¹ Kabili Reoboamu aile ku Shekemu, pantu kulya eko abena Israeli bonse baile pakuya mubika pa bufumu. ² Ilyo Yeroboamu mwana Nebati aumfwa ifi ninshi acili mu Egupto, mu calo abutukilemo ilyo afulumwike ukufuma kuli Solomoni. Pakumfwa lyena epakubwela ukufuma ku Egupto. ³ Abena Israeli epakwita Yeroboamu no kuya nankwe kuli Reoboamu no kumweba abati, ⁴ “Wiso abikile ikoli ilyafina pali ifwe, nomba iwe utwangushisheko imibombele yacibe ne koli ilyafina wiso abikile pali ifwe, elyo na ifwe twakulakubombela.” ⁵ Reoboamu abasuka ati, “Mukabwele panuma ya nshiku shitatu.” Abantu bonse babwelelamo. ⁶ Elyo imfumu Reoboamu alandishanya na bakalamba ababombele kuli wishi Solomoni mu nshiku sha bumi bwakwe. Abepusha ati, “Bushe mano nshi mwalampandako ayakwisa asukilamo aba bantu?” ⁷ Nabo bamwasuka abati, “Nga cakuti wakulaba no luse kuli aba bantu elyo no kubasekesha kabili ubapeele ubwasuko ubusuma, lyena inshita yonse bali nokuba ababomfi bobe.” ⁸ Lelo Reoboamu akaana amano abakalamba bamupandileko elyo aya ipusha amano ukufuma ku baice banankwe abo akulile nabo pamo kabili abalemubombela. ⁹ Abepusha ati, “Bushe muletipo shani? Bushe aba bantu kuti twabasuka finshi abalelanda kuli ine abati, ‘Wangusheko ikoli wiso abikile pali ifwe?’” ¹⁰ Abalumendo abo akulile nabo pamo bamwasuka abati, “Abo bantu abakwebele ukuti, ‘Wiso abikile ikoli ilyafina pali ifwe, lelo iwe utwangushisheko ikoli,’ ubebe ukuti, ‘Umunwe wandi uunono untu waina ukucila umusana wa batata. ¹¹ Tata abikile pali imwe ikoli ilyafina, lelo ine ndi nokucishapo. Tata alemuma ku fikoti, nomba ine nakulamumina kuli bakaliŋongo.’” ¹² Panuma ya nshiku shitatu Yeroboamu pamo na bantu bonse baisa kuli Reoboamu, ngefyo imfumu yabebele aiti, “Mukabwele kuli ine panuma ya nshiku shitatu.” ¹³ Imfumu yabasuka bukali bukali, yakaana na mano yamupandile abakalamba. ¹⁴ Abasuka ukulingana na mano abalumendo bamupandile. Pakubasuka abeba ati, “Tata abikile ikoli ilyafina pali imwe, lelo ine ndi nokucishapo. Tata alemuma ku fikoti, lelo ine nakulamumina kuli bakaliŋongo.” ¹⁵ Kanshi imfumu yakaana ukumfwila abantu pantu ukucitika kwa ifi fyonse kwafumine kuli Yawe, pakufikilisha ishiwi lyakwa Yawe ilyalandilwe kuli Yeroboamu mwana Nebati ukupitila muli Ahiya umwina Shiloni. ¹⁶ Ilyofye abena Israeli bamona ukuti imfumu yakaana ukuti ibomfwile, bonse bayasuka imfumu abati, “Bushe cakaniko nshi tukwete muli Davidi, bushe ciputulwa nshi mu mwana wakwa Yese? Bweleleni ku matenti yenu mwe bena Israeli, na iwe we Davidi sakamana iŋanda yobe.” Kanshi abena Israeli bonse epakubwelelamo kumyabo. ¹⁷ Lelo ku bena Israeli abaleikala mu misumba ya mu Yuda, bena bashala baleteekwa na Reoboamu. ¹⁸ Elyo imfumu Reoboamu yatuma Adoniramu uwali umukalamba pa milimo ya mulaasa, lelo abena Israeli bamupola amabwe mpaka afwa. Nomba imfumu Reoboamu yena yaendesha ukunina mwiceleta, yafulumukila na ku Yerusalemu. ¹⁹ Kanshi ifi efyo abena Israeli baba abasangukila iŋanda yakwa Davidi ukufika na ku bushiku bwa lelo.