¹ Bamalaika babili kabesa mu Sodoma mucingulo, ninshi Loti kaikele pa mulyango wa Sodoma. Loti kababona, Kaima mukubakumanya kainama nokulosha icinso cakwe panshi. ² Kalabila ati, "Napapata mwe bashikulu bandi, nkomulomba ukwalukila ku nanda ya musha wenu, mwikaleko mu bushiku, no kusamfya amakasa enu. Elo mungabuka kumaca no kuya mu nshila yenu." Kabasuka ati, "Awe, tukoya kulala mukati ka mushi." ³ Lelo ye ka bapatikisha na maka, elo baile nakwe, no kwingila mu nanda yakwe. Kapekanya icakulya no mufuba uutafununukilepo, nabo kabalya. ⁴ Lelo ninshi bo tabanga lala, abalalume ba mu mushi, abalalume ba mu Sodomu, kabashinguluka inanda, abaice na bakulu, bonse likoso abalalume ukufuma mu ncende shonse isha mushi. ⁵ Kabesa kuli Loti, no kumweba ati, "Nda bali pi abalalume beshile kuli we mbuno bushiku? Balete kuli fwe, ukweba ati tubeshibe." ⁶ Efi Loti afumine panse ya mulyango no kwisalako icibi kunuma yakwe. ⁷ Kalabila ati, "Nkomulomba, mwebakwasu, mucitapo cibipile. ⁸ Boneni, ndikwete abana banakashi babili aba talalapo namwalalume. Ndekeni, namulomba, mbalete panse kuli mwe, namwe mucite kuli bo iciweme mu menso enu. Mucitapo nangula cimo kuli mba balalume, pantu beshile mu cinshingwa ca mutenge wandi." ⁹ Kabalabila ati, "Imakana kunuma!" Nakambi kabalabila ati, "Ngu aishile nkuno mukwikala kubati mutulatula, nomba aisa kuba kapingula wesu! Nomba tukokucita icibipile ukucila napali mba." Kabamutitikisha na maka ngu muntu, Loti, kabapalamina mukutoba icibi. ¹⁰ Lelo mba balalume kabatambiko amaboko yabo no kwingisha Loti mukati ka nanda nabo pamo no kwisalako icibi. ¹¹ Elo mba batandashi baku Loti ba pamine abalalume abalokuli panse ya cibi ca nanda no bupofu, abaice na bakulu pamo, ukweba ati bafilwe ulo balokwesha ukufwaya icibi. ¹² Elo abalalume baebele Loti ati, "Napo ulikwetepo nabambi mpano? Abapongoshi bobe, abana balalume na banakashi, no abali bonse abo ukwete muno mushi, bafumyem muno muntu. ¹³ Pantu tuli pepi no konaula njino ncende, pantu ifikocitwamo pa menso aku Yahweh filicililemo naye alitutumine ukwisa mu kuonaula. ¹⁴ Loti kafumina panse no kulabila na bapongoshi bakwe, abalalume abalokufwaya ukupa abana bakwe, no kulabila ati, "Endesheni, fumeni muli njino ncende, pantu Yahweh ako onaula umushi." Lelo ku bapongoshi bakwe abonekele kubati akosekesha. ¹⁵ Ulu bwacele, Ba malaika kabakonkobesha Loti, ati, "Tampa ukuya, pinta umukashi na bana bobe abanakashi abali mpano, ukweba ati mupyangilwapo pamo pa kukandwa kwa mushi." ¹⁶ Lelo alo kuwayawaya. Efi mba balalume bamwikete pa kuboko, no kuboko kwa mukashi wakwe, na maboko ya bana bakwe abanakashi, pantu Yahweh kamubelele uluse. Kababafumisha kunse, no kubabika kunse ya mushi. ¹⁷ Ulo baba fumishe kunse, umbi pa balalume mbalya kalabila ati, "Butusheni imyeo shenu! Muloleshapo kunuma, nangula ukwikala apali ponse mu cisenene. Butukileni ku mpili ukweba ati mupyangululwapo." ¹⁸ Loti kalabila kuli bo ati, "Awe, napapata, mwe bashikulu bandi! ¹⁹ Umusha wenu alisangile ishuko mu menso enu, nakambi muli ndangile ukundanguluka ukwine kantu pa kumpususha, lelo tekuti mbutukilepo ku mpili, pantu icipumo cinga ncilikila, nakambi nkofwa. ²⁰ Boneni, umushi ngulya nkulya euliko apepi ukwakubutukila, nakambi unono. Napapata, kambutukile nkulya (bushe taulipo unono?), no mweo wandi ukopusuka." ²¹ Kabeba ati, "Cili bwaka, nci naco nakusuminisha, ukweba ati nshaonaulepo oyo mushi washimbula. ²² Endesha! Butukila nkulya, pakuti nshacitepo nangula cimo mpaka ufike nkulya." Pali nci umushi ka witwa ati Zoar ²³ Akasuba kakatula pa calo ulo Loti afikile ku Zoar. ²⁴ Elo Yahweh alokeshe pa Sodomu na Gomorra fumbwe fumbwe no mulilo ukufuma kuli Yahweh mu makumbi. ²⁵ Kaonaula yeyo misumba, ne ncende shonse, na bonse abekashi ba mu misumba, ne fimenwa ifya lokukula pa mushili. ²⁶ Lelo muka Loti, uwalokumukonka pa numa, kalolesha ku numa, nokwaluka ibwe lya mucele. ²⁷ Abraham kaima lucelocelo no kuya pa ncende apo aimakene ulo alokulabila na Yahweh. ²⁸ Kalosha icinso kakwe ku Sodomu na Gomorra ne mpanga yonse iya ncende. Kalolesha no kubona, icushi kacilokwima ukufuma mu ncende kubati cushi ca mwakocela ifintu. ²⁹ Efi ulo Lesa aonawile imisumba ya mu ncende, Lesa kaibukisha Abraham. Katuma Loti ukufuma mukati nankati kabo naushi ulo aonawile imisumba umo Loti alokwikala. ³⁰ Lelo Loti kafika ku Zoar mu kwikala mu mpili na bana bakwe abanakashi, pantu alokutina ukwikala mu Zoar. Efi ye aikele mu lukengo, ye na bana bakwe abanakashi. ³¹ Umukulu kaeba umwaice ati, "Tata alikotele, nakambi tapapo mwalalume uuli onse uwakulala nakwe ifyaba umusango wamu calo conse. ³² Isa, leka tunwenshe tata ubwalwa, na fwe tukolala nakwe, ukweba ati tulunde pa bufyashi bwakwe." ³³ Efi bo balengele wishibo ukukolwa ubwalwa mbulya bushiku. Elo umukulu ailemo no kulala na wishi; ye taishibilepo ulo alele nakwe, nangula ulo aimine. ³⁴ Akasuba kakonkelepo umukulu kaeba umwaice ati, "Umfwa, nebo kandala mailo na tata, leka tumunwenshe ubwalwa na lelo, na we wingilemo no kulala nakwe, ukweba ati tulunde ubufyashi bwakwe." ³⁵ Efi bo banwenseshe wishibo ubwalwa na mbulya bushiku, no mwaice kaingilamo no kulala nakwe. Taishibilepo ulo alele nakwe nangula ulo aimine. ³⁶ Efi bonse abana banakashi baku Loti baimitile kuli wishibo. ³⁷ Umukulu kafyala umwana mwalalume, no kumupa ishina ati Moabu. Ye kaba e wishi wa bena Moabu abaliko na lelo. ³⁸ Umwaice, naye kafyala umwana mwalalume, no kumupa ishina ati, Ben-Ammi. Ye kaba e wishi wa bantu baku Amoni aba lelo.