¹ Hesekia afikile pa myaka yakufyalwa amakumi yabili na isano ilyo atendeke ukuteeka pa bufumu, kabili aikele pa bufumu mu Yerusalemu pa myaka amakumi yabili na pabula. Nyina ishina lyakwe ali ni Abiya umwana mwanakashi wakwa Sakaria. ² Ena acitile ifyalungama pa cinso cakwa Yawe ngefyo wishi Davidi acitile. ³ Mu mweshi wakubalilapo ku kutendeka kwa mwaka uwa pa bufumu bwakwe, aya isula ifiibi fya mu ŋanda yakwa Yawe no kufilungisha. ⁴ Elyo aita bashimapepo na bena Levi, aisa balonganika pa lubansa lwa ku kabanga, ⁵ elyo abeba ati, “Umfweni kufyo ndesosa kuli imwe mwe bena Levi. Mwambilepo muisangulule mwe bene elyo musangulule ne ŋanda yakwa Yawe, Lesa wa fikolwe fyenu. Fumyenimo fyonse ifyakowela mu cifulo camushilo. ⁶ Ifikolwe fyesu fyalifililwe ukuba ne cishinka kabili bacitile ifintu ifyabipa pa cinso cakwa Yawe Lesa wesu elyo no kumusangukila. Bafutatila Yawe, bafumya ifinso fyabo ku cifulo cakwe uko ekala. ⁷ Baisala ne mpongolo she Tempele lyakwe, bashimya ne fisaniko. Balekele no koca ububani nangu ukutuula amalambo yakoca pa cifulo camushilo kuli Lesa wa bena Israeli ⁸ Eico Yawe alifulilwe nganshi abena Yuda na bena Yerusalemu. Abalenga ukuba icakupapako icakupeela umwenso no kusekwa ngefyo na imwe muleimwena na menso yenu. ⁹ Ni pa mulandu wa ifi bacitile, eco abafyashi besu babepaile ku lupanga, kabili eco abana besu abaume na banakashi na bakashi besu babasendele muli bunkole. ¹⁰ Lelo nomba ndefwaya ukuti mpange icipangano na Yawe, Lesa wa bena Israeli, pakuti aleke ukutufulilwa. ¹¹ Mwe bana bandi mwiba abanakuka mukubomba imilimo yenu nomba, pantu Yawe nimwe asalile ukulaba pa cinso cakwe no kulamutumika, ukulamubombela no kumocela ububani.” ¹² Elyo abena Levi abatendeke ukubomba bali nifi: Ukufuma ku bena Koati, ni Mahati mwana Amasai na Yoeli mwana Asariya. Ukufuma ku bena Merari, ni Kishi mwana Abidi na Asariya mwana Yehaleleli. ¹³ Ukufuma ku bena Geshoni, ni Yoa mwana Sima na Edeni mwana Yoa. Ukufuma ku ba mu lupwa lwakwa Elisafani, ni Shimiri na Yeli. ¹⁴ Ukufuma ku ba mu lupwa lwakwa Asafu, ni Sakaria na Mataniya. Ukufuma ku ba mu lupwa lwakwa Hemani, ni Yeyeli na Shimei. Ukufuma ku ba mu lupwa lwakwa Yedutuni, ni Shemaiya na Usieli. ¹⁵ Cilya balonganika bamunyinabo, bonse baisangulula, elyo baingila mukusangulula iŋanda yakwa Yawe ngefyo imfumu yabakonkomeshe, ukulingana ne shiwi lyakwa Yawe. ¹⁶ Bashimapepo elyo baingila mu cifulo camushilo ica mukati ka ŋanda yakwa Yawe mukuisangulula. Bafumisha panse nokubika pa lubansa lwe Tempele lyakwa Yawe fyonse ifintu ifyakowela ifyasangilwemo. Abena Levi epakusenda fyonse no kufitwala ku mukonko wa Kidironi. Pa bushiku bwakutendeka umweshi wantashi epo batendeke umulimo wakusangulula mpaka baya fika apakwingilila mwi Tempele lyakwa Yawe pa bushiku bwalenga cine konse konse mu mweshi wine uyo. ¹⁷ Elyo pa nshiku na shimbi cine konse konse bakonkenyepo ukusangulula iŋanda yakwa Yawe mpaka bapwa pa bushiku ubwalenga ikumi limo na mutanda. ¹⁸ Ilyo bapwisha ukubomba imilimo, baya ku mfumu Hesekia no kuya mweba ati, “Twapwisha ukuwamya iŋanda yonse iyakwa Yawe, pamo pene no bulambo ne fibombelo fyabuko fyonse elyo ne tebulo lyakutantikapo imikate yasangululwa ne fibombelo fyaliko fyonse. ¹⁹ Natusangulula no kupekanya ifibombelo fyonse filya imfumu Ahasi afumishe mu ŋanda yakwa Yawe pakukanaba ne cishinka lintu ali pa bufumu. Fyonse tufibikile pa ntanshi ya bulambo bwakwa Yawe.” ²⁰ Ubushiku ubwakonkelepo ulucelocelo imfumu Hesekia yasenda bacilolo ba mu musumba yaya ingila nabo mu ŋanda yakwa Yawe. ²¹ Baya leta bacilume ba ŋombe cine lubali, basukusuku cine lubali, utwana twa mpaanga utulume nato cine lubali elyo na basawe cine lubali icakufutilako pa fyabubifi fya bufumu, ifya ncende yamushilo elyo ne fya calo cine ica bena Yuda. Imfumu epakupeela icipope kuli bashimapepo aba mu lupwa lwakwa Aroni ukoca shonse inama pa bulambo bwakwa Yawe. ²² Kanshi bashimapepo epakubuula bacilume wa ŋombe babepaya, babuula no mulopa baukana ku bulambo. Kabili babuula basukusuku babepaya, babuula no mulopa baukana ku bulambo, elyo babuula utwana twa mpaanga batwipaya nato babula umulopa watuko baukana ku bulambo. ²³ Elyo baleta basawe abakufuta pa fyabubifi apali imfumu elyo na bantu bonse pakuti babikepo iminwe yabo. ²⁴ Kanshi bashimapepo epakwipaya basawe, babuula no mulopa baushinga ku bulambo ngo mutuulo wa pa cabubifi uwakufutilako abena Israeli bonse, pantu imfumu yalibakonkomeshe ukutuula ilambo lyakoca no mutuulo wakufuta pa fyabubifi ukuti fyonse fibe pa bena Israeli bonse ²⁵ Imfumu Hesekia epakuteka abena Levi mu fifulo fya mu ŋanda yakwa Yawe, nabekata imiwaya, amaseese ne nsango ukulingana nefyo Davidi, Gadi kamona wa mfumu elyo na Natani kasesema bafitantikilemo, umwabelele ifipope fyakwa Yawe ukupitila muli bakasesema. ²⁶ Kanshi ifi efyo abena Levi baiteyenye ninshi bali ne filimba fyakwa Davidi, elyo bashimapepo nabo amapenga. ²⁷ Hesekia epakubakonkomesha ukutuula ilambo lyakoca pa bulambo. Cilyafye bayamba ukutuula ilambo na ba nyimbo shakulumbanya Yawe nabo bayamba ukwimba, balelisha amapenga ne filimba ifyo Davidi imfumu ya bena Israeli apekenye. ²⁸ Ulukuta lonse lwakontama no kwamba ukupepa, ninshi abakwimba baleimba na bakulisha amapenga balelisha. Kanshi uyu musango watwalililefye mpaka umulimo wakutuula ilambo lyakoca wapwililika. ²⁹ Ilyo bapwishafye ukutuula ilambo, imfumu na onse uwasangilwepo bafukama panshi balapepa. ³⁰ Elyo imfumu Hesekia na bacilolo bakwe bakonkomesha abena Levi ukuti bambe ukulumbanya Yawe mu mashiwi Davidi na Asafu kamona balebomfya pakulumbanya. Kanshi bonse epakwamba ukulumbanya ninshi nabasansamuka, bakontamina panshi no kupepa. ³¹ Elyo imfumu Hesekia yaeba abantu aiti, “Ino nshita mwaba abatuulwa kuli Yawe. Eico ambeniko ukuleta imituulo pamo ne yakutotela ku ŋanda yakwa Yawe.” Kanshi ulukuta lonse epakwima no kwamba ukuleta imituulo pamo ne yakutotela, elyo na bonse abali ne mitima yakuitemenwa baletele amalambo yakoca. ³² Ifya malambo yakoca ifyo ulukuta lwaletele kuli Yawe fyali bacilume wa ŋombe amakumi cine lubali , basukusuku umwanda umo elyo no twana twa mpaanga utulume nato imyanda ibili. Shonse shali she lambo lyakocela Yawe. ³³ Inama shonse ishasangulwilwe ku mulimo we lambo lyakoca shafikile iŋombe ishilume imyanda mutanda elyo ne mpaanga ne mbushi shali amakana yatatu. ³⁴ Lelo bashimapepo balicepele nganshi abakuti bafunde inama shonse isha malambo yakoca. Kanshi ecalengele bamunyinabo abena Levi bese babafweko mpaka ilyo bapwisha incito kabili basangulwilapo bambi bashimapepo. Pantu abena Levi bena baposele amano mukuisangulula abene ukucila ifyali bashimapepo. ³⁵ Yalifulile nganshi imituulo ya cakoca, pamo pene na mafuta ya mutuulo wakwampana elyo ne fya mutuulo wa fyakwampana uo baletuulila pamo. Kanshi ifi efyo Iŋanda yakwa Yawe yabweseshiwemo umulimo wakupepelamo. ³⁶ Eico Hesekia na bantu bonse basansamwike nganshi pafyo Yawe acitile pakati ka bantu bakwe, pantu imilimo yonse yabombeke mukwangufyanya.