¹ Elo imyulu ne calo fyashilile, ne fibumbwa fya mweo fyonse ifyaiswilemo. ² Pa bushiku bwa cinelubali Lesa kafika pa mpelo ya ncito yakwe iyo acitile, naye katusha pa bushiku bwa cinelubali ku ncito shakwe shonse. ³ Lesa kapala ubushiku bwa cinelubali no kubushisha, pakuti muli bo emo atushishe ku ncito shakwe shonse ishi acitile mu kubumba kwakwe. ⁴ Mfi efyali ukupwisha kwa kubumba umulu ne calo, ulo fyapangilwe, mu bushiku Yahweh Lesa apangile icalo ne myulu. ⁵ Takwalipo citi icili conse pa calo, nakambi ifimenwa fya mpanga ninshi tafingamena, pantu Yahweh ninshi tangalokesha imfula pa calo, nakambi takwalipo muntu wakulima umushili. ⁶ Lelo fufuta kalokwima pa calo nokulokwitilila umushili ponse pa calo. ⁷ Yahweh Lesa kapanga umuntu kwi loba lya kumushili, no kuputilamo mu myona yakwe umupuya wa mweo, no muntu kaba uwa mweo. ⁸ Yahweh Lesa kabyala ibala kumutule suba, mu Edeni, na mulya emo abikile umuntu uo apangile. ⁹ Ukufuma mu mushili Lesa kamesha ifiti fipusene ifyali ifiweme ukuboneka nakambi ifiweme ku filyo. Pali mfi kapali ne citi ca mweo icalokuli pakatinankati ke bala, ne citi cakwishiba ubune no bubi. ¹⁰ Inika yalokufuma mu Edeni ukwitilila ibala. Ukufuma mpalya kawabanikamo inika shine. ¹¹ Ishina lya yakubalilapo ni Pishoni. E yeyo iikunka mu mpanga yonse iya Havila, umwaba golode. ¹² Golide wa njilya mpanga uweme. Mwaliba ne bwe lya delium na onyx. ¹³ Ishina lya nika ya bubili ni Gihoni. ii yo yalokukunka mu mpanga yonse iya Kushi. ¹⁴ Ishina lya nika ya citatu ni Tigris, yo yalokukunkila ukulola ku mutulesuba wa Asha. Inika ya kulenga bune ni Yufrate. ¹⁵ Yahweh Lesa kabula umuntu no kumubika mwi bala lya Edeni mukulilima no kulisunga. ¹⁶ Yahweh Lesa kakonkobesha umuntu, kalabila ati, "Ku citi conse mwibala ulokulyako. ¹⁷ Lelo ku citi cakulenga ukwishiba ubune no bubi ukalyako, pantu mu bushiku wakulyako, we wakufwa." ¹⁸ Elo Yahweh Lesa alabile ati, "Taciwemepo ukweba ati umuntu alokuli enka. Nkomupangila kafwa uumulingile." ¹⁹ Ukufuma ku mushili Yahweh Lesa alipangile inama shonse isha mu mpanga ne fyuni fyonse ifya pa makumbi. Elo afiletele ku muntu ukubona ifi angafinika. Fyenka ifi umuntu aitile ifibumbwa fya mweo, kayaba amashina yafiko. ²⁰ Umuntu kainika ifitekwa fyonse, ku fyuni fyonse ifya mu makumbi, na ku nama shonse isha mu mpanga. Lelo ku muntu takwalipo kafwa uumulingile. ²¹ Yahweh Lesa kaleta pa mwalalume utulo utwine kantu, nakambi umuntu kalala. Yahweh kabulako lumo pa mbafu shakwe no kwisalapo inkanda penka apo abulile ulubafu. ²² Kwenka ku lubafu ulu Yahweh Lesa abulile ku mwalalume, kapangamo umwanakashi nakambi kamuleta ku mwalalume. ²³ Umwalalume kalabila ati, "Nomba mpa, ngu lifupa lya ku mafupa yandi, nakambi munafi wa ku minafi yandi. Alokwitwa ati 'umwanakashi' pantu abulilwe ukufuma ku mwalalume." ^{24 25} Pali nci umwalalume alokusha wishi na nyina , akukambatila ku mukashi wakwe, nabo bakuba umubili umo likoso. Kabali abatafwelepo, umwalalume no mukashi wakwe, lelo taba kwetepo nsoni.