¹ Sarah aikele myaka umwanda umo na makumi abili na cine lubali - 127. Mfi efyali imyaka ya mweo waku Sarah. ² Sarah afwilile Kiriath Arba, ekwebati, Hebron, mu calo ca Canaan. Abraham aliloseshe Sarah no kumulila. ³ Elo Abraham afuminepo pa citumbi camukashi wakwe, no kulabila kubana ba ku Hete ukwebati, ⁴ "Nebo ndi mulebeshi muli mwe. Napapata mumpeko muli mwe mpanga ya kushikamo, pakwebati nkashikemo uufwile". ⁵ Abana ba ku Heth kabamwasuka Abraham, kabalabila ukwebati, ⁶ "umfweni kuli fwe, mwe shikulu. Mwe muli abacidama ba ku Lesa muli fwe. Shikeni citumbi cenu ponse apo mungaisalila mwebene mu mpanga shesu. Tapapo nangu umo palifwe uungakanya inanda yakewe, pakwebati, mungashikamo icitumbi cenu". ⁷ Abraham kaima kafukama ku bantu ba mu calo ncilya, kubana bakwa Heth. ⁸ Kalabila kulibo ukwebati, "Kati mwasumina ukwebati ningashika icitumbi candi, nomba mung`umfwe nebo mu mpapatileko na kuli Efrone umwana wa ku Zohari, mundabilileko nebo. ⁹ Munjipushisheko anshitishe ninga yamu Makpela, iiakwata, ibelele kumpelo yampanga yakwe. Pamutengo uukumanine mulekeni anshitishe pa menso kutuba ukuba akapanga kakushikamo". ¹⁰ Nomba Efrone kaikele pamo na bana bakwa Heth, elo na Efrone umu Hittite ka asuka Abraham na bana bakwa Heth kabomfwile, kuli babo bonse abaisa mumpongolo ya mushi wakwe, kalabila ukwebati, ¹¹ "Awe, mwe ba shikulu, umfweni kuli nebo, namupela impanga, elo ne ninga iili imo. Naipela kuli mwe pamenso abana ba bantu bandi. Napela kuli mwe ukushikamo icitumbi cenu". ¹² Elo Abraham ka fukame pa menso abantu ba mu calo mulya. ¹³ Kalabila kuli Efrone mu matwi abantu ba mu calo ukwebati, "nomba kati mukofwaya, napapata pali nji mpanga. Pokeni indalama kuli nebo, elo nakushika icitumbi candi nkulya". ¹⁴ Efrone ka asuka Abraham, ukulabila ukwebati, ¹⁵ "Nkopapata, mweshikulu, mukutike kuli nebo. Akaciputulwa akanini aka mpanga akangashitwa ama shekele imyanda ine, mba kando pali nebo namwe? kashikeni citumbi cenu". ¹⁶ Abraham kaumfwa kuli Efrone elo Abraham afumishe cipendo ca ma shekele no kupa kuli Efrone ceco nci alabile mu matwi abana bakwe Heth, ama shekele imyanda ine, ukulingana bwaka nefi caba kuba makwebo. ¹⁷ Elo impanga, yakwa Efrone, iya limu Makpela, iyapalamine ku Mamre, ekwebati, impanga, ne ninga iyalimulya, elo nefinti kumo fyonse ifyali muli njilya mpanga no kushinguluka umupaka waiko ¹⁸ kaipelwa, kuli Abraham pakuishita mumenso abana bakwa Heth, pamenso akuli bonse babo abaishile mumpongolo ya mushi wakwe. ¹⁹ Ulo papitile mfi, Abraham ashikile Sarah umukashi wakwe mu ninga ya mu mpanga ya Makpela, yeyo iya palamina ku Mamre, ekwebati, Hebrone, mu calo ca Canaani. ²⁰ Elo impanga ne ninga iyalimo kaipelwe kuli Abraham ukuba impanga yakushikamo ukutula ku bana bakwa Heth.