¹ Mbusè e bo étaki bayekoli bahè lââbo la baélé, aka aesá bô ngulu e botsáki melimo- mbé, pe la bo umési botatsi ngia pe bikèta ngia. ² Lita ba lina ba bapostolo lââbò la baélé, o féló, Simoni e étakémi Piele, pe Andele, monginéna owahè; mona o Zebedia, pe Yoane, monginéna owahè. ³ Filipo, pe Batelemi; Toma, pe Matayo, mitó o bo éndési mpáko, Yakobo, mona o Alfea, pe Tade; ⁴ Simoni mo Kananita; pe Yudasi mo Iskaliota, anò été támbáká Yezu. ⁵ Banè nga bebayi ba lââbo la baélé Banè bété tómáká Yezu, mbusè e bo aesi bô metsindo mènè: ''Só kia ngi bapakano, pe só hólá momolo e bingumba bi ba Samalia; ⁶ Kiaka nga múkú u kondolo inè ité únga i mbèlè e Isalayele; ⁷ Kiaka, sákólá pe béka: ''Kèka e Likól ebai kwawé''. ⁸ Umésá botatsi, sékwésá ba wei, pe pétóla botatsi bo mbálá, tsáká melimo mbé-mbé. Bo ukóli bokúndá, aesá bokúndá. ⁹ Só silá ata wóló, ata pálátá, ata basámbó, pe la méliki me mépótó me ainó; ¹⁰ Atá liwówó po e lokèndo, atá túlú iyélé, atá bibòlòkò, atá lingénda, po inè mosáli ekóki la yema ye ahè i boleyi''. ¹¹ La yemoyi yengumba to lohia lo ka hólá onú, bo uhólé amba mitó omoyi o lokundo ekoki boyálesi onú; pe yálá nguahè té anè e okokia onú. ¹² La boka hólá a mbèlè, aesa lô mbèlè okalo, ¹³ pe la mbèlè ebayi a bo ohòli bafáya mina bohaî bo inó bolwe la lô mbèlè; kasi la etsi bayi la bo inóli bafáya mina bohaî bwa inó bo ulé nguainó. ¹⁴ Kunè po banè betsi oko inóla onú pe betsi oko okòká baohi bainó, tsua a lô mbèlè tó yô yengumba pe fúfóla mékélé me ainó. ¹⁵ Le békélá onú ko sòlò mwásá u yesámbési mo6ki u Sodoma la Gomolo utsi oko sámbésámá ombé la bo emaéli ainé yô yengumba. ¹⁶ Lita nga tómá onú ainè ba kòndòlò momolo e mbú ekòlòngake. Bo lowaélé ainè fêlé, pe boya isési ainè bibénga. ¹⁷ Boya kéngési po e baitó! Po inè be oko fáká onú a ba tsimilao pe be oko ófá onú fimbo a Sinagoga ya ibó. ¹⁸ Bo oko tómámá po ela féló e baKúmi ba bitúká pe féló e baKúmi ba lohia ainè bo aesi yélémbo po e ibó pe po e ba bapakano. ¹⁹ Kasi tángó ènè eko fáká bô onú, só yatungésiá inè iyá e oko béká oyè atá kunè e oko póma oyè; inè i oko béká oyè i oko mo aesámélá ko émoli ngonga. ²⁰ Po inè tá oyè oko béka, Molimo u Atò nga e oko béka momolo elahò. ²¹ Monginéna e oko fáká monginéna a bowô, pe isé la mona o ahè; bana be ko emaélá baboti baibó, pe bo ólaki bô. ²² Betsi okokúndá onú bô kuatu, po e lina lilà; po inè anò e okonngá motéma tée ko suka e oko uma. ²³ Anè e oko nyokòlá bô onú momolo e lô lohia lofuláku; tsila a losiáká lohia. Nga békélá onú ko sòlò, onú botsi okofwélésá bahia ngia i isalayele ko sókó la mona o mitó a kalwa. ²⁴ Moyekoli etsi étéli molakisi; atá baitó ba mosála bo étéli kóló. ²⁵ I koki la bayekoli bakélé bô ainè molakesi o ibó, pe baitó ba mosála ainè kóló o ibó. La baka étáká anò molakisi u mbèlè Belzebul, mbala yénga ekoki bô bo étaki a ingina baitó ba mbèlè e lahè! ²⁶ Bo si bángé yéma; po inè yéma ye itámi i tsibayi inè yènè ye oko lémbéláná mbusè, pe yéma ye itámi yetsi yáli po bolémbéláni. ²⁷ Inè i békéli ngò onú a ndjima, békéla bô yéléko ye mwásá pe po inè i békéli bo onú a litoyi; bosákolé likóló li mbèlè. ²⁸ Botsi bángé anò e oko ôláká bilóngó pe etsi oko ôláká molimo, bobángé kahe anò ekoki bo ôlaki molimo pe bilóngó momolo e liféló. ²⁹ Só támbá nòli iyélé po e lomeyá? Só emoyi etsi okokwá a mbú tá inè Atò o inó a lémbélé.. ³⁰ Kasi simi ko ngwélé i métó me ainó kwitu ibayi la motángó. ³¹ Só bángá yéma: onú bo étéli simi ko boféla bo nòli. ³² Sókóyó, mitó ngia anò e oko tátólé ngò fèló e baitó, ngò pe le oko mo tátólá féló e Ahá owa anò e yáli a likóló; ³³ Anò e oko fété ngò féló e baitó; ngò pe le oko mo fétá féló e Ahá owa anò e yáli a likóló. ³⁴ Só súmésá ainè ngò le luwi po bo isi haî likóló li mbú ndji yáli po bo e bo lwési haî, kasi nga mopángá. ³⁵ Po inè ngò le luwi po e bo isi bo fákáni momolo e mona o olómé la isé owahè, momolo e mona owáli la inéna owahè, momolo e moháli o mona la inéna o bobili; ³⁶ Pe mitó e oko ukólá banguna baitó ba mbèlè e lahè matúke. ³⁷ Anò e kundji isé owahè, simi ko inéna owahè bo étéli ngò etsi kundji ngò, pe anò e okokundá mona owahè o olóme simi ko la owáli bo étéli ngò etsi kundji ngò; ³⁸ Anò etsi okosilá yekulusu ye ahè, pe etsi bili ngò, etsi kundji ngò. ³⁹ Anò e oko lowaélá po e bo umi bo ahè e oko ungesa, pe anò eko ungésá bo umi bo ahè po ela e oko ukóla. ⁴⁰ Anò e oko nángélá onú aka nángélé, pe anò e oko nángélé ngò e oko nángélá pe anò e tómi ngò. ⁴¹ Anò e oko nángélá polofeta po inè ébayi polofeta e oko ukólá mbáno e polofeta, pe anò e konángélá mitó o sémbo ainè mitóo o sémbo e oko ukólá mbáno e mitó o sémbo. ⁴² Pe mitó ngia e oko aesá sáka kòpo emoyi e bayé ba fiyò ngi omoyi okè-okè po e tsina inè ébayi moyekoli owá, nga békélá onú sòlò, etsi oko ungésá mbáno e lahè.