¹ Panuma ilyo ubufumu bwakwa Reoboamu bwakosele elyo akwata na maka ayengi, ena na bena Israeli bonse abo ali nabo basangukila amafunde yakwa Yawe. ² 2Pa mulandu wa bena Israeli ukukanaba ne cishinka kuli Yawe, Shishaki imfumu ya ku Egupto yaisa sansa umusumba wa Yerusalemu mu mwaka walenga isano uwakwa Reoboamu uwakuba pa bufumu. ³ Ali na maceleta ikana limo ne myanda ibili elyo na bashilika ba pali bakabalwe amakana amakumi mutanda. Abantu abo ali nabo ukufuma mu Egupto bali imintapendwa, pali aba ku Libya, aba ku Suki elyo na ba ku Kushi. ⁴ Apoka imisumba iyali na malinga iya mu Yuda kabili aisa fikafye mupepi na Yerusalemu ⁵ Elyo kasesema Shemaiya aisa kuli Reoboamu na ku ntungulushi sha bena Yuda abalongene mu Yerusalemu ilyo batiininine Shishaki, abeba ati, “Ifi efyo Yawe asosa ati, ‘Imwe namunsangukila, na ine nomba nalamulekelako mu minwe yakwa Shishaki.’” ⁶ Intungulushi sha bena Israeli elyo ne mfumu ine baicefya basosa nokuti, “Yawe nalungika.” ⁷ Ilyo Yawe amona ukuti abantu bakwe baicefya, ishiwi lyakwa Yawe lyaisa kuli Shemaiya aliti, “Apo aba bantu baicefya, ine nshabonaule, lelo nalabalubula mukwangufyanyafye. Nshaponye ubukali bwandi pali Yerusalemu ukupitila muli Shishaki. ⁸ Lelo nangu cibe ifi, balaba abasha bakwe, pakuti beshibe ubupusano ubwaba pakutumika ine no bwaba pakutumika ishamfumu sha mu fyalo fimbi.” ⁹ Ilyo Shishaki imfumu ya ku Egupto yasanshile Yerusalemu, yasendele icipao conse ica mu ŋanda yakwa Yawe elyo ne cuma ca mwisano. Yasenda fyonsefye pamo pene ne nkwela sha golide isho Solomoni apangile. ¹⁰ Kanshi imfumu Reoboamu epakupanga inkwela shimbi isha mukuba ishakupyanikishapo, elyo ashipeela ku bakalamba ba bakalinda abali pa ncito yakulinda pa mwinshi wa kwisano. ¹¹ Inshita yonse ilyo imfumu yaya ku ŋanda yakwa Yawe, bakalinda baya nankwe nabasenda inkwela, elyo panuma bashibwesha ku muputule wa bakalinda. ¹² Pa mulandu wakuti Reoboamu aicefya umwine, ubukali bwakwa Yawe bwafumako kuli ena, na Yawe tamonawile. Ne cacine, mwalisangilwe ubusuma mu Yuda. ¹³ Imfumu Reoboamu yakosha bwino ukuteeka kwaiko mu Yerusalemu, yatwalilila no kuba imfumu. Yali ne myaka amakumi yane na umo ilyo yaishile pa bufumu. Yateekele pa myaka ikumi limo na cine lubali mu Yerusalemu, umusumba uo Yawe asalile ukufuma mu nko shonse isha bena Israeli umwakuba ishina lyakwe. Nyina ishina lyakwe ali ni Naama, umwina Amoni. ¹⁴ Acitile ububi pa mulandu wakuti tabikile umutima wakwe kukufwaya Yawe. ¹⁵ Palwa fintu fimbi ifya pa bufumu bwakwa Reoboamu, ukufumafye pa kutendeka ukufikafye na ku mpela, bushe tafyalembwa mu mashiwi yakwa Shemaiya kasesema elyo na mu yakwa Ido kamona ayo ayalondolola pa nkulo? Palikonkenye ukuba ulubuli pakati kakwa Reoboamu elyo na Yeroboamu. ¹⁶ Reoboamu aile lala ukwalala ifikolwe fyakwe kabili bamushiikile mu musumba wakwa Davidi. Elyo Abiya umwana wakwe ewamupyene pa bufumu.