mushima wa menshi. Mwali mucingulo, ulo abanakashi baya mukutapa amenshi. ¹² Eloalabile ati, "Yahweh, Lesa wakwa shikulu Abraham, mpeni lelo ifinakonka no kulanga uluse kuli shikulu wandi Abraham. ¹³ Boneni, mpano njimakene pepi no mushima wa menshi, na bana banakashi ba bantu ba mu musumba bakoisa mukutapa amenshi. ¹⁴ Lekeni cibe mfi, analabila ku mwanansungu ati, 'Mponeshako icakutapilako ukweba ati inweneko,' noyo uwaeba ati, 'Nwa, nakambi ati nkokunwensesha ne ngamali shobe nasho,' ninshi lekeni abe eu mwansontela ku musha wenu Isaki. Muli nci nkoishiba ati mwalanga uluse kuli shikulu wandi." ¹⁵ Kaciba ninshi tangashila no kulabila, boneni, Rabeka kafika ne cakutapilako pa fipikiti fyakwe. Rabeka afyelwe kuli Betuele mwana Milika, muka Nahor, umukwabo Abraham. ¹⁶ Umukashana ali uwelele sana nakambi ni nacisungu. Taishibilepo mwalalume. Kaya panshi pa mushima, katapa amenshi no kufuma. ¹⁷ Elo umusha abutukileko mukumukumanya no kulabila ati, "Napapata mpelako amenshi yakunwa mu cakutapilako cobe." ¹⁸ Ka asuka ati, "Nweni, shikulu," bwangu bwangu katapula, no kumupela ayakunwa. ¹⁹ Ulo apwishishe ukumupa amenshi, kalabila ati, "Nkotapilako ne ngamali shenu amenshi nasho, mpaka shipwishe ukunwa." ²⁰ Efi ye aendeshe ukwitululamo amenshi mu cakutapilamo, elo abutukile ku mushima mukutapa amenshi, katapa amenshi ya ngamali shonse. ²¹ Umwalalume kalokutamba umutalalila ukubona kani Yahweh alimwasukile mu bulwendo bwakwe nangula awe. ²² Ulo ingamali shapwishishe ukunwa, Umuntu kabula akaputulwa kapa mona aka golide akalemene pepi na citika wa shekelo, no tukoosa tubili utwa ku maboko utwalemene ba shekelo ikumi, ²³ naye kumwipusha ati, "Niwe mwana bani? Njeba napapata, bushe tamupo incende mu nanda yakwa wiso tuye tulaleko?" ²⁴ Umwanakashi ka asuka ati, "Ndi mwana wakwa Betuele mwana Milika, uo afyele kuli Nahor." ²⁵ Nakambi ye kalundapo ati, "Tulikwete impimbilino mwemfu uwingi, ne ncende uko mungalala." ²⁶ Elo umwalalume ainamine panshi no kupepa Yahweh. ²⁷ Kalabila ati, "Alo kuli uupalilwe Yahweh, Lesa wakwa shikulu Abraham, uutalabukilepo uluse lwakwe ne cishinka cakwe kuli shikulu wandi. Pakuti nebo, Yahweh alintungulwile kwenka ku nanda ya lupwa lwakwa shikulu wandi." ²⁸ Elo umwanansungu abutukile aba mu nanda yakwa nyina pali mfi fyonse. ²⁹ Nomba Rabeka alikwete ndume shakwe, ishina lyakwe ni Labani. Labani kabutukila ku mwalalume uwali panse pa nshila pepi no mushima. ³⁰ Ulo abwene akabangili kapa mona no tukoosa ku maboko yakwa nkashi shakwe, nakambi ulo aumfwile amashiwi yakwa Rabeka nkashi shakwe ati, "Mfi efi umwalalume anjeba," kaya ku mwalalume, nakambi, boneni, alimakene pepi ne ngamali pa mushima. ³¹ Elo Labani amwebele ati, "Isa, we wapalwa na Yahweh, nindo wimakanine panse? Nakupekanisha inanda, ne ncende ya ngamali." ³² Efi ngu muntu aishile ku nanda no kukakula ingamali. Ingamali kabashipela impimbili no mwemfu, na menshi kabamupa ayakusamba ku makasa yakwe na makasa ya babo abali pamo nakwe ³³ Kabapekanya ifilyo ati alye, lelo kalabila ati, "Nshalyepo sembi mbale ndabile ifi nkofwaya ukulabila." Efi Labani amwebele ati, "Labila." ³⁴ Kalabila ati, "Ndi musha wakwa Abraham. ³⁵ Yahweh alimupalisha shikulu wandi naye alinonka sana. Alimupa impanga ne ngombe, silufele na golide, abasha balalume na basha banakashi, ne ngamali ne mpunda. ³⁶ Sara, muka shikulu wandi, alifyala umwana kuli shikulu wandi mu bukote, naye alipela fyonse ifi akwata ku mwana. ³⁷ Shikulu wandi alincitile ukulapa, ati, 'Ukampintilapo umwana wandi umukashi mu bana banakashi abena Kenaani, abo njikala nabo. ³⁸ Lelo ulingile ukuya ku lupwa lwaku bata, nakambi ku lupwa lwandi, no kubula umukashi wa umwana wandi. ³⁹ Shikulu wandi kamweba ati, 'Epali umwanakashi akana ukunkonka.' ⁴⁰ Lelo ye kanjeba ati, 'Yahweh, uwo njenda nakwe, akutuma malaika wakwe ukuya nakwe naye akukulanga inshila, ukweba ati ukampintile umukashi wa mwana wandi ukufuma kuli ba lupwa bandi nakambi mu butuntuko bwa nanda yaku bata. ⁴¹ Lelo wakuba uwakaele kuli ngu mulapo kani waya kuli ba lupwa lwandi nabo nga tabaka mupelepo kuli we. Ninshi wakuba uwakaele ku mulapo wandi. ⁴² Efi nebo nasakufika lelo mpalya pa mushima, no kulabila nati, 'Mwe Yahweh, Lesa wakwa Shikulu Abraham, kani ca cine mukofwaya ukweba ati nduno lwendo lwandi nkumanishe - ⁴³ ndi mpano pa mushima wa menshi - lekeni umwanansungu uukoisa mukutapa amenshi, umwanakashi uwo nkoisa kweba nati, "Mpelako amenshi yakunwa mu cakutapilako cobe," ⁴⁴ umwanakashi uukonjeba ati, "Nweni, nakambi nkomutapilako na menshi ya ngamali"- lekeni abe emwanakashi uwo imwe, Yahweh, mwasalila umwana wakwa shikulu wandi.' ⁴⁵ Ninshi nebo nshingashila no kulabila mu mutima wandi, boneni, Rabeka ewishile ne cakutapilako cakwe pa fipikiti fyakwe nakambi ye asakuya pa mushima no kutapa amenshi. Efi nasakumweba nati, 'Napapata mpelako ayakunwa.' ⁴⁶ Ye bwangu bwangu efi asakutula icakutapilamo pa fipikiti fyakwe no kulabila ati, 'Nweni, nakambi nkomupelako na menshi ya ngamali nasho,' Efi nebo nasakunwa, nakambi ye asakunwenshako ne ngamali nasho. ⁴⁷ Nasakumwipusha no kulabila nati, 'Niwe mwana bani?' Ye asa kulabila ati, 'Nine mwana Betuele, umwana wa kwa Nahor, uwo Milika amufyalile.' Elo nasakumubika akabangili pa mona no tukoosa ku maboko yakwe. ⁴⁸ Elo nasa kwinama no kupepa Yahweh, no kupaala Yahweh, Lesa wakwa shikulu Abraham, uuntungulwile ku nshila ya cine ukwisa kusangila umwana wakwa shikulu wandi umwana mwanakashi muli lupwa wakwa shikulu wandi. ⁴⁹ Kanshi nomba, kani muli ipekenye ukundanga ukutemwa no luse kuli shikulu wandi, njebeni. Lelo kani tefyo, njebeni, ukweba ati mbwelele ku kuboko kwaku kulyo nangula ku kuso." ⁵⁰ Elo Labani na Betuele ba asukile no kulabila ati, "Nci cintu cafuma kuli Yahweh; tatwalabilepo kuli we icibipile nangula iciweme. ⁵¹ Lolesha, Rabeka ngu mpa. Mupinte ulokuya, ukweba ati akabe umukashi wa mwana wakwa shikulu obe, fyenke ifi Yahweh alabile. ⁵² Ulo umusha waku Abraham aumfwile amashiwi yabo, ye kainamina panshi pa cinso caku Yahweh. ⁵³ Umusha kafumya utupe twa silufele no tupe twa golide, ne fyakufwala, no kufipela kuli Rabeka. nakambi kapela ifyabupe fya mutengo kuli ndume shakwe na kuli nyina. ⁵⁴ Elo ye na balalume abali nakwe kabalya no kunwa. Kabalala mpalya mbulya bushiku, nakambi ulo babukile ulucelo, kalabila ati, "Ndekeni mbwelele kuli shikulu wandi." ⁵⁵ Ndume shakwe na nyina kabalabila ati, "Lekeni umwanansungu ekale nafwe pa nshiku nashimbi ishinono, ngashabako ikumi. Panuma elo angaya. ⁵⁶ Lelo umusha ka asuka ati, "Muncikilishapo, pantu Yahweh alitungulwile inshila. Lekeni nje ukweba ati mbwelele kuli shikulu wandi." ⁵⁷ Kabalabila ati, "Tukoita umwanansungu tumwipushe." ⁵⁸ Efi baitile Rabeka no kumwipusha, "Bushe ukoya na ngu mwalalume?" Ka asuka ati, "Nkoya." ⁵⁹ Efi batumine nkashi shabo Rabeka, no musha mwanakashi wakwe, pa bulwendo no musha wakwa Abraham na balalume abali nakwe. ⁶⁰ Kabapaala Rabeka , no kumweba ati, "We nkashi yesu, leka ukabe nyina wa makana na makana ikumi, nakambi leka abakufuma muli we bakakwate imilyango ya babo ababapata." ⁶¹ Elo Rabeka aimine, nakambi ye no musha mukashana wakwe baninine pa ngamali, no kukonka ngu muntu. Eco ngu musha apintile Rabeka, no kuya. ⁶² Nomba Isaki alokwikala mu Negeb, nakambi elo abwelele ukufuma ku Beer Lahai Roi. ⁶³ Isaki aile kunse mukupepa mu mpanga pa cungulo. Ulo ainukile kalolesha no kubona, boneni, kakulokwisa ingamali! ⁶⁴ Rabeka kalolesha, nakambi ulo abwene Isaki, kaika pa ngamali. ⁶⁵ Kalabila kumusha ati, "Ni nani ngulya muntu uukopita mwibala mukutukumanya?" Umusha kalabila ati, Ni shikulu wandi." Efi ye abulile icitambala cakwe, no kuifimba. ⁶⁶ Umusha kapenda kuli Isaki ifintu fyonse ifi acitile. ⁶⁷ Elo Isaki amutwele ku cikutulo cakwa nyina Sara no kupinta Rabeka, naye kaba umukashi wakwe, nakambi ye kamutemwa. Efi Isaki asansamukile panuma ya mfwa yakwa nyina.