¹ Yahweh kaumfwa ukulomba kwakwa Sara fyenke fi alaile ukucita, nakambi Yahweh kacitila Sara ifi amulaile. ² Sara kaimita no kufyalila Abraham umwana mu bukote bwakwe, pa nshita iya lingile yenka iyo Lesa alabililepo naye. ³ Abraham kainika ishina mwana wakwe, uyo uo afyele, uo Sara amufyalile, Isaki. ⁴ Abraham kasembulula umwana wakwe Isaki ulo akumenye inshiku cine konsekonse, fyenke fi Lesa amwebele. ⁵ Abraham ali ne myaka umwanda umo ulo umwana wakwe Isaki afyelwe. ⁶ Sara kalabila ati, "Lesa andengo kuseka; onse uwakumfwa akuseka nande." ⁷ Nakambi ye kalabila ati, "Mba ninani angeba Abraham ati Sara angalela umwana, lelo ndimufyalile umwana umwalalume mu bukote bwakwe!" ⁸ Umwana kakula nakambi kasumuka, na Abraham kapanga umutebeto uukulu pa bushiku Isaki asumukile. ⁹ Sara kabona umwana wa kwa Haga umwina Egipti, uo afyele kuli Abraham, akoseka. ¹⁰ Elo ye alabile kuli Abraham ati, "Tamfya uyu musha umwanakashi no mwana wakwe, pantu uyu mwana wa ngu mwanakashi umusha takabepo impyani pamo no mwana wandi, na Isaki." ¹¹ Nci cintu calikalipile sana Abraham pa mulandu wa mwana wakwe. ¹² Lelo Lesa kalabila kuli Abraham ati, "Ukalipapo pa mulandu wa ngu mwana, na pa mulandu wa ngu mwanakashi umusha. ko kutika ku mashiwi yakwe muli fyonse ifi akolabila kuli we pali ngu mulandu, pantu ni muli Isaki emo abana bakukukonkapo ba kwinikwa. ¹³ Nakumulenga naye ngu mwana wa mwanakashi umusha ukuba uluko, pantu naye mwana obe." ¹⁴ Abraham kaima lucelocelo, kabula umufuba ne mpapa ya menshi, no kupela Haga, kamubika pa cipikiti cakwe. Ye kamupela umwana mwalalume no kumutamfya. Kaima kaya nakambi kalokushinguluka mu matololo ya ku Beresheba. ¹⁵ Ulo amenshi mu mpapa ya menshi yapwile, kasha umwana munshi ya citi cimo mfi. ¹⁶ Elo aile, no kwikala akatalamukila panono naye, pa ntamfu ya kutama ubuta, pantu kalabila ati, "Nshikofwayapo ukulolesha pa mfwa ya mwana." Ulo aikele mpalya ubucila nshila ukufuma kuli ye, kaimye ishiwi lyakwe no kulila. ¹⁷ Lesa kaumfwa ishiwi lya mwana wa musha, na malaika waku Lesa kabilikisha ishiwi ukufuma mwiulu kuli Haga, no kumweba ati, "Nindo ikokushupa we, Haga? utinapo, pantu Lesa alyumfwile ishiwi lya mwana apo ali. ¹⁸ Ima, imya umwana, umukoseleshe; pantu nkomucita ukuba uluko ulukulu." ¹⁹ Elo Lesa aiswile amenso yakwe, naye kabona umushima wa menshi. Kayapo no kwisusha impapa na menshi, kapelako no mwana wakwe ukunwa. ²⁰ Lesa ali no mwaice, nakambi kakula. Aikele mu matololo no kwuluka cibinda wa nama. ²¹ Aikele mu matololo ya Paran, na nyina kamufwaila umukashi ukufuma mu Egipti. ²² Nci cali pa nshita iyo Abimeleki na Phicol umukulu wa fita fyakwe alabile kuli Abraham, ati, "Lesa ali na we muli fyonse ifi ukocita. ²³ Nomba pali nci lapa kuli nebo muli Lesa ati tawakambepaikepo, nangula niku bana bandi, nangula kuba kunkonkapo. Langa kuli nebo na ku mpanga iyo wikalamo ubololoke bwa cipangano bumo bwenka ubo nande nakulangile." ²⁴ Abraham kalabila ati, ''Nalapa." ²⁵ Abraham naye kailishanya kuli Abimeleki palwa mushima wa menshi uo umusha wakwa Abimeleki apokolwele kuli ye. ²⁶ Abimeleki kalabila ati, "Nshishibilepo uucitile ico cintu. Tawanjebapo ukufika na nduno; Nshaumfwapo pali ico ukufika na lelo." ²⁷ Eco Abraham kabula impanga ne ngombe no kupela Abimeleki, namba balalume babili kabapanga icipangano. ²⁸ Elo Abraham apatwile utwana twa mpanga utwanakashi cinelubali pe tanga twenka. ²⁹ Abimeleki kalabila kuli Abraham ati, "Tukopilibula indo utwana twa mpanga utwanakashi utu wapatula ukuba twenka?" ³⁰ Ye ka asuka ati, "Utu utwana twa mpanga utwanakashi uto ukopoka ku kuboko kwandi, ukweba ati cibe bu mboni kuli nebo, ati nine naimbile ngu mushima." ³¹ Efi aitile mpalya pantu ati Beresheba, pantu nkulya mba babili kabalapa umulapo. ³² Kabapanga icipangano pa Beresheba, elo nakambi Elimeleki na Fikole, umukulu wa fita fyakwe, kababwelela ku mpanga ya ba Pelishiti. ³³ Abraham kabyala iciti ca tamarisk mu Beresheba. Kapepa Yahweh mpalya, Lesa wa muyayaya. ³⁴ Abraham kalokuli kubati mutulatula mu mpanga ya ba pelishiti pa nshiku ishingi.