¹ Ilyo Reoboamu afikile mu Yerusalemu, alonganike aba mu ŋanda yakwa Yuda na Benjamini abaume ababulwi 180,000 ukuti balwishe abena Israeli pakuti bapokolole ubufumu bubwelele kuli Reoboamu. ² Lelo kwaisa ishiwi lyakwa Yawe kuli Shemaiya umuntu wakwa Lesa ilyakuti, ³ “aeba Reoboamu mwana Solomoni imfumu ya bena Yuda elyo na ku bena Israeli bonse abekala mu Yuda na muli Benjamini auti, ⁴ ‘Ifi efyo Yawe asosa, wiima ukuya lwisha bamunonko. Bwelelenimo cila muntu ku ŋanda yakwe, pantu uucitile ifi nine.’” Kanshi bonse epakumfwila amashiwi yakwa Yawe bapilibuka ukufuma mukuya lwisha Yeroboamu. ⁵ Reoboamu aikele mu Yerusalemu kabili akuulile imisumba ya malinga mu Yuda. ⁶ Akuulile ku Betelemu, ku Etamu, ku Tekoa ⁷ ku Beti Suri, ku Soko, ku Adulamu, ⁸ ku Gati, ku Maresha, ku Sifi, ⁹ ku Adoraimu, ku Lakishi, ku Aseka, ¹⁰ ku Sora, ku Aiyaloni elyo na ku Hebuloni. Iyi eyali imisumba iyacingililwa mu Yuda na mu Benjamini. ¹¹ Aicingilila na malinga ayakosa, abikamo na bakalamba ba bashilika, abikamo ne fyakulya, amafuta ya miolifa elyo no mwangashi. ¹² Abikamo amafumo ne nkwela mu misumba yonse elyo aikosha nganshi. Kanshi epakuti Yuda na Benjamini fibe fyakwe. ¹³ Bashimapepo na bena Levi aba mu misumba yonse iya mu Israeli bawila kuli ena. ¹⁴ Abena Levi basha ne fitungu fyabo ifyakucemenamo ifitekwa pamo ne fyuma fyabo, baisa ku Yuda elyo na ku Yerusalemu. Bacitile ifi pa mulandu wakuti Yeroboamu elyo na bana bakwe balibafumishepo pali bushimapepo bwakwa Yawe. ¹⁵ Kabili abika bashimapepo bakwe mu ncende shakupepelamo isho bacindika elyo na pa tulubi twa mbushi no tulubi twa twana twa ŋombe uto apangile. ¹⁶ Na bantu aba mu nko shonse isha bena Israeli abapeele imitima yabo mukufwaya icinso cakwa Yawe, Lesa wa bena Israeli, bakonka abena Levi ku Yerusalemu mukuya tuula amalambo kuli Yawe, Lesa wa fikolwe fyabo. ¹⁷ Baya koselesha ubufumu bwakwa Yuda no kwafwa Reoboamu umwana wakwa Solomoni pa myaka itatu, baleendela mu mibeele yakwa Davidi na Solomoni pali iyi nshita. ¹⁸ Reoboamu aupile Mahalati uwali umwana mwanakashi wakwa Yerimoti mwana Davidi. Nyina kwa Mahalati ni Abihaili uwali umwana mwanakashi wakwa Eliabu mwana Yese. ¹⁹ Mahalati afyelemo abana abaume Yeushi, Shemariya elyo na Sahamu. ²⁰ Kabili Reoboamu aupilepo Maaka, umwana mwanakashi wakwa Abusalomu. Muli uyu afyalamo Abiya, Atai, Sisa elyo na Shelomiti. ²¹ Elyo Reoboamu atemwishapo Maaka mwana Abusalomu ukucila pa bakashi bakwe bonse na pa bakashi bakwe abashaupilwe mu bwinga. Akwete abakashi bonse pamo ikumi limo na cine konse konse elyo na bakashi bakwe abashaupilwe mu bwinga amakumi mutanda. Akwete abana abaume amakumi yabili na cine konse konse elyo abana abanakashi amakumi mutanda. ²² Reoboamu asonta Abiya umwana mwaume wakwa Maaka ukuba umukalamba pali bamunyina pakuti akamupeele ubufumu. ²³ Acitile ifintu ifyamano, kabili asalangenye bambi abana bakwe abaume mu misumba yonse iya mu Yuda na mu bena Benjamini elyo na mu misumba yonse iya malinga. Abapeela ne fyakulya ifingi, abafwaila na bakashi abengi.