¹ Ndinakele no bwikashi bwandi; Nkapela ukuilishanya kwandi pafyo ndeumfwa; Nkasosa kubukali bwa mweo wandi. ² Nkalanda kuli Lesa ,'Mwisenka apafye ndangeni ico mukomfyengela. ³ Bushe cabune kuli mwe ukuti mulentitikisha, ukususha umulimo wamaboko yenu uyo muleumfwa bwino amapange yabanake? ⁴ Bushe mwakwata amenso yabuntu? mumona ngefyo umuntu amona? ⁵ Bushe inshiku shenu shaba kubati ninshiku sha muntu nse nangula imyaka yaba kubati ya bantu, ⁶ Ico mukoipusha pabubifi bwandi nokufwailisha imembu shandi, ⁷ lelo mulishibile ukuti nshili nacilubo kabili tapali nangula umo uukompusushako ukufuma mukuboko kwenu? ⁸ Iminwe yenu eya ndengele noku kungwaminisha, lelo mukongonaula. ⁹ Ibukisheni ,nkamipapata, mwambumbile nge loba; bushe mukombwekesha kuluukungu nakabili? ¹⁰ Bushe tamunjitiile kubati mukaka nokuntimika kubati mukaka wakutikama? ¹¹ Mwalimfwikile inkanda no munofu no kulundikanya amafupa ne mishipe. ¹² Mwalimpela ubuumi ne cipangano caci cetekelo; ukwafwa kwenu kwalilindilila umupashi wandi. ¹³ Lelo mwafiisa ifi fintu mumutima wenu- ndishibile ukuti ifi efyo ¹⁴ mwalikutontonkanya. Lelo umfwa nalibembuka, ngamwalicimona; mwicingilisha ububifi bwandi. ¹⁵ Umfwa nalicita ifyabunake, cabulanda kuli ne; lelo umfwa nalicita ifyakulungama, tekuti njimye umutwe wandi, ico ndi swilemo umusebanya- moneni ukucula kwandi! ¹⁶ Umfwa umutwe wandi nga wasumbulwa mungikate ngenkalamo; elo nkabili mulange amaka yafipapwa fyenu pali ne. ¹⁷ Muliletele bakambone bapya pali ne kabili mulilundile ubukali bwenu pali ne; mulinsanshile mwebo pamo ne fiita. ¹⁸ Nindo, kabili , mwamfumishishe munda? kanshi nganalipele umupashi wandi pakuti takuli ilinso limo ilikombona. ¹⁹ Nganalifye kubati nshabapo; ukufuma munda nganapiitilwefye ukuya ku nshishi. ²⁰ Bushe inshiku shandi tashili shinono? kabili lekeni, lekeni mbe neka, pakuti ntusheko panono. ²¹ Ulo nshilaya uko ntakabwele, kuncende yamfimfi ne mfwa, ²² incende yakufiita kubati nipakati ka bushiku, incende ya cinshingwa camfwa, ukushaba butantiko nangu bumo, uko ulubuto lwaba kubati nipakati kabushiku.''