¹ Yezu aka hólá momolo e wátò, aka etá ndólé, pe etsi hóli momolo e lohia lwaibó. ² Sikanè baka mo tolélá mitó omoyi anò été bunéa bilóngó pe engáli likóló li yèlika baka túsésá ndúfaka likóló li mòtòndò u mbèlè ènè été yáláká yè pe baka mo isélésá. Bo èni boinóli bo aibó, Yezu aka békêlá ahò mitó o yebòsònò'', ''Mona o olómé, póta bilóngó, basúmú bahò baka limbésána''. ³ Sikanè, ndámbo e bakómi ba mébékó baka bekáná katsi e ibó, '' Ano mitó e sékáká Mongalima''. ⁴ Yezu été lémbéláká bakanési baibó pe aka békêlá bô, ''Po e mbi ekanésá onú bakanési bebitsi momolo e météma me ainó? ⁵ Po inè mbi i pótsi, bobéki, ''Basúmu bahò baka limbésana'', to bo béki, ''emála likóló pe yéla?'' ⁶ Kasi inè ikoki onú bolimbéli ainè Mona olómé o Mitó ébayi la bokúmi likóló li mbú po e bolimbési basúmú,...'' aka békêlá mitó o yebòsònò'', '' Émálá, silá yèlika ye aho, pe kiaka a mbèlè elahò''. ⁷ Sikanè ahò mitó aka émálá pe aka silá yèlika ye ahè aka kiá a mbèlè elahè. ⁸ Anè aka èná baitó kóyó, baka kamwa pe baka kumésá Mongalima, anò été aesá lo kinda e bokúmi ngi baitó. ⁹ Kunè été étáká Yezu kèlè-kèlè e ahò, aka èná mitó omoyi etòmi Matayo eyali isikáni i bo endési mpáko. Aka mo békêlá,''Bilé ngò'', Aka emala pe aka mo bila. ¹⁰ Kunè été yáláká Yezu momolo e mbèlè po e bolei linzi ba éndési mpáko pe basúmuki baka lwa pe baka lia la yè isakani imoyi la bayekoli bahè, ¹¹ Anè aka litá ba Falizeo kóyó, baka békélá bayekoli bahè,'' Po e mbi elia Motéyi o inó la ba éndési mpáko pe la basúmuk isikani imoyi?'' ¹² Anè aka okòká Yezu yô, aka béka, ''Baitó banè betsi bayi la botáti momolo e bilóngó betsi bayi la kamò e fánzi, sókó banè bebayi la botáti. ¹³ Esèngèli la inó bokeyi pe boyekóli inè ikoki la bolimbolani: ''Ngo lebayi la kamò e bolimbési pe tá tè po e libonza. Po inè Ngò nzi luyi po e bo étaki banè bebayi sémbo po inè baléngé, kasi basúmuki''. ¹⁴ Sikanè bayekoli ba Yoani baka lwá nguahè pe baka béka, ''Po e mbi osú pe la Falizeo mbala boféla tokilá bima, kasi bayekoli bahò betsi kilá bima?'' ¹⁵ Yezu aka békélá bô, ''Isèngèli la moháli o liéngéló anò etsi wéli molóme boyáli la yéngóndá bénins yebayi matúke o mbèlè la bô? Kasi baosé be okolua banè etsi oko yálá matuke o mbèlè la ibo, pe be oko kila.'' ¹⁶ Só mitó omoyi etsi koki bobambi túlú e faifai la túlú e kálá, po inè túlú e faifai e koki bo aháki túlú e kálá, pe bosònani botsi oko yálá wali. ¹⁷ Sókóyó baitó betsi kóki bo isi pòmbò momolo e nziko ènè eka umoa. La baka kélá kóyó, nziko ekóki bo ahákani, pòmbò i oko utéana. Kasi, bokóki bo isi pòmbò e faifai momolo e nziko e faifai,pe iko kengama''. ¹⁸ Tángó été yáláká Yezu bobéki bô bahoyi, Sikanè, kúmú omoyi aka lua pe aka imbáná féló elahè. Aka béka, ''Yéongá yehá aka wâ saka sika-Sikanè, kasi lua po bo mo tandeli lifinzi liahò likóló liahè, pe e oko uma'' ¹⁹ Sikanè Yezu aka émálá pe aka mo bila, pe bayekoli bahè baka kélá kóyó. ²⁰ Pe, lita, moháli omoyi anò etáti botsusési ngéló bilánga láabo a iyélé, pe aka tálá suka e túlú e lahè. ²¹ Zambi été ya békéláká la ngá kóká sókó botáli túlú e lahè le oko uma. ²² Kasi Yezu aka léngá, pe bo mo èni yè aka mo békélá: ''Yéongá yehá, sila ngòlu, bo inóli bo ahò boka mo umesa. Pe aho mona owáli aka uma sókó emoli ngonga. ²³ Anè aka yakoesia Yezu a mbèlè e kúmú, aka èná ba ofi tófili pe yétólé ye baitó, ²⁴ aka békélá bô: ''Bo okowé ahò zambi lifòku li mona owáli etsi wei kasi e éngali ilòhò''. Kasi bô bété yáláká bo mo ohòli tòla. ²⁵ Anè aka tswæ mòlòkò u baitó yehóló, aka hólá momolo e mbèlè, pe aka silá lifindji li lifòku li mona owáli pe lifoku li mona owáli aka émálá. ²⁶ Mbóli ika tsangáná móki ngia. ²⁷ Kunè été étáká Yesu kèlè-kèlè aelo, baitó ba baofa baélé baka mo ônga la bosúmbi méhuyi: ''To okela osú bowaowa mona o Dawidi''. ²⁸ Anè eka tswa ye a mbèlè, baitó ba baofa baka ya filá nguahè, pe Yezu aka békélá bô: ''Bo inóli ainè le koki bokéli yò?'' Baka inésa,''Eiyee, Kóló''. ²⁹ Sikanè aka tálá bô baisó, la bobéki: ''Ikélame la onú ènè ndenge e bo inóli bo inó''. ³⁰ Pe baisó ba ibó baka umoa. Yezu aka aesa bô unè bo lòngi bopótsi: ''Bokélé kéngé kéngé mitó atsi lémbélé''. ³¹ Kasi botsuyi bwa ibó, baka tsáká mbóli iyahè moki ngia. ³² Anè été kiaká bô baofa baélé, lita baka tolélá Yezu mitó o molimo-mbé u yebúbú yemoyi. ³³ Anè eka sésámá yô molimo-mbé, yebúbú aka póma. Pe mòlòkò u baitó baka kamwa baka béka: ''Enè ndenge itsi té enánáka momolo e Isalayele''. ³⁴ Kasi bafalisayo be bekána: ''Ibayi la ndólé e kúmi u molimo-mbé nga i sésá yè myo mélimo-mbe''. ³⁵ Yezu aka yélá a hia ikòlòngi pe a hia ikèkèli ngia, boháni momolo e synagoga, botsáki mbóli i ítani i bokumi pe e umésá botatsi koitu pe bibòsònò. ³⁶ Bo eni mòlòkò u baitó aka okòká bowaowa po e ibó, po bdté yáláká la bo hèni pe bolèmbi bilóngó, ainè kòndòlò i lúmbi mosènzèli. ³⁷ Sikanè aka békélá bayekoli ba ahè: ''Bobúni mélóná boyali bokòlòngi kasi basáli bekèkèli. ³⁸ Lònga la kúmi e lohia botómi basáli bo búni''.