¹ Katsi e yoo yeleko, Herode mito Tetarke aka okoka bopomeli po e Yezu Kilisito. ² Aka bekela basali bahe, '' Aho ebai Yohani Mobatesi; aka sekwa momolo e lokoo. Tsina emoli e bai yee nde ekela momolo e lahe''. ³ Po ine Herode, été mbwesaka Yoane, aka monanga pe aka mo filinga momolo e mbele e lingà, po e tsina e Herodiasi, mohali o Filipo, monginena. ⁴ po ine Yoane été mo bekelaká ine: ''Itsi aesaneli oye ndingesa e bo sili Herodiasi a liengelo''. ⁵ Herode été kundaka bo mo ôlaki, kasi été biaká la bobangi baito, po ine baito bete lembelaká ine Yoani ebai Profeta. ⁶ Kasi ane eka yatswa yendagelo ye liose li bo ôtami bo Herode, yeonga ye Herodiasi aka hôwa felo elahe pe e baito bété yalaka aho, aka nangela mingi, ⁷ la kinda ene aka sakela la bolayi ndayi bo mo aesi ine ngia i oko kundá yee. ⁸ Mbuse e bahano ba inena, aka beka: ''Aesi ngo ane, likolo li saani, mótó u Yoani Mobatesi''. ⁹ Kumi aka yala la bowaowa; kasi po e baito bane bété yalaka a yendangelo, aka aesa motindo u bo mo aesi, ¹⁰ pe aka toma ine batènè Yoani mótó momolo e mbele e linga ¹¹ Baka tola mótó uwahe likolo li saani, pe baka aesa lifoku li mona o wáli, pe yee aka aesa inena. ¹² Bayekoli ba Yoani baka lwa bosili bilongo bi ahe, pe baka mo táha. Baka kia bo bekeli Yezu. ¹³ Ane aka okoká yô mbôli, Yezu aka lila a watò po e bo okoyi aho, po e bokei múkú u isikani i yeliki; pe molokô u baito bo lembeli koyo baka okoa aho pe baka mo bila aelo la mekélé. ¹⁴ Ane aka isela yee a watò, aka ena molokò u baito, pe aka oko kela bô bowaowa, pe aka umesa batati. ¹⁵ Ane eka ya kwesa likose, bayekoli baka ya fila nguahe pe baka beka: ''Inè isikani ibai yeliki, pe tango eka éta, ulesà baito múkú u lohia po ine baka kole bima bi bolei po eibo''. ¹⁶ Yezu aka bekela bô: '' Itsi bai la bolongi bo ulesi bô. Bo aesi bô bima bi bolei onu matukè'. ¹⁷ Baka mo bekela: '' Tóbai saka la bamápa hôomoi pe la swe iyele''. ¹⁸ Aka bekela bô: ''Bo lwe la yô''. ¹⁹ Yezu aka aesa motindo ngi baito bayale likolo li biingi, aka sila bamápa hôomoi pe swe iyélé, pe, bokasoli baiso múkú u likolo, aka ulesa lokumu. Mbuse aka búna-búna bamápa pe aka aesa bayekoli, baka fakelà baito. ²⁰ Bô ngia baka lia pe baka liála, pe baka kongola bisâkà làabo la iyélé bi bitsikà bi mápa. ²¹ Bane bété liakà bio bima bété yalaká kele-kele e balóme kônto hôomoi so botangi bahali la banúkú. ²² Mbuse mbalà emoi, aka aesa motindo ngi bayekoli bo lili momolo e wato pe bake felo elahe mbálé e mbôngo, yeleko yene ye ulesa yee baito. ²³ Ane aka ulesà yee baito, aka lilá likolo li itsikôló po e bosambeli yesika, pe kune ité ilàkà likose été biakà yee matuke. ²⁴ Wato uté biakà aláa até o libange liyelanesi la mbóngé e fófó ye potsi. ²⁵ Ngonga e mekeleka e likosé, Yezu aka kia múkú waibo, e yeli likolo li libange. ²⁶ Ane aka enà Bapostolo Yezu, baka banga pe baka beka: '' Ibai molimo!'' Pe katsi e bobangi bo aibo baka bándá bosumbi mehuyi. ²⁷ Mbala emoi Yezu aka bekela bô, ''Botsi bange, ibai ngo aho! ²⁸ Petelo aka mo inesela:'' La ibai oye, Kumi, aesa motindo aine ngo pe le lwe múkú uwaho pe le yele likolo li libange''. ²⁹ Pe Yezu aka mo bekela: ''Lwa!'' Petro aka tswa a wato pe aka yela likolo li baye, po e bokei múkú u Yezu. ³⁰ Kasi, bo eni ine yefófó yété biaká bopotake, aka banga, pe, kune ete biaká yee bolindji momolo e libange, aka sumbá mehuyi: ''Kumi, umesi ngo!'' ³¹ Mbala emoi, Yezu aka kananola lifinzi, pe aka mo mbwa, pe aka mo bekela: ''Mito o boyambi bokekeli, po e mbi été isa oye mongá?'' ³² Baka lilá bô baélé momolo e wato, pe yefófó ye ka ona têé. ³³ Bane bété yalaká momolo e wato, baka lwa pe baka himbanà baluyi felo e Yezu, pe baka beka: ''Oye o bai ko solo Móngó o Mongalima.'' ³⁴ Mbuse e botenesi libange, bakakia múkú u moki u Genezarete. ³⁵ Baito ba yô isikani, bolembeli Yezu, baka tomá mesumba-mboli múkú u kele kele e lôo lohia, baka mo tolelá baito ngia bane bété biaká la botati. ³⁶ Baka mo ondela ine akundesi bô saka botali yelingi ye túlú yelahe, pe bane ngia bété tálà túlú elahe baka uma.