¹ Yahweh kaboneka kuli Abraham mu mitelebinti yaku Mamere, ulo aikele pa mulyango wa cikutulo mu kukaba kwa kasuba. ² Ye kainuka nakambi, boneni, kabona abalalume batatu balimakene ubucilanshila. Ulu ababwene, kabutukila mukubakumanya ukufuma pa mulyango wa cikutulo no kwinamina panshi. ³ Kalabila ati, "Shikulu wandi, kani nasanga ishuko ku cinso cenu, napapata mupitililapo pa musha wenu." ⁴ Lekeni kuletwe amenshi anini, musambe amakasa enu, mutusheko na munshi ya citi. ⁵ Lekeni ndete utwa kulya tunini, ukweba ati mumfweko bwino. Napanuma elo muye mu nshila yenu, pantu mwishile ku musha wenu."Kabasuka ati, "Cita fyenke fiwalabila." ⁶ Elo, abraham ayangufyenye ukwingila mu cikutulo kuli Sara, no ku mweba ati, "Endesha, bula ifipimo fitatu ifya bunga ubupeleshe, unaye, no kupanga umufuba." ⁷ Elo Abraham abutukile kwi tanga, no kubulako akaombe akana elo akaweme, no kupela umusha, naye ka angufyanya ukukapekanya. ⁸ Kabula umukaka uutikeme no mukaka uupubile, na kana kaombe akabapekenye, no kubika ifyakulya pa ntanshi yabo, kaimakana pepi nabo munshi ya citi ulo balo kulya. ⁹ Kabamweba ati, "Ali pi Sara umukashi obe?" Ka asuka ati, "Nkulya, mu cikutulo." ¹⁰ Kalabila ati, "Nakubwela kuli we ulo umwaka wakwaluka, nakambi bona, Sara umukashi obe akukwata umwana." Sara alokumfwa pa mulyango wa cikutulo, icalokuli ku numa yakwe. ¹¹ Nomba Abraham na Sara bali abakote, balikulishe, na Sara kapitilile pa mushinku apo abanakashi bangafyalila abana. ¹² Efi Sara aisekele umwine, kailabisha ati, "Ulo nashililila no mulume wandi alikota, napo nebo ningaba ne cisangalashi?" ¹³ Yahweh kalabila kuli Abraham ati, "Nindo Sara asekela no kulabila ati, 'Napo nebo ningafyala, ne mukote'? ¹⁴ Bushe kulipo icikosele kuli Yahweh? Pa nshita iyo nebo nsontelele, umwaka awa yaluka, nakubwela kuli we. Pali yenka njino nshita umwaka awapwa Sara akukwata umwana mwalalume. ¹⁵ Elo Sara akene no kulabila ati, "Nshisekelepo," pantu ye kaba no mwenso. Ye ka asuka ati, "Awe, ulisekele." ¹⁶ Elo mba balalume baimine ukuya no kulola ku Sodomu. Abraham kaya nabo ukubashikisha. ¹⁷ Lelo Yahweh kaeba ati, "Mba nindo nakufishila Abraham ifi ndimukucita, ¹⁸ apo Abraham akuba uluko ulukulu nakambi ulwa maka, ne nko shonse isha pano calo shakupalilwa muli ye? ¹⁹ Pantu ndimusalile ukweba ati angalokutungulula abana bakwe naba mu nanda yakwe mu nshila yaku Yahweh, ukucita ubololoke no mulinganya, ukweba ati Yahweh angaleta pali Abraham ifi alabile kuli ye." ²⁰ Elo Yahweh alabile ati, "Pantu umusowa pa mulandu wa Sodomu na Gomora ulukulishe, no lubembu lwabo lwakatasha, ²¹ nkoya panshi mpalya no kubona ukulila kwa pali ye ukwaisa kuli nebo, kani ca cine ifibacitile. Nga tefyo, na kwishiba." ²² Efi mba balalume babwelele ukufuma nkulya, no kuya ukulola ku Sodomu, lelo Abraham kashala alimakene pantanshi yaku Yahweh. ²³ Elo Abraham apalamineko no kulabila ati, "Bushe muko onaula abololoke pamo na babi? ²⁴ Epali muli amakumi yasano abololokele mu musumba. Bushe mwakuonaula nangula kushako incende pa mulandu wa bali amakumi yasano abali nkulya? ²⁵ Citalamuke kuli mwe ukucita icili fyefyo, ukwipaya abololokele pamo na babi, ukweba ati abololokele bacitwe kubati babi. Citalamuke kuli! Bushe kapingula wa calo conse tacitepo icilingile? ²⁶ Yahweh kalabila ati, "Kani nasanga mu Sodomu amakumi yasano abololokele mu musumba, ninshi nkouleka umusumba onse pa mulandu wabo." ²⁷ Abraham ka asuka no kulabila ati, "Boneni, napampamina ukulabila ne mfumu yandi, nangula cibe mfi ndi lukoso ulukungu nakambi amatoi! ²⁸ Nda apabulila basano pali mbalya abali amakumi yasano abololokele? Napo muko onaula umusumba onse pa kubulilapo basano?" Elo alabile ati, "Nshaonaulepo, kani nasanga nkulya abali amakumi yane na basano." ²⁹ Ye kalabila nakwe nakabili, ati, "Nda nga kuli abali amakumi yane nkulya?" Ka asuka ati, "Nshakacicitepo pa mulandu wa bali amakumi yane." ³⁰ Kalabila ati, "Napapata mukalipapo, mwe Mfumu, kweba ati ndabile. Akwaba abali amakumi yatatu nkulya." ka mwasuka ati, "Nshacicitepo, kani nasanga amakumi yatatu nkulya." ³¹ Kalabila ati, "Boneni, napampamina ukulabila ne Mfumu yandi! Nda nga kwaba abali amakumi yabili nkulya." Ka asuka ati, "Nshacicitepo pa mulandu wa bali amakumi yabili." ³² Kalabila ati, "Napapata mukalipapo, mwe Mfumu nakambi kandabile nci umuku wakupelako. Pambi kungaba abali ikumi nkulya." Elo alabile ati, "Nshaonaulepo pa mulandu wa bali ikumi." ³³ Yahweh kaya penkapo apwishishe ukulabila na Abraham, Abraham kabwelela ku nanda yakwe.