¹ Polo, umutumwa wakwa Klistu Yesu ukupitila mukufwaya kwa kwa Lesa, na Timote muninefwe wesu, ² kuba sumina naba muninefwe aba cishinka muli Klistu uwali Kolose. Ukusenaminwa kube namwebo, nomutende ukufuma kuli Lesa Tata. ³ Tulepela ukutasha kuli Lesa, wishi wakwa Shikulu Yesu Klistu, na lyonse tulimukumpepelako mwebo. ⁴ Tuli mukumfwa icitetekelo cobe muli Klistu Yesu ne citemwiko ico wakwata kuli abo abapatulwako kuli Lesa. ⁵ Walikwata icitemwiko pamulandu wesubilo ilyasungwa mu mulu. Mwalyumfwa palifi mwacetekele ne subilo panuma yacebo cacishinka, mumbila nsuma, ⁶ icaisa kuli mwebo. Imbila nsuma ilemukange cisabo nokukula mu Calo conse. Cilapanga ifi muli imwe ukufuma ubushiku mwacumfwile nokwiluka pakusenaminwa kwakwa Lesa mucishinka. ⁷ Iyi nimbila nsuma ngefyo mwasambilile ukufumaepa Epafulas, umubonfi munensu uwasumina, uwaba necishinka pali fwebo. ⁸ Epafulas ewatwishibishe pakutemwa kwenu ukwa mumupashi. ⁹ Pamulandu wauku kutemwa, ukufuma ubushiku twaufwile ifi tatwaleka kumipepela. Tulalomba ukutila mwaisushiwamo nokwisiba mubufwayo bwakwe mumano yonse namubwishibilo bwa mumupashi. ¹⁰ Tuli mukumipepelako ukuti mwaenda aba ololoka mukusekesha Shikulu. Tulimukupepelako ukuti mwatwala ifisabo ifisuma muli fyonse ifyo muli mukucita pakuti mukakule mubwishibilo bwa kwa Lesa. ¹¹ Tuli mukupepa ukuti mwingakosa mumisango yonse ukulingana namaka yabuka bwakwe mukushipisha monse na mukutekanya. ¹² Tuli mukupepa ukuti mukabe abansansa mukupela ukutasha kuli Tata, uwamipangile ukukwata icakaniko muku pyana mubupyani bwaba mubamushilo mulubuto. ¹³ Alitupokolola mumaka yanfinfi nokututwala kubufumu bwamwana wakwe uwatemwikwa. ¹⁴ Mu mwana wakwe emo twapusukila nokwelelana imembu. ¹⁵ Umwa cipasho cakwa Lesa ushimoneka. Abali kufilengwa fyonse. ¹⁶ Muli ena emwalengelwe fyonse, mufyamumulu nefyapano calo, ifilimukumoneka nefishili mukumoneka. Nangula ubufumu nangula amaka nangula insambu, fyonse fyali mukulengwa kuli ena. Kabili fyalimuku pangwa kuli ena. ¹⁷ Umwine ewayambilepo fyonse tafilabako namuli ena fyonse emo fyaikatanina. ¹⁸ Ena emutwe wacimubili, na mucilonganino. Ena entampilo kabili ebeli kuli bonse abafwa, nomba ewakwata incende yonse pali fyonse. ¹⁹ Pantu Lesa alinensansa ukuti ukwisulamo kube muli ena, ²⁰ nokumfwana ukupitila mumwana ifi fyonse fyakwe. Lesa apangile umutende ukupitila mumulopa wakwe palupanda. Lesa abweshanya fyonse umwine nangula fya pano calo nangu mulwelele. ²¹ Panshita imo, mwali abeni kuli Lesa nabalwani mumatontonkanyo nemisango yabipa. ²² Lelo nomba alimibweshanya mumubili wakwe ukupitila mumfwa. Atitilefi pakuti amibike abamushilo, ababula ubwafya, npali fyonse ukuitalusha kuntanshi yakwe, ²³ nga cakuti mwakonkanyapo mucitetekelo, mukabikwamo nokukosa, ukwabula ukusela ukukafuma kwisubilo lyambila nsuma iyo mwaumfwile. Iyi nimbila nsuma iyashi mikilwe kumuntu onse uwapangwa pesamba lya mulwelele. Iyi nimbila nsuma iyo nebo Polo naisaba umubonfi. ²⁴ Nomba ndimukusansamuka mumacushi yenu, mumubili wandi ngefyo fyabulile muku pulinkanya kwa kwa Klistu pamulandu wamubili wakwe, ico icili ngecilonganino. ²⁵ Nipalici cilonganino nabela umubonfi, ukuli ngana nobukabilo ukufuma kuli Lesa icapelwa kuli nebo nakuli mwebo, pakwi sushiwamo necebo cakwa Lesa. ²⁶ Ici cankama icashinka icafiswa kuba mushinku nekulo. Nomba cali sokololwa kuli abo aba sumina muli ena. ²⁷ Cili kuli bena ukuti Lesa alefwaya ukumilenga mwishibikwe ubukakata ubwankama bwacishinka ubuli mukati kabena fyalo, uyo uli ni Klistu muli imwe, isubilo lyabukata. ²⁸ Uyu eo twaleshimikilapo. Tuli mukucincisha umuntu onse nokufunda umuntu onse namano yonse, pakutitwingemininako uli onse muli Klistu. ²⁹ Kabili eco ndeculila ukulingana nokukosa kwakwe ukulebomba muli nebo mu maka.