¹ Pantu ndimukufwaya mwebo ukweba ati mwishibe ukwangwa fintu kwakula pali mwebo, pantu balya abali mu Laodikea, na bonse abasha mona icinso candi mu mubili. ² Nebo ndimukubomba elo imitima yabo ibe iya koshiwa pakweba ati baletwe mu kutemwa na mubukankala bwa mwisulo bwa kwishiba, na mu mano ya cine yakwa Lesa, ico ni, Klistu. ³ Muli ena fyonse ifyuma fya kwshiba na mano fya fiswa. ⁴ Ndimukusosefi elo ati nangu umo elufya mwebo mukusosa. ⁵ Pantu nangu nshili na mwebo mu mubili, lelo ndimukuba ma mwebo mu mupashi. Ndimukusekelela pakumimona fintu muli mukwikala bwino na mumaka ya mu cisumino muli Klistu. ⁶ Elo mwebo mwapokelele Klistu Shikulu, endeni muli ena. ⁷ Beni abalimbwa muli ena, beni abakulwa pali ena, beni abali mukukulila mu cisumino ngafilya mwebo ba myebele, no kwikalilila mukulatotela. ⁸ Lolesheni ukutila nangu umo emisenda mwebo muku bembekesha, na mukubulwa icintu, umwabela intambi sha bantu, ukupalana nefintu fyamu Calo, nokukana palana na Klistu. ⁹ Pantu muli ena emwaba umwisulo wabu Lesa uwaikal muli bumuntu. ¹⁰ Mwali aba isushiwa muli ena, uwaba umutwe paba maka bonse napa babu kateka. ¹¹ Muli ena emo mwebo pamo mwali mukuputulwa inkanda ya patutwe ukuputulwa ukushi bombwa kuli bu muntu mu kufumishiwa kwamubili ukwa buntunse, nomba mukuputulwa kwa nkanda yapalutwe muli Klistu. ¹² Bali mishikile pamo mulubatisho, na muli ena mwali shukwike ukupitila mu cisumino mumaka yakwa Lesa, uyo uwashukwile ena mu bafwa. ¹³ Ilyo mwali abafwa mukusamwa namukuputulwa kwa nkanda ya palutwe ya mubili, amupa ngile mwebo ukuba abamweo pamo nao nokumfwila uluse pa misamwe yesu yonse. ¹⁴ Ali pashile ne cilembo cacipope cankongole ica iminina pamo nafwebo mumalembo. Acifu mishepo paku popelwa pa lupanda. ¹⁵ Afulile aba maka naba bukateka nokuba panga icakubatamba bena, nokubacimfya pali bena pa lupanda. ¹⁶ Elo nomba, lekeni nangu umo epingula mwebo mukulya namu kunwa, nangu pamulandu wa bushiku bwa mutebeto nangu bushiku bwantanshi bwa mweshi, nangu pamulandu wanshiku sha ma Sabata. ¹⁷ Ifi efinshingwa fya fintu ifikesa, nomba icintu ni Klistu. ¹⁸ Mwileka nangu umo uyo alefwaya bumubili nangu ku pepa ba malaika apingule mwebo ukufuma ku mutengo wenu. Umuntu wauyu musango engila mu fintu ifyo amona no kwisa mukuikusha ku kutontonkanya kwakwe kwa mubili. ¹⁹ Uyo uushikatilila pamulu wa mutwe. Ici cafuma ku mutwe na ku mubili onse ukupita mufilundwa na mumishipa no kukulila pamo, uli mu kukula ukwa kupelwa kuli Lesa. ²⁰ Nga mwali fwile pamo na Klistu ku filundwa fya pali cino calo, cinshi ico muli mukwi kalila umwalola icalo: ²¹ "Mwiikatako, nangu ukufwako, nangu kwikatako"? ²² Fyonse ifi fintu fili nokonaika ku kubomba, ukukonka umwalola ukubomba no kusambilisha kwa muntu. ²³ Aya mafunde ya mano ya we mwine ya mipepele ya kuitemenwa ne ya mubili. Nomba tacafwa nangu cimo fisekesha fye umubili.