¹ Imfumu Hesekia elyo yatumine amashiwi ku bena Israeli na bena Yuda bonse, kabili yalemba amakalata ku bena Efulemu na bena Manase ayakubeta ukwisa ku Yerusalemu ku ŋanda yakwa Yawe pakuti bakasangwe kukusefya inshikunkulu ya cakucilila, Ipasaka ilyakwa Yawe, Lesa wa bena Israeli. ² Kanshi imfumu, bacilolo baiko elyo no lukuta lonse mu Yerusalemu bapingushanya ukuti bakasefye Ipasaka mu mweshi walenga ibili. ³ Kunuma balifililwe ukusefya pa nshita iyasontwa pa mulandu wakuti takwali bashimapepo abengi abaisangulwile elyo no lukuta lwali talulalongana mu Yerusalemu. ⁴ Eico imfumu no lukuta lonse lwasuminisha ukuti uku kupekanya kulifye bwino. ⁵ Kanshi epakutuma imbila mu calo conse ica Israeli, ukutula ku Beresheba ukufika ku Dani, iyakweba abantu ukwisa ku Yerusalemu mukwisa sefya Ipasaka lyakwa Yawe, Lesa wa bena Israeli. Pantu takwatalile akuba abengi abakusefya ukulingana nefyo calembwa mu mafunde. ⁶ Ukulingana nefyo imfumu yapeele icipope, inkombe epakwima no kuya mu fyalo fyonse mu ca bena Israeli neca bena Yuda nabasenda amakalata ukufuma ku mfumu na kuli bacilolo ba mfumu, apalembelwe amashiwi ayaleti, “Mwe bena Israeli, bweleleni kuli Yawe, Lesa wakwa Abrahamu, Isaki na Israeli pakuti nao abwelele kuli imwe mwe bashalapo, mwe bapuswike ku nkondo ya bena Asiria. ⁷ Mwipanga icilubo cakuba nga bashinwe nangu bamunyinenwe abashakwete cishinka kuli Yawe, Lesa wa fikolwe fyabo, icalengele ukuti abasangule icakupapako nga fino fine muleimwena. ⁸ Mwiba abaumalala imitima ngefyo bashinwe baali. Imwe nakileni Lesa, mwise ku cifulo cakwe icamushilo ico umwine asangulwila libela. Mubombele Yawe Lesa wenu pakuti aleke ukumufulilwa. ⁹ Nga cakuti mwabwelela kuli Yawe, ninshi lyena abaikata bamunyinenwe elyo na bana benu bali nokubabelela uluse elyo ne cikuku, pakuti bakabwelele na muli cino calo. Pantu Yawe Lesa wenu wa luse ulukalamba ne cikuku takamufutatile nga mwabwelela kuli ena.” ¹⁰ Mu calo cakwa Efulemu na Manase, ukuya shintafye na ku Sebuloni, inkombe shaendawike muli cila musumba, lelo abantu bena balabaseka no kubatumfya. ¹¹ Lelo nangu cali ifi, abaume bamo aba mu bena Asheri, abena Manase elyo na bena Sebuloni baliicefeshe no kusumina mpaka efyo baimine no kwisa ku Yerusalemu. ¹² Na mu Yuda cali ifyo fine, pa mulandu wakuti Lesa ali pakati ka bantu pakuti abafwilishe ukukwata amano yamo yene ayakubomfya pakucita ifyo imfumu na bacilolo baiko babakonkomeshe ukulingana ne shiwi lyakwa Yawe. ¹³ Kanshi kwalongene ibumba lya bantu ilikulu nganshi ku Yerusalemu kukusefya inshikunkulu ya mukate uushatutumuka iyo bakwete mu mweshi walenga ibili. ¹⁴ Kabili abantu balimine no kufumya ifibumbili fya malambo ifyali mu Yerusalemu, ne fibumbili fya malambo ifyakufutumwinapo ububani baya fiposa mu mukonko wa Kidironi. ¹⁵ Pa bushiku bwalenga ikumi limo na shine ubwa mu mweshi walenga ibili elyo baipeye umwana wa mpaanga we Pasaka. Uyu mulimo walengele bashimapepo na bena Levi ukumfwa insoni icalengele no kuisangulula bayaleta na malambo yakoca ku ŋanda yakwa Yawe. ¹⁶ Elyo baingila mu ŋanda no kuya pa fifulo fyabo ifyakubombelapo ukulingana nefyo calembwa mu mafunde yakwa Mose umubomfi wakwa Lesa. Bashimapepo epakubuula umulopa babapeele ku bena Levi balaukana. ¹⁷ Nomba cali ukuti abengi abali mwibumba bali tabalasanguluka, kanshi abena Levi epakwipaya abana ba mpaanga be Pasaka isha bonse abashali tabalasanguluka abafililwe no kutuula inama sha mpaanga shabo kuli Yawe. ¹⁸ Lelo nelyo cali ukuti abantu abengi abafumine ku Efulemu, Manase, Isaka na Sebuloni bali tabalasanguluka nomba balilileko Ipasaka ukwabula ukukonka ifyalembwa. Lelo Hesekia epakubapepelako asosa amashiwi ati, “Lekeni Yawe, uwaba umusuma, abelele onse uluse, ¹⁹ uyo umutima wakwe waiminina pakufwaya icinso cakwa Yawe Lesa, Yawe Lesa wa fikolwe fyakwe, cibe ukuti nangu talasanguluka umwabela amafunde ya mu cifulo camushilo.” ²⁰ Yawe epakumfwa ipepo lyakwa Hesekia, aposha na bantu bonse. ²¹ Abena Israeli abali mu Yerusalemu basefeshe inshikunkulu ya mikate ishatutumuka pa nshiku cine lubali ninshi nabasansamuka nganshi. Abena Levi na bashimapepo bena batwalilile ukwimbila Yawe cila bushiku, balelisha ifilimba ifyakulumbanya Yawe. ²² Hesekia alandile amashiwi yakukoselesha abena Levi abo abalangile amano yakubombela Yawe. Pa nshiku cine lubali balelya ifyo babakenye elyo baletuula umutuulo wakwampana no kulumbanya Yawe, Lesa wa fikolwe fyabo. ²³ Elyo ulukuta lonse epakusuminishanya ukuti balundeko inshiku shakusefya na shimbi cine lubali kanshi epakukonkanyapo ukusefya ukwa nsansa ishingi nganshi. ²⁴ Hesekia imfumu ya bena Yuda apeele ulukuta bacilume wa ŋombe ikana limo elyo ne mpaanga amakana cine lubali isha mituulo. Elyo bacilolo nabo bapeele bacilume wa ŋombe ikana limo ne mpaanga ne mbushi amakana ikumi limo. Kwalundwa ne mpendwa na imbi iya bashimapepo abaisangulwile. ²⁵ Kwali ukusansamuka ukukalamba ku lukuta lonse ulwa bena Yuda, pamo pene na bashimapepo, abena Levi elyo na bonse abaishile longanako ukufuma ku Israeli umo umwali na benafyalo abafumine ku Israeli na baleikala mu Yuda. ²⁶ Mu musumba wa Yerusalemu mwali ukusefya ukukalamba nganshi, pantu ukutula pa nshiku shakwa Solomoni mwana Davidi uwali imfumu ya bena Israeli takwatalile akuba ica musango uyu mu Yerusalemu. ²⁷ Elyo bashimapepo na bena Levi baiminina pakupaala abantu, Lesa nao abomfwa ukufuma uko ekala ku mulu, ku cifulo icamushilo.