¹ Pakutampa, Lesa apangile imyulu ne calo. ² Icalo cali icitakwetepo mbonekelo nakambi apatapo nangu kamo. Imfinshi yali peulu ye tenga. Umupashi waku Lesa walokushinguluka peulu ya lwenshi. ³ Lesa kalabila ati, "Kakube ukutuba," nako kakubako. ⁴ Lesa kabona ukutuba, ati kwawama. Kapatula ukutuba kukufita. ⁵ Lesa kaita ukutuba ati "Akasuba," nokufita kakwita ati "Ubushiku." Nku kakuba icingulo no lucelo, akasuba kakutampilapo. ⁶ Lesa kaeba ati, "Kakube umulu pakati ka menshi, nao kawabanye amenshi ku menshi anakwe" ⁷ Lesa kapanga iulu nokupatula amenshi ayali munshi ye ulu ku menshi ayali peulu lye ulu. Mfi efi cali. ⁸ Lesa kaita iulu "Umulu," Ici cali cungulo no lucelo, akasuba kakulenga shibili. ⁹ Lesa kaeba ati, "Kayabunganine pamo pa ncende imo amenshi ayali munshi ya mulu, nakambi lekeni umushili uumine uboneke." Mfi efi cali. ¹⁰ Lesa kaita umushili uumine ati "Icalo," na menshi ayabunganine kaita ati "Bemba." Ye kabona ati cawama. ¹¹ Lesa kaeba ati, "Icalo kacimeshe ifimenwamenwa: Ifiti ifiponye nseke ne fiti fya fitwalo ifitwala ifitwalo ifili ne nseke mu fitwalo, cimo cimo mu musango wa ciko." Mfi efi cali. ¹² Icalo kacimesha ifimenwamenwa, ifiti ifitwala inseke mu misango yafiko, ne fiti ifitwala ifitwalo ifili ne nseke mukati, mu misango yafiko. Lesa kabona ati nci cawama. ¹³ Kakuba icungulo no lucelo, akasuba kakulenga butatu. ¹⁴ Lesa kaeba ati, "Kakube ifyakutufya mwiulu ukupatula akasuba ku bushiku nakambi mfi fibe ifishibilo, fya nshita, inshiku ne myaka. ¹⁵ Lekeni fibe fyakutufya mwiulu ifyakupo kutuba pa calo." Efi cali. ¹⁶ Lesa kapanga ifyakutufya ifikulu fibili, icakutufya icikulu ica kuteka akasuba, ne ca kutufya cinono icakuteka ubushiku. Nakambi Ye alipangile ne ntanda. ¹⁷ Lesa kafibika mwiulu ukupo kutuba pa calo, ¹⁸ ukulokuteka akasuba no bushiku, no kupatula ukutuba ku kufita. Lesa kabona ati nci cawama. ¹⁹ Kakuba icungulo no lucelo, akasuba kalenga bune. ²⁰ Lesa kaeba ati, "Mu menshi kamwisule impendwa iikulu iya fibumbwa fya mweo, lekeni ne fyuni filokupampa pa calo mu makumbi ya mwiulu." ²¹ Lesa kapanga ifibumbwa fya mu menshi ifikulu, ne fibumbwa fimbi fyonse mu misango yafiko, ifibumbwa ifitela ne fyaisula mu menshi konse likoso, ne fyuni fya mapindo mu misango yafiko. Lesa kabona ati nci cawama. ²² Lesa kafipala, ati, "Fyalaneni nakambi mufule, no kwisula mu menshi ya muli ba bemba. Lekeni ifyuni fifule pa calo." ²³ Kakuba icungulo no lucelo, akasuba kakulenga shisano. ²⁴ Lesa kaeba ati, "Pacalo kapafume ifibumbwa fya mweo, mu misango yafiko, ifitekwa, nefi ikulanya, ne nama sha mu mpanga, mu misango ya fiko." Efi cali. ²⁵ Lesa kapanga inama sha mu mpanga mu misango ya shiko, ifitekwa mu misango ya fiko, na fyonse ifi ikulanya pa mushili mu misango ya fiko. Ye kabona ati cawama. ²⁶ Lesa kaeba ati, "Katupange umuntu mu cipasho cesu, kubati ni fwe. Lekeni babe no kuteka pe sabi lya mu muli bemba, pa fyuni fya mwiulu, napa fitekwa, pa calo conse likoso, nakambi pali fyonse ifi ikulanya ifi ikula pa calo." ²⁷ Lesa alipangile umuntu mu cipasho cakwe. Mu cipasho cakwe umwine emu amupangile. Umwalalume no mwanakashi efi abapangile. ²⁸ Lesa kabapala no kulabila kuli bo ati, "Fyalaneni, nakambi fuleni. Kumanyeni pa icalo, no ku panasha. Mulokuba na bu kateka pe sabi lya muli bemba, pa fyuni fya mwiulu, napa fya mweo fyonse ifyenda pa calo." ²⁹ Lesa kalabila ati, "Boneni, Ndipele kuli mwe ifiti fyonse ifitwala inseke ifili pano calo, ne fiti fyonse ifya fitwalo ifili ne nseke mu kati kafiko. Fyalokuba ifilyo kuli mwe. ³⁰ Ku nama shonse isha pa calo, ku fyuni fyonse ifya mu mulu, na kuli fyonse ifi ikula pa calo, naku cibumbwa conse icipema napela ifimenwa fya mabulamabula ukuba ifilyo." Mfi efi cali. ³¹ Lesa kabona fyonse ifi apangile. Boneni, fyaliwamishe. Kakuba icungulo no lucelo, akasuba kakulenga mutanda.