¹ Mu mwaka walenga ikumi limo na cine konse konse uwakwa Yeroboamu ukuba pa bufumu, Abiya ewaishile ba imfumu ya bena Yuda. ² Kabili ateekele pa myaka itatu mu Yerusalemu. Nyina ishina lyakwe ali ni Maaka, umwana mwanakashi wakwa Urieli uwa ku Gibea. Pali ubulwi pakati kakwa Abiya na Yeroboamu. ³ Abiya aingila mu bulwi na bashilika 400,000 iya baume abaishiba ukulwa, elyo Yeroboamu ena aingilamo mu nkondo na bashilika 800,000 iya baishiba ukulwa. ⁴ Elyo Abiya aiminina pa lupili lwa Semaraimu, mu calo ca mpili icakwa Efulemu, asosa ati, “Iwe Yeroboamu pamo na bena Israeli bonse kutikeni kuli ine. ⁵ Bushe tamwaishiba ukuti Yawe Lesa wa bena Israeli apeela ubufumu bwa bena Israeli kuli Davidi na bana bakwe abaume mu cipangano ca pe ica mucele? ⁶ Nomba Yeroboamu mwana Nebati, uwalifye umubomfi wakwa Solomoni mwana Davidi, ewaima no kusangukila shikulu wakwe. ⁷ Lelo abantu bamo abacabecabe kabili abawelewele bawila kuli ena ilyo acili umwaice uwabula kampingu, bamutunka ukukaanina Reoboamu ninshi takwete na maka yakubakaanina. ⁸ Ukufika na nomba mucili mulefwaya ukutalamina ubufumu bwakwa Yawe ubo abika mu maboko ya ba mu lupwa lwakwa Davidi. Cacine muli umulongo uukalamba nganshi uwa bashilika elyo kabili muli no tulubi utwa golide uto Yeroboamu apanga ukuba imilungu yenu. ⁹ Lelo bushe tamwatamfyamo bashimapepo bakwa Yawe, abana baume bakwa Aroni na bena Levi, elyo no kuipangila bashimapepo abenu ngefyo abantu aba mu fyalo fimbi bacita? Mucita onse uwaisa ne ciponti ca ŋombe icilume na basukusuku cine lubali mukutuula kuli bashimapepo, mulamupeela bushimapepo bwa ishili imilungu. ¹⁰ Lelo ifwe, Yawe e Lesa wesu, kabili tatwamusangukila. Bashimapepo ababombela Yawe bana abaume abakwa Aroni, elyo na bena Levi ebabatumika. ¹¹ Cila kacelo ne cungulo balatuula amalambo yakoca elyo no bubani bwa cena cisuma kuli Yawe. Balatantika imikate petebulo ilyasanguluka no kusanika ifisaniko ifyaba pa cakutekapo ifisaniko ica golide cila cungulo. Ifwe tukonka ubufwayo bwakwa Yawe Lesa wesu lelo imwe mwalimusangukila. ¹² Lesa ali na ifwe kabili e ntungulushi yesu. Bashimapepo bakwe abali na mapenga yabo ebalapunda umusowa wakuti tumulwishe. Mwe baume ba mu Israeli, mwiima mukulwisha Yawe, Lesa wa fikolwe fyenu pantu tamwashuke.” ¹³ Lelo Yeroboamu ali ninshi natuma abashilika bamo ku numa yabo abakubabelamina pakuti abasanshile kunuma lintu ena alemonekela ku ntanshi ya bena Yuda. ¹⁴ Nomba abena Yuda bapilibuka bamona nokuti abalwani bali kunuma elyo na kuntanshi. Elyo bakuuta kuli Yawe. Bashimapepo balisha na mapenga yabo, ¹⁵ na baume abena Yuda bapunda umusowa wa bulwi. Cilya umusowa wa bulwi waumfwika, Lesa akanda Yeroboamu elyo na bena Israeli bonse pa ntanshi yakwa Abiya na bena Yuda. ¹⁶ Abena Israeli bafulumuka ukufuma kuli Yuda, lelo Lesa abapeela mu minwe yabo. ¹⁷ Abiya na bantu bakwe baonaula nganshi abalwani babo, icakuti baipaya impendwa ya bena Israeli abacenjela kukulwa 500,000. ¹⁸ Ifi efyo abena Israeli babacimfishe pali ilya nshita, na bena Yuda bacimfishe pa mulandu wakuti basubile muli Yawe, Lesa wa fikolwe fyabo ¹⁹ Abiya akonka Yeroboamu panuma no kuya mupoka imisumba ya Betele, Yeshana elyo na Efuloni pamo pene ne mishi iyashingulwike mumbali. ²⁰ Yeroboamu tatalile abwekeshapo ukukwata amaka mu nshiku shakwa Abiya. Kabili Yawe amukanda, nao afwa. ²¹ Lelo Abiya ena alundapo ukukosa. Aupa abakashi ikumi limo na bane, akwata na bana abaume amakumi yabili na babili elyo abana abanakashi ikumi limo na mutanda. ²² Palwa fintu fimbi ifya pa bufumu bwakwa Abiya, ifyo acitile elyo nefyo asosele, fyalilembwa mu mashiwi yalondolwele kasesema Ido.