¹ Anè aka fwélésá Yezu bo aesi mébékó me ahè ngi bayekoli bahè lââbo la baélé, aka okowá ahò, po boháni pe bosákoli momolo i hia ikòlòngi bi móki. ² Yoane aka okòká bobékéli momolo e mbèlè elahè e linga mesálá me Klisito, aka mo békélá la ndólé e bayekoli bahè, ³ Oyè obayi anò e oko lwa tó tokóki bokóngi osiáká? ⁴ Yezu aka inésélá bô: ''Boke bo békélé la Yoane inè i okòki onú pe i èni onú: ⁵ Ba bofa be èna, bi bòsònò bi yélá, baitó ba mbala be pétwama, ba lôkô be okòká, ba wei be sékwa, pe liohi li itáni lika lémbélásáná ngi ba bqtúndákè. ⁶ Anangéláné anò etsi oko yálélé ngò libia li bokwèsámi!'' ⁷ Kunè été kiáká bô, Yezu aka bándá bobékéli mòlòkò u baitó na tsina e Yoane: mbi ikei onú boka litsi a londuhu lolimbi mété? likókó li nóngési yéfófó? ⁸ Kasi mbi ikei onú boka litsi? mitó omoyi etóli túlú i lokúmu? Ena, banè betóli túlú i lokúmu be yálákólá a mbèlè e bokúmi ⁹ Mbi ikei onú penza bo kaliti? Polofeta emoyi? Eiyee, le békélá onú, pe bo étéli polofeta? ¹⁰ Zambi yè ébayi anò ité kománá: ''lita, nga tómá mosúmba-mbóli uwa féló e bosio bo ahò, Po e bokéngi ndólé felo elahò''. ¹¹ Le békél onú la bosòlò, momolo e banè be otámi la baháli ité tswáka bo étéli likóló ainè Yoane Mobatisi. Bôngô anè e kèkèli bo eti momolo e bokúmu bo likóló e kòlòngi bo étéli yè. ¹² Ko yéléko ye Yoane Mobatesi téé kwa sikanè bokúmi bo likóló bohélánési, pe ibayi baitó ba bikákali nga be púnzá yô. ¹³ Po ainè bapolofeta pe mobéko boté sákóláná téé kwa Yoane. ¹⁴ pe la bokundji bosòsòli yô anè ébayi Elia anò été kókáká la bo luwi. ¹⁵ Anò ébayi la batoyi po e bo okòki a okòkè. ¹⁶ La ndá ekóki ngò bo ulanési la yènè yélénga? Ye uláni la bana beyáli la bisikáni bi yewóló pe banè be békéli la bana basiáká, ¹⁷ pe be béka: ''Osú toka ófá lifili pe onú botsi hóyi; osú to ka hambà bahámbò mbé, pe onú botsi angohi''. ¹⁸ Po inè Yoane été lwà, só boleyi ifoé só bo noyi fino, pe bô be béka: ''Ebayi la molimo mbé''. ¹⁹ Mona o olómé aka lwa e lia tofoé pe e nwa fino pe be béka: ''Yè ébayi moleyi pe mo noyi, mwinina o baitó mbé pe ba baitó be bitsi bo umákè!'' Kasi bo ômélake boka engèsámá la mesálá me ahè. ²⁰ Mbusè aka bándá bosémési hia ikòlòngi inè ité kéláná bakamwisi bahè pe binè bitsi té léngáma. ²¹ Bowaowa bo ahò Kolazini, bowaowa bo ahò Betesaida! Po inè la bikamwisi binè bité kéláná momolo e inó ité kélámáká a Tyr pe la Sidon, bô boféla bété léngésámáka, la bótóli ngòtò pe la múhutú. ²² Po émoli le békélá onú a mwásá unè u bosámbési Tyr pe Sidon betsi oko kélá bô matâtâ boféla kunè onú. ²³ Pe oyè, Capernaum, okanesi ainè oko lilámá téé ko likóló? Téé oko iséla téé la bohéni bo lòkò: Po inè, la bikamwisi binè bité kélámáká momolo elahò, bité kélámáká a Sodon imba yáláká aitútá bonôombe. ²⁴ Tsina émoli le békélá onú: ''A mwásá u bo sámbésámi, móki u Sodon mo tsi oko sámbésámá makasi kunè oyè''. ²⁵ A émoli yéléko, Yezu aka silá liohi pe aka béka: ''Nga mo kumésá, Aha, Kóló o likóló pe e mbú la kindá e súsi oyè yô mbékó u bo ômélakè po e baitó ba mayèlè, pe oka ènèsá la bana bakèèkè. ²⁶ Eiyee, Ahá, le mo kumési ènè ndéngé e kundéli oyè kóyó. ²⁷ Bima koitu bi aesaméli la Ahá, pe atá mitó etsi lémbéli Mona tè, la etsi bayi Ahá, atá mit6o etsi lémbélá Ahá, la etsi bayi Mona pe anò e kundji Mona bo mo èngèsi. ²⁸ Bo lwé ngua, onú baitó be héni pe beyali a méliko pe le oko aesá onú bo hôômi. ²⁹ Tóla lumbé lohá likóló li ainó pe bo okòkè mébékó méhá, zambi le bayi háyi pe isélési i motéma pe bo oko ukólá bo hôômi bo mélimo me ainó. ³⁰ Zambi lumbé lohá lobayi hai pe moliko ohá mofáfwani.