¹ A yô yéléko Yezu aka kia mwásá u sabato múkú u yehua ye mété me húma, Bayekoli bahè baka okòká sémbá pe baka bándá bobúni húma pe bolei yô. ² Anè aka èná Bafalizeo bô, baka békélá Yezu, ''Lita, bayekoli bahò bebúná mobeko u bosali mwásá u Sabato''. ³ Kasi Yezu aka békélá bô, ''Botsi tángi inè ité kéláká Dawidi anè été okòká yè sémbá? ⁴ Etê hóláká momolo e mbèlè e Mongalima pe été liáká bima bi mabónza, binè bifétésáni la mobéko po elahè po e banè bété yáláká lahè, kasi ikundésáni sáká ngi basáli ba Mongalima. ⁵ Botsi tángi momolo e mobéko po e Sabato kunè e buná basáli ba Mongalima molémbó u Sabato momolo e tepelo kasi betsi kwesa la likita? ⁶ Kasi ngò le békélá onú ainè omoyi anò e étéli tepelo ébayi anè. ⁷ La oyè o lémbéli inè i limbóli inè, ''Le kundji bo lòngi bo limbési pe la bo aesi mabónza, itsi kóki bo kwèsi mitó a lilóngá. ⁸ Po inè Mona o Mitó ébayi Kúmi e Sabato''. ⁹ Sikanè aka tswá wô múkú pe aka hôla momolo e Sinagoga. ¹⁰ Lita, ité biáká ahò mitó omoyi anò été biáká la lifinzi li yebòsònò. BaFalizeo baka uhánésá Yezu, bobéki,'' I aesáni ndingisa e bo umési mitó mwásá u Sabato?'' Bété uhóláká kóyó po bo mo pèlèki yè. ¹¹ Yezu aka inésélá bô: ''Ndá momolo e inó la e iki sókó kòndòlò emoyi, pe la lô kòndòlò eka kwá momolo e liána mwásá u Sabato, etsi kóki bo túsési lò kòndòlò aelo a liána? ¹² Endei kindá ébayi mitó la loúnú bo étéli kòndòlò! Ko lô kindá ébayi yô la ndingisa e bo umési mitó mwásá u Sabato''. ¹³ Yezu aka békélá ahò mitó, '' Nánóla lifinzi li ahò'', Aka nánólá lio, pe lifinzi lika nánóláma, ainè lifinzi linè lisiáká. ¹⁴ Kasi bafalizeo baka kia pe ba okòkáná po inè ba mo ôlákè. ¹⁵ Kunè été kéláká Yezu yô, aka okowá ahò. Boféla bo baitó baka mo bila, pe e umésá botati ngia. ¹⁶ Aka fétésá bô po ainè batsi mo lémbéli la baitó basiáká. ¹⁷ Téé ko anè eko yálá yô sôlò, inè ité bekáná la Izaya Mosákoli, été béka, ¹⁸ Bo lité, mosáli uwa anò été minólé ngò, lokúndo lohá, ngu ahè molimo uwa ubayi la yénángá. Le oko isá motéma uwa ngu ahè, pe e oko sákólá bosémbo a méki. ¹⁹ Etsi oko isá mongá etsi oko sumbá méhuyi, Pe tá mitó omoyi etsi okòká mohéhé uwahè momolo e ndólé i lohia. ²⁰ Etsi oko buná lokèli lònè lo bunáni, Etsi oko limáká mwènzi unè utongani, téé ko anè e oko kélá yè bosémbó. ²¹ Pe méki ngia me oko yálá la yelikia kwa lina li ahè. ²² Sikanè baka mo tólélá mitó omoyi o ébayi la mélimo mbé ebúbú pe bofá, pe aka mo umésa, la loléngé loté enáná ainè aka bándá bo pómi pe bo èni. ²³ Linzi baitó baka yálá la bokamwi, baka békáná: ''Anò etsi bayi Móngó o Dawidi?'' ²⁴ Kasi anè aka okòká BaFalizeo lyò likamwiséli, baka béka, '' Anò mitó etsi kóká bosési mélimo me tzapulu la etsi bayi Belzebul, kúmi e mélimo me tzapulu''. ²⁵ Kasi Yezu bolémbéli bakanési baibó pe aka béka, ''Bokúmi ngia bofákáni momolo eyô ikéláná bobé, pe lohia ngia tô mbèlè ènè efákáni momolo itsi kóki la boyéli wáli''. ²⁶ La Satana etúsésá mélimo me Satana, e fákáná yè matúke. Endey kinda ekóki bokúmi boyéli wáli''? ²⁷ Pe la Ngò le sésá mélimo me tzapulu la lokúlú lo Belzebul, ko a ndá e sésá baéngá bainò mélimo? Po e lô tsina be oko sámbésá onú. ²⁸ Kasi la Ngò le sésá mélimo me tzapulu la lokúlú lo Molimo u Mongalima, ahò bokúmi bo Mongalima boka lwá féló einó. ²⁹ Endei kindá ekóki bo hóli mitó momolo e mbèlè e mitó o lokúlú pe bo lúhóli la lokúlú bima biahè, la etsi nangi féló la ngándá manginè o mbèlè? ³⁰ Anò etsi bayi la ngò ébayi mongúna uwá, pe anò etsi nángémi la ngò e fakáni la ngò. ³¹ Sókóyó le békélá onú basúmú ngia pe la botúki i oko limbésána, kasi botúki Molimo Santu itsi oko limbésána. ³² Anò ngia e béká liohi lio bobé po e Molimo Santu, itsi oko limbésána po elahè, simi ko yéléko ye yènè mwanó simi po e inè okòki boluyi. ³³ Ona moté u wáli pe i oko tswá húma i wáli, tô óna moté u mbé i oko tswá húma i mbé, po inè moté u lémbélánáká la húma iyahè ³⁴ Onú liótá li limaté, kunè ébayi onú mbékó mbé, endei kindá ekóki onú bobéki yéma ye wáli? Po inè binè bi póma monwa ibayi binè boliáli momolo e motéma. ³⁵ Mitó o motéma wáli e túsésá binè bi wáli bibayi momolo e motéma u wahè bi wáli, pe mitó o molimo u bitsi motéma etusésá mbékó mbé inè bayi momolo e lahè. ³⁶ Le békála onú ainè yéléko ye mwásá u bisámbi baitó be oko endá banè bahoyi ngia bité béka bô. ³⁷ Po inè kwa bahoyi ba inó bo oko sámbésáná pe kwa bahoyi ba inó bo okokwá la mosámbo''. ³⁸ Sikanè ndámbo e bakómi ba mébékó pe la bafalizeo baka inésélá Yezu pe baka béka: ''Moteyi, to kundji bo èni yélémbó ngwahò''. ³⁹ Kasi Yezu aka inésélá bô pe aka békélá bô, ''Yélómbó ye basúmuki pe ye baitó ba boséka. ye pááná yélémbó. Kasi yélémbó yetsi oko aesánélá bô bo okofési sókó yélémbó ye Profeta Jonasi. ⁴⁰ Po inè kunè été yáláká Jonasi momolo e sòlò e swé, sókóyó e oko yala Mona o mitó baosé basáso pe botsio isáso momolo e mbú. ⁴¹ Baitó ba Ninive be oko umésá ná la bisámbisi la baitó ba yènè yélómbó be oko kwésá bô la mosámbo. Po inè bété léngésáná la bosákóli bo Jonasi, pe lita, mitó omoyi anò e étéli Jonasi ébayi anè. ⁴² Moháli o bokúmi u móki u séésé e oko emálá la bisambisi la banè baitó ba yènè yélómbó pe e oko filingá bô la mosámbo. E oko lwá múkú u túngi mwanó momolo e moháli yékómba ye Salomo, pe lita, anò e étéli Salomo ébayi anè. ⁴³ Anè e oko tswá molimo mbé momolo e mitó, e oko étá múkú u isikáni i óméli bayé e oko páalá isikáni i bo yáli ahò, kasi la etsi oko ukoli yôo. ⁴⁴ Sikane e oko béka, '' Le ule mbusè isikáni i mbèlè ela múkú uté lwé ngò''. Bok á léngi, e oko hèná lô mbèlè bokálé pe itsi bayi la bonángémi. ⁴⁵ Sikanè, e oko kia pe aka sile mélimo mbé mésiáká mbai-twélé a lwé la yô ahò po e boyáli ahò. Sikanè bo umákè bo ahò mitô i oko bitá bo étéli kunè été yáláká yè féló. I oko yálá ko lô kindá po e yènè yélénga ye bapakano.'' ⁴⁶ Tángó été biáká Yezu bo békéli mòlòkò u baitó, lita, inéna la banginéna baka émálá yéhóló, be pááná bo sólóli lahè. ⁴⁷ Mitó omoyi aka lwá bo mo békéli inè, ''Lita, anohè la banganòhè be émali yéhóló, pe bepáli bo sólóli lahò''. ⁴⁸ Kasi Yezu aka mo inéséla pe aka mo békéla, ''Nda ébayi imá pe ba nda bebayi Bangwáyá?'' ⁴⁹ Sikanè aka kásólá lifinzi li ahè ngi bayekoli bahè pe aka béka, ''Lita, imá pe la Bangwáyá bebayi anè! ⁵⁰ Po inè anò ngia e kélá ènè kindá e kundji Ahá anò ébayi a likóló, ahò mitó ébayi móngóayá, pe mosékwayá, pe imá''.