¹ Ilyo ukusefya konse kwapwile, abena Israeli abasangilweko baimine no kuya mu misumba ya bena Yuda baya tobaula inceshi sha mabwe ishakupepelapo elyo batema ne nceshi sha mulungu Ashera. Baonaula ne ncende shakupepelamo isho bacindika pamo pene ne fibumbili fya malambo ifya mu ncende shonse mu Yuda, mu Benjamini, mu Efulemu elyo na Manase. Na panuma yakonaula fyonse, abena Israeli babwelelamo ku misumba yabo ku ncende baleikala. ² Hesekia elyo asalangenye bashimapepo na bena Levi mu mpuka mu mpuka, cila ibumba umwabelele imilimo yabo iyabushimapepo nangu iyabwina Levi, iyakutuula amalambo yakoca na ya mutuulo wakwampana, iyakupyunga, iyakutotela elyo ne ya nyimbo shakulumbanya pa mpongolo sha cifulo cakwa Yawe. ³ Imfumu yapeele ifyabupe ukufuma pa fitekwa fyaiko ifyakutuulilapo amalambo yakoca cila lucelo ne cungulo, elyo ne fya malambo yakoca pa Masabata, pa kutampa kwa mweshi elyo na pa nshikunkulu ishasontwa ngefyo calembwa mu mafunde yakwa Yawe. ⁴ Akonkomesha na bekalacalo ba mu Yerusalemu ukulapeela icakaniko ca bashimapepo na bena Levi pakuti bakabe abakuposa amano mukubaka amafunde yakwa Yawe. ⁵ Cilyafye amashiwi yakonkomeshe imfumu yaishibikwa, abena Israeli babuula ifya fisabo fyantanshi fya cabunga, ifya mwangashi upya, ifya mafuta, ifya buci elyo na fyonse ifya filimwa fya mu mabala bapeela bashimapepo na bena Levi. Elyo baletelapo ne fyapekumi ifingi nganshi. ⁶ Kabili abena Israeli na bena Yuda abaleikala mu misumba ya mu Yuda nabo baleta icapekumi ca pa fitekwa fyabo iŋombe ne mpaanga elyo ne capekumi ca pa fintu fyonse ifyamushilo ifyakutuula kuli Yawe Lesa wabo. Fyonse baisa fitulumanika pamo. ⁷ Ifi fyonse batendeke ukuficita mu mweshi walenga itatu no kupwisha mu mweshi walenga cine lubali. ⁸ Ilyo Hesekia na bacilolo bakwe baishile mona imina ne mina ya fyakulya, balumbenye Yawe, bapaala na bena Israeli abantu bakwe. ⁹ Kabili Hesekia aipusha bashimapepo elyo na bena Levi pa fyakulya asangile nafitulumana. ¹⁰ Elyo Asariya uwali shimapepo mukalamba, uwafumine mu lupwa lwakwa Sadoki ayasuka ati, “Ala ukutulafye apo abantu batendekele ukuleta ifyabupe fyabo ku ŋanda yakwa Yawe, twalikwata bwino nganshi ifyakulya elyo ne fyakusunga, pantu abantu Yawe alibapaala icakuti palaba ne fishalapo.” ¹¹ Hesekia epakukonkomesha abantu ukuti bapekanye amatala mu ŋanda yakwa Yawe, nabo efyo bacita. ¹² Elyo abantu bayamba ukuleta mu cishinka ifyabupe, ifyapekumi ne fyatuulwa kuli Lesa. Uo basontele ukulamona pali ifi fipe ni Konaniya umwina Levi, elyo Shimei munyina ewali nkonkani yakwe. ¹³ Abo imfumu Hesekia pamo na Asariya umukalamba wa mu ŋanda yakwa Lesa asontele ukulalolekesha pa mibombele lintu baletungululwa na Konaniya na Shimei bali ni Yehieli, Asasiya, Nahati, Asaeli, Yerimoti, Yosabadi, Elieli, Isimakiya, Mahati elyo na Benaya. ¹⁴ Kore, umwina Levi mwana Imuna, uwalesunga impongolo ya ku kabanga ewali umukalamba ku baletuula ifyabupe ifyakuitemenwa ifyalepeelwa kuli Lesa. Kabili ewaleyakanya fyonse ifyatuulwa elyo ne fyapeelwe kuli Yawe. ¹⁵ Elyo abalemwafwilisha ne cishinka muli iyi milimo bali ni Edeni, Miniamini, Yeshua, Shemaiya, Amariya elyo na Shekaniya. Ebalefitwala mu misumba monse umwali bashimapepo, na mukwakanyako bashimapepo banabo mu mpuka shabo ku bali abaice elyo na bakalamba. ¹⁶ Kabili balapeelako na baume abali ne myaka itatu nangu ukucilapo ukwabula ukukonka mu ndupwa shabo lelo abaleisa lyonse ku ŋanda yakwa Yawe mukubomba imilimo umwabela impuka shabo. ¹⁷ Kabili balayakanya na ku mabumba ya bashimapepo ukukonka mu ndupwa shabo pamo na ya bena Levi abali ne myaka amakumi yabili nangu ukucilapo umwabelele imilimo ya mu mpuka shabo. ¹⁸ Bonse balilembelwe ukufumafye ku baice, abakashi babo, na bana abaume na banakashi, aba mwibumba lyonse ukukonka mu ndupwa shabo, pantu bali ne cishinka mukuisangulula. ¹⁹ Palwa bashimapepo, aba mu lupwa lwakwa Aroni abaleikala mu ncende sha bulimi ishashingulwike imisumba, kwalisontelwe abantu abakwakanya ifyakulya ku mwaume onse pakati kabo elyo na kuli onse uwalembelwe mu ndupwa sha bena Levi. ²⁰ Ifi efyo Hesekia abombele mu calo conse ica bena Yuda. Acitile ifyawama, ifyalungama ne fyacishinka pa cinso cakwa Yawe Lesa wakwe. ²¹ Kanshi muli conse ico abombele mu milimo ya mu ŋanda yakwa Lesa, elyo na mukukonka ne cumfwila amafunde ne fipope, lyonse aleipusha Lesa wakwe no kubomba ifintu no mutima uwatambalala nokuti apaalwe.