¹ Wô mwásá Yezu aka ongowá a lô mbèlè pe baka yálá kèlè-kèlè e libangé li mokwa. ² Boféla bokòlòngi bo baitó baka mo linga, sikanè aka lilá momolo e bwatò pe aka yálá ahò até yéléko yémoli baitó be émali kèlè-kèlè e mbóngó e libangé. ³ Sikanè Yezu aka békélá bô baohi Boféla la bikwè. Aka béka, ''Mitó omoyi été kiáká bo hôni mélóná. ⁴ Kunè été biáká yè bohôni, ndámbo i mélóná ika kwá a ndólé pe nòli ika lwa pe ika konakólá yô. ⁵ Mesiáká mélóná meka kwá likóló li bamúkéli, ènè etsi lindji mbú. Mbala emoyi meka ola po inè mbú itsi té linda. ⁶ Kasi anè eka tswá mwásá, meka hiákana po inè metsi té biáká la mésilè séésé, pe méka wá. ⁷ Mesiáká mélóná méka kwá isikáni i biingi bi sòi. Biingi bi sòi bika ôla pe méka lika yô. ⁸ Mesiáká méka kwá likóló li mbú i wáli pe méka túsésá mbótó i wáli, memoyi mbótó i túsési húma mokámá úmoyi, memoyi métúkú mbalèmoyi, pe Mesiáká métúkú mesásò. ⁹ Anò ébayi la batóyi , a okòkè''. ¹⁰ Bayekoli baka lwa pe baka uhánésá Yezu, ''Po e mbi i békélá oyè baitó sáka la bikwè?.'' ¹¹ Yezu aka inésa pe aka békélá bô, ''Onú bobayi la libia li bo lémbéli binè bibayi la bo itámi bi bokúmi bo likóló, kasi bô betsi kóki bolémbéli yô. ¹² Po inè anò e ukóli boféla, pe e oko silá linzi bo étéli. Kasi anò ngia etsi aesánéli só yéma, simi ko ébayi la pèèni be oko mo luhólá yô. ¹³ Ibayi po e mbi i békélé Ngò bô la bikwè: ''Simi ko be èni, betsi èná só yéma; pe simi ko be okòká, betsi okòká só yéma, tô bo tòngòli. ¹⁴ Po e ibó lisákóli li Polofeta Izaya lité kokisana, inè i béka: ''Yéléko ye inó yè bo èni bo lité, kasi onú bo tsi sòsòli''. ¹⁵ Po e banè baitó météma me aibó meka léngá bamúkéli. pe bebayi la bopótákè bó bo okòki, pe benángi baisó baibó, po besti kóki bo èni la baisó baibó, tô bo okòki la batóyi baibó, tô bo tòngòli la météma me aibó, kóyó o betsi yáléngésá aitútá, pe Ngò le oko umésá bô.'' ¹⁶ Kasi i hámbólánè ibayi baisó ba inó, po inè bi èná; pe batóyi bainó po inè bi okòká. ¹⁷ Ko sòlò le békélá onú ainè ba polofeta boféla pe la baitó ba bosémbo Boféla bebayi la kamò e bo èni bima binè bi èná onú pe betsi èná yô. Bebayi la kamò e bo okòki bima binè bi okòká onú pe betsi té okòká yô. ¹⁸ Bo okòkè kahe yèkwè yé mitó anò e ôna mélóná me ahè. ¹⁹ Anè anò été okòká liohi li bokúmi bo likóló kasi etsi tòngòli yô, pe mopakano e okòka pe e filingá yéhóló yé motéma uwahè. Yô ibayi mélóná mènè me filingáni momolo e ndólé. ²⁰ Inè ibayi mélóná mènè me likóló li mbú e bamúkéli ibayi mitó anò aka okòká liohi pe mbala emoyi aka inóla la yenángá, ²¹ metsi té biáká la mésilè momolo e lahè pe i oko yálá po e yéléko yekèkèli. Anè eka tswá menyokoli tô mekakatano me baohi, kwa isángá a kwèsanè. ²² Mbi ibayi mélóná momolo e biingi bi sòi, ibayi mitó anò aka okòká liohi, kasi enángémi la bima bi mwánó pe la libia lika mo tswélá katsi e lilóba, pe a yáléngési. ²³ Mélóna mènè mété hólá momolo e mbú i wali, ibayi mitó anò e okòki lilóba pe aka tòngòla yô. E óhóta mbótó pe i túsésá mbótó emoyi e túsésá húma mokámá umoi, úmoyi osiáká u túsésá húma métúkú mbálèmoyi, usiáká métúkú mesásò bo étéli kunè été hóná yè''. ²⁴ Yezu aka ènèsá bô yèkwè yesiáká. Aka béka, ''Bokúmi bo likóló bo úláni la mitó anò aka hôná mbótó i wali momolo e yehua ye ahè. ²⁵ Kasi yéléko ye éngáli baitó, mongúná uwahè aka lwa pe aka hôná mbótó ibitsi momolo e mélóná me wali pe akakia. ²⁶ Anè eká ôla mélóná pe meka túsésá húma, mélóná me bitsi pe me katswa. ²⁷ Basáli ba matúkè o yehwa baka mo uhánésa, ''Kúmi otsi té hônáká mélóná me wali momolo e yehua, kohé elwéli mélóná me bitsi? ²⁸ Aka uléséla bô, ''I bayi mongúná uwá mitó aka kélá kóyó''. Pe basáli baka mo békéla, ''Okundji ainè tokè bo hômòli yô?'' ²⁹ Matúkè o yehwa aka béka, ''Tá kóyó, Po inè yéléko ye oko hômòlá onú yô, bo mbá hômòlá pe mélóná me wali la yô. ³⁰ Bo miné yô ngia i ôlé isikaáni imoyi téé yéléko ye bobúni húma. Yéléko ye bobúni le oko békélá basáli, ''Boténé fèló mélóná mebitsi pe bonángè bibóló po e bo hâmbáki yô, pe le oko békélá la basáli banángè binè bi wali pe basúsé momolo e mbèlè''. ³¹ Sikanè Yezu aka békélá bô yèkwè yésiáká, Aka béká: ''Bokúmi bó likóló bo uláni la lòngènè lo lisótá lònè lo silá pe lo utáká mitó momolo e yéhwa ye ahe. ³² Lô lòngènè lo bayi lokèkèli momolo e mélóná ngia. Kasi anè e ólá lyô, li oko ólá likóló bo étéli mélóná me yéhwa, ye oko léngá mótê, téé banoli i lohôlá i fúké likumbó likóló li bitáhè bi ahe,'' ³³ Yezu aka békélá bô yèkwè yésiáká. ''Bokúmi bo likóló bo uláni ainè moháli anò e utáká mayi pèèni e múhútú u bosélénganési mapa pe e fúlénganésá la mimékanò mésásò me limungèlè li motèkè téé ko anè e oko fúlá yô''. ³⁴ Bio bakita ngia bi békélá Yezu mòlòkò u baito la bikwè; pe etsi békélá bô so likita sókó la bikwè ³⁵ Yô ité biáká kóyó èngèbènè la inè ité békánáká la monwá u ba polofeta po inè iléngé sémbó, anè e béká yè: ''Le oko uwólá monwá uwa sókó la bikwè. Le oko béká bahôyi banè be itámi téé ko yébandéli yé mwanó''. ³⁶ Sikanè Yezu aka okowá múkú u mòlòkò u baitó pe aka hôlá momolo e mbèlè. Bayékóli bahè baka ya filá kèlè kèlè elahè pe baka béká: ''Tolimbóléla yèkwè yé mélóná me bitsi momolo e yéhwa''. ³⁷ Yezu aka inésélá bô: ''Anò ebayi mólóná uwali ibayi Móngó o Mitó. ³⁸ Yéhwa yébayi mwanó; pe mbótó i wáli ibayi bana ba bokúmi. Mélóná me bitsi mebayi bana ba satana, ³⁹ pe mongúná anò été hôná mélóná me bitsi nde satana. Boténi mélóná ibayi suka e mwanó, pe baténi mboto bebayi ba anzelu.'' ⁴⁰ Nzokandé, kunè e homolà bô mboto ibitsi pe inángánésá bô po e bo hámbákémi momolo e yóhé, i oko yálá kóyó yélékó yé suka e yèkèkè ⁴¹ Móngó o Mitó e oko tómá ba anzelu bahè, pe be oko okofésá momolo e bokumi bo ahè bakita ngia ba bosámbó pe banè bebúná basumu. ⁴² Be oko filingá bô momolo e liànà li yóhé litsi limánakóla, anè e súmbá bô méhúyi pe be amátá báinó. ⁴³ Pe baitó ba bosémbó be oko ngèngá ainè mwásá momolo e bokumi bo Isé o ibó. Anò ebai la batóyi , a òkòkè''. ⁴⁴ Bokumi bó likóló bo uláni aitútá la bomèngo bonè bo itámi momolo e yehwa. Mitó omoyi aka ukólá yô pe aka susa. Katsi e yenángá, aka támbá bima ngia binè bité biáká yè la byò, pe ako kólá yô yehwa. ⁴⁵ Ko aitútá, bokumi bo likóló bo uláni la mitó o molunga anò e páána bayáká be itáni wáli. ⁴⁶ Aka ukólá liyáká limoyi li motúyá boféla, aka támbá bima bi ahè ngia bi félo, pe aka kólá lyò. ⁴⁷ Bokumi bo likóló bo uláni aitútá la monyámá unè u filingi bô momolo e libangé pe lika nàngà swé loléngé la loléngé. ⁴⁸ Anè eka liálá lyò, balòbi baka tusésá lyô pe mbusè e boyáli mbóngó e libangé be isá swé i wâli momolo e bisàkà pe inè itsi bayi wáli be filingá yô momolo e libangé. ⁴⁹ I oko yálá sókóyó yélékó ye suka e mwanó. Banzelu be oko lwá bofákánési baitó ba mbékó wâli la baitó ba mbékó mbé, ⁵⁰ pe be oko filingá bô momolo e liànà li yóhé lipóti, anè iko yálá biléli la bo yámátáki báino. ⁵¹ Boká tòngòlá bô bahôyi? Eei yéh, été mo inésélá bô. ⁵² Pe aka békélá bô: ''Ibayi po e mbi, mokomi u mobékó ngia anò ebayi la bayèlè e litá bokumi bo likóló bo uláni la matúkè o mbèlè anò e tusésá momolo e bomèngò bo ahè bakita ba fai-fai la bakita ba féló momolo e bomèngò bo ahè.'' ⁵³ Sikanè anè éká fwésá bopómi byò bikwè, aka okóhá ahò. ⁵⁴ Ane été káléngá Yezu múkú u móki uwahè, aka bandá boháni momolo e sinagoga, la lolénge té banè bété biaká bo mo okòki bété biáká la bokámwi pe be békáná: ''Kohé e ukólá yè bô bwèli pe byò bikamwisi? ⁵⁵ Anò etsi bayi móngó o mokábindá, itsi bayi Maria inéná owahè, Yakobo, Yozefu, Simo pe Yude, betsi bayi banginéná? ⁵⁶ pe basékinéná betsi bayi bô ngia momolo e isó? Kohé eluyi bô bakita ngia? ⁵⁷ Pe yè été yáláká po e ibo libyá po e bokwèsèni. Kasi Yezu aka békélá bô: ''Polofeta betsi mo kundákólá momolo e móki uwahè pe momolo e mbèlè elahè''. ⁵⁸ Pe etsi kéli só likamwisi limoyi momolo e yô isikáni, po e tsina e bolúmbi bo bo inóli bo aibó.