¹ Ahasi akwete imyaka amakumi yabili ilyo atendeke ukuteeka pa bufumu, kabili aikele pa bufumu mu Yerusalemu pa myaka ikumi limo na mutanda. Lelo tali nga wishi Davidi, pantu ena tacitile ifisuma pa cinso cakwa Yawe. ² Ena atendeke ukwenda mu nshila shimbi isha mu misango ya mfumu sha bena Israeli, elyo apanga no tulubi uto alepepelako imilungu ba Baali. ³ Ayambile ukoca amalambo mu mupokapoka wa Beni Hinomu elyo aoca na bana bakwe mu mulilo nga malambo. Akonkele ukulacita ifyamuselu filya fine fyalecita imishobo ilya Yawe afulumwine pa ntanshi ya bena Israeli. ⁴ Alatuula amalambo no koca ububani mu ncende shakupepelamo imilungu pa mulu wa mpili elyo na pesamba lya cimuti icafumba conse. ⁵ Ifi alecita, efyalengele Yawe Lesa wakwe ukumulekako, amupeela na mu minwe ya mfumu ya ku Aramu. Abena Aramu bamulwisha bamucimfya basendako na bantu bakwe abengi ku Damasiko muli bunkole. Kabili Lesa amupeela mu minwe ya mfumu ya bena Israeli, nabo bamulwisha no kwipaya abantu abengi nganshi. ⁶ Pa mulandu wakuti balisuulile Yawe Lesa wa fikolwe fyabo, calengele nokuti Peka mwana Remaliya epaye abantu 120,000 aba mu Yuda. ⁷ Elyo Sikiri umushilika wa bena Efulemu, aipaya Maaseya umwana wa mfumu, aipaya na Asirikani uwali cilolo mukalamba kwisano, elyo na Elikana uwakonkelepo imfumu. ⁸ Kabili abena Israeli basendamo abanakashi, abana abaume na banakashi aba muli bamunyinabo 200,000, elyo ne fitapwa ifingi bafitwala ku Samaria. ⁹ Nomba mu Samaria mwali kasesema wakwa Yawe ishina lyakwe Odedi, ewaimine mukuya kumanya abashilika ilyo bacili mukubwelelamo ku Samaria. Elyo abeba ati, “Ni pa mulandu wakuti Yawe, Lesa wa bashinwe, alifulilwe abena Yuda eco abapeelele mu minwe yenu. Lelo imwe mwaya cishamo mwaya ipaya abantu ukwabula uluse icakuti na Lesa ku mulu afulwa. ¹⁰ Kabili mulefwaya nomba mubuule abaume na banakashi ba mu Yuda na mu Yerusalemu ukuba abasha benu. Bushe imwe emukuti tamwacitapo ifyabubifi kuli Yawe Lesa wenu? ¹¹ Eico nomba umfweni kuli ine. Bweseshenimo bamunyinenwe aba musendele bunkole, pantu pali ino nshita Yawe namufulilwa nganshi.” ¹² Elyo intungulushi shimo isha bena Efulemu, Asariya mwana Yohanani, Berekiya mwana Meshilemoti, Yehisikiya mwana Shalumu elyo na Amasa mwana Hadilai baiminika bonse abalefuma ku bulwi no kubeba ati, ¹³ “Imwe, tamufwile ukuleta aba bantu musendele bunkole kuno, pantu mwalalenga ukuti tukwate umulandu kuli Yawe! Bushe mulefwaya ukulenga ukuti ububifi bwesu ne fibi fyesu filekulilakofye? Pantu ukufuma ku kale ifwe twaba ne milandu iyikalamba nganshi, elyo na Lesa acili uwafulilwa abena Israeli.” ¹⁴ Kanshi abashilika epakulekako abantu bonse abo basendele bunkole pamo ne fitapwa fyonse ninshi na bacilolo elyo ne bumba lyonse lilemonako. ¹⁵ Palipo abaume abalumbwilwe amashina, ebabuula abantu basendele bunkole no kubabweseshamo. Elyo babuulapo ifyakufwala pa fitapwa bafwika bonse abashafwele. Babapeela ifyakufwala ku mibili elyo ne ndyato sha ku makasa, ifyakulya, ifyakunwa elyo ne miti yakuposeshako amalwele. Babuula bonse abashakwete amaka babaninika pali bapunda. Kanshi epakubatwala ku Yeriko umusumba wa tuncindu ukwali bamunyinabo, eko bafumine pakubwelela ku Samaria. ¹⁶ Cali pa nshita ine ilya elyo imfumu Ahasi yatumine amashiwi ku mfumu ya bena Asiria ayakulomba ubwafwilisho. ¹⁷ Acitile ifi pantu abena Edomu balishile nakabili no kwisa lwisha abena Yuda, basendamo na bantu muli bunkole, ¹⁸ ilyo pa nshita imo ine Abafilisiti baisa sansa imisumba iyali mwisamba lya mpili elyo na mu matololo ya Negebu ya mu Yuda. Elyo bapokolola no kwikalamo mu ncende sha Beti Shemeshi, Aiyaloni na Gederoti, pamo na Soko, Timuna na Gimuso kumo kwine no tumishi utwashingulwike mumbali. ¹⁹ Yawe alefwaya abena Yuda banakile pa mulandu wa fyacitile Ahasi imfumu ya bena Israeli, uwalekoselesha ukubifya mu Yuda, na pakuba uwabula icishinka kuli Yawe. ²⁰ Lelo ilyo Tigilati Pilese imfumu ya bena Asiria aishile, atendeka ukucusha imfumu Ahasi mu cifulo cakuti amwafweko. ²¹ Elyo Ahasi abuula ifintu ifingi nganshi ifyamutengo ukufuma mu ŋanda yakwa Yawe, fimbi ukufuma mu ŋanda ya kwisano elyo na fimbi ukufuma kuli bacilolo, no kufipeela ku mfumu ya ku Asiria, lelo ifi acitile tafyamwafwile nangu panono. ²² Mu nshita ine ilya imfumu Ahasi akwete amafya, emo nao aishile cishamo ukufilwa ukuba uwacishinka kuli Yawe. ²³ Ayambile ukutuula amalambo ku milungu ya ku Damasiko, kulya bamucimfishe ku nkondo, pantu ena atontonkenye ukuti, “Apofye imilungu ya bena Aramu naibafwa ati na ine eko nalatuula amalambo pakuti ingafweko.” Lelo ici acitile ecaishile muletelela no kuletelela Israeli yonse. ²⁴ Kabili Ahasi ayaingila mu ŋanda yakwa Lesa no kusenda ifipe fyonse no kufikomaula mu tupimfya. Elyo aisala ne fiibi fyonse mu ŋanda yakwa Yawe pakuti takuli umuntu nelyo umo uwakwingilamo. ²⁵ Akuula ne fibumbili fya malambo pa cinshoko conse ica musebo wa mu Yerusalemu. Muli cila musumba wa mu Yuda, akuulamo incende shakupepelamo no kufutumwinamo ububani ku milungu imbi, ifintu ifyalengele Yawe Lesa wa fikolwe fyakwe ukukalipa nganshi. ²⁶ Elyo ifintu fimbi ifya pa bufumu bwakwe elyo ne misango yakwe yonse ukufuma pa kutendeka ukufika ku mpela, fyonse fyalembwa mu citabo ca shamfumu sha bena Yuda elyo na bena Israeli. ²⁷ Ilyo Ahasi afwile no kuya lala ukwalala ifikolwe fyakwe, bamushiikile mu musumba wa Yerusalemu, lelo tabamushiikile mu nshinshi baleshikamo imfumu sha bena Israeli. Elyo Hesekia umwana wakwe ewamupyene pa bufumu.