¹ Ulo Abram ali ne myaka amakumi pabula na pabula, Yahweh kaboneka kuli Abram no kumweba ati, ² "Nine Lesa wa maka onse. Enda nande, no kuba uwakaele. Elo nakufikilisha icipangano candi pakati kandi na nawe, nakambi nakukufusha ukucilamo." ³ Abram kakontama no kushiba icinso panshi nakambi Lesa kalabila nakwe, ati, ⁴ "Kuli nebo, bona, icipangano candi cili kuli we. Wakuba wishi wa mintapendwa ya nko. ⁵ Ukutula nduno ishina lyobe te Abram, lelo ishina lyobe niwe Abraham - pantu nakusonta ukuba wishi wa mintapendwa ya nko. ⁶ Naku kupala no bufyashi ubwingi, nakambi nkapanga inko muli we, ne mfumu shikafuma muli we. ⁷ Icipangano candi nakucibika pakati kandi na we na bana bobe abakukukonkapo, mu nkulo shabo shonse ukuba icipangano ca muyayaya, ukuba Lesa obe, naku bana abakakukonkapo. ⁸ Nakupela kuli we, naku bana bakukukonkapo, icalo umo wikala, icalo conse ica Kenaani, ukuba icikwatwa ca muyayaya, nakambi nakuba Lesa wabo." ⁹ Elo Lesa alabile kuli Abraham ati, "Kuli nebo, ulokusunga icipangano candi, webo nabakukunkapo mu nkulo shabo shonse. ¹⁰ Nci e cipangano candi, ico ulingile ukusunga, pakati kandi nawe na bana abakukukonkapo; Onse umwalalume alingile ukusembululwa. ¹¹ Ulingile ukusembululwa inkanda ya ku mpelo, na nci ecakuba icishibilo ca cipangano pakati kandi nawe. ¹² Onse umwalalume muli mwe uwa nshiku cine-konsekonse alingile ukusembukulwa, shonse likoso inkulo sha bantu bobe. Ukubikako na oyo onse uwafyalilwa mu nanda yobe na oyo uwashitwa ne ndalama ku matulatula uutali wa mubana bobe. ¹³ Uwafyalilwa mu nanda yobe na oyo uwashitwa mu ndalama shobe alingile ukusembululwa. Eco icipangano candi cakuba mu mubili obe ica muyayaya. ¹⁴ Onse umwalalume uutasembulwilwepo inkanda yaku mpelo akapatulweko ku bantu bakwe. Atoba icipangano candi." ¹⁵ Lesa kalabila kuli Abraham ati, "Nomba kuli Sarai umukashi obe, ulokumwitapo ati Sarai ukutula nduno. Nomba ye, ishina lyakwe ni Sara. ¹⁶ Nakumupala, nakambi nakukupela umwana muli ye. Nakumupala, naye akuba nyina wa nko. Imfumu sha bantu shikafuma muli ye." ¹⁷ Elo Abraham akonteme no kushiba impumi yakwe panshi, nakambi kaseka, nokuilabisha mu mutima ati, "Bushe umwana angafyalwa ku mwalalume uuli ne myaka umwanda? Bushe Sara, uuli ne myaka amakumi pabula, angafyala umwana?" ¹⁸ Abraham kabila kuli Lesa ati, "Limbi Ishimaeli akubako kuli mwe!" ¹⁹ Lesa kalabila ati, "Awe, lelo Sara umukashi obe akakufyalila umwana, nawe ulingile ukumwinika ati Isaki. Nkalimbika icipangano candi ukuba icipangano ca muyayaya pamo ne nkulo yakumukonkapo. ²⁰ Nomba Ishimaeli, ndikumfwile, bona, ndimupalile nakambi nakufusha ubufyashi bwakwe nakambi nakumufusha ukucilapo. Akuba ni wishi wa ba na mfumu ikumi na babili, nakambi nakumucita uluko ulukulu. ²¹ Lelo icipangano candi nakucilimbika na Isaki, uo Sara akukufyalila yenka njino nshita muli uyu mwaka." ²² Ulo ashilile ukulabila nakwe, Lesa kafuma pali Abraham. ²³ Elo Abraham abulile Ishimaeli umwana wakwe, na mbo bonse abafyalilwe mu nanda yakwe, na mbo bonse abashitilwe mu ndalama shakwe, umwalalume onse pa balalume ba nanda yakwa Abraham, no kubasembulula inkanda yaku mpelo kenka nkalya kasuba, fyenka ifi Lesa amwebele. ²⁴ Abraham ali ne myaka amakumi pabula na pabula ulo asembulwilwe inkanda ya ku mpelo. ²⁵ Ishimaeli umwana wakwe ali ne myaka ikumi na itatu ulo asembulwilwe inkanda yaku mpelo. ²⁶ Pali kenka ako kasuba Abraham na Ishimaeli umwana wakwe bonse kabasembululwa. ²⁷ Bonse abalalume bamu nanda yakwe kabasembululwa pamo naye, ukubikapo likoso na mbo abafyalilwe mu nanda yakwe na mbo abashitilwe ne ndalama kumatulatula.