¹ Anè aka isélá Yezu a itsikóló, linzi li baitó baka mo ônga, ² Sikanè, mitó etati mbálá aka lwá nguahè pe aka imbáná féló elahè, bobéki, '' Kúmi, la i mo kundési oyè, okóki bo pétóli ngò''. ³ Yezu aka kásólá lifinzi liahè pe aka béka, '' Le nángéli, pétóláma''. Mbala emoyi yè aka úmá la botati bo mbálá. ⁴ Yezu aka mo békéla, '' Litá otsi békélé mitó so yéma yémoyi. Sila ndólé, ya èngèsá ngi basáli ba Mongalima, pe aesá libónza linè lité aesáká Moize motindo, po ainè liyále yélémbó po e ibó''. ⁵ Anè eya kaléngá Yezu momolo e Kafarnaunu, kúmi emoyi e basola ba moki u Roma aka lwá nguahè, aka mo ondèla ⁶ pe aka béka, ''Kumi, mosáli uwá ewá la botati bo yebòsònò'' ⁷ Yezu aka mo békéla, ''Le oko lwa pe le oko mo umésá, ⁸ Kúmi e basólá ba Roma aka mo inésélá pe aka béka, ''Kúmi, ngo nzi koki la bo inóli ainè oyè ohólé momolo e mbèlè ela, La onángéli, béka sókó liohi limoyi pe mosáli uwá e oko uma''. ⁹ Po inè ngo pe lebayi mitó anò e aesá baitó métindo, pe lebayi la basólá séésé ela, La ngá békélá anò omoyi, ''Kiáka'', pe akè, pe la omoyi osiáká,''Lwa'', pe alwé, pe la mosali uwá, ''Kéla kunè,'' pe akélé kóyó''. ¹⁰ Anè aka okòká Yezu kóyó, aka kámwa pe aka békêlá bò baitó banè bété mo ôngaka, ''Ko sòolò le békêlá onú, nzi ukóli so mitó omoyi anò ébayi la bo inóli ainè anò mitó momolo e Israyele kwitu''. ¹¹ Le békélá onú, boféla be oko lwá múkú u monyèlè pe la múkú u engálá mwásá, pe be oko yálá la meza isikáni imoyi la Abalayama, Izaka, pe la Yakobo, momolo e bokúmi bo likóló. ¹² Kasi baéngá ba bokúmi be oko filingáná momolo e isikáni i nzima, aelo i oko yálá biléli la bo mátámi báino''. ¹³ Yezu aka békêlá Kúmi e basólá ba Roma, ''Kiáka! kunè ébayi oyè la boinóli, mina ainè i mo kélánélé oyè kóyó''. Pe mosáli uwahè aka uma ko lô tángó. ¹⁴ Anè aka hóla Yezu momolo e mbèlè e Petelo, aka èná inéna o bobili owahè e engáli po e botati bo mòsású, ¹⁵ Yezu aka mo tala la lifinzi liahe, pe mósású uka mo fwéla. Mbala emoyi aka émálá pe aka bándá bo aesi bô bima. ¹⁶ Anè ekatswá likòsé, baitó baka tolélá Yezu boféla bo baitó banè bebayi la mélimo mbé-mbé me tzapulu. Aka sésá mio mélimo sókó la bapómi pe e umésá banè ngia bété tâta. ¹⁷ Kwa lò kindá ité kokisana kunè été békáká mósákoli Izaya, bobéki,'' Yè matúkè e oko silá batâti baisó pe e oko okofésá bikèta bi aisó. ¹⁸ Sikanè anè aka èná Yezu linzi li baitó kèlè-kèlè elahè, aka aesá motindo bo okóyi yô isikáni pe bokei mbálé e libangé li Galilea. ¹⁹ Sikanè mokómi úmoyi u mébékó aka lwá nguahè pe aka mo békêlá, '' Moháni, Le kundji bo mo bili oyè isikáni ngia inè ikia oyè. ²⁰ Yezu aka mo békêla: ''Kambala ébayi la isikáni i bo engáli, pe nòli i likóló ibayi la lihúmbu, kasi Móngó o Mitó etsi bayi só la isikáni imoyi i bo engáli. ²¹ Osiáká omoyi u bayékoli aka mo békêlá yè, ''Kumi, aesi ngò ainò ndingésa e bokei po e botáhi Aha''. ²² Kasi Yezu aka mo békêla, ''Bilé ngò, pe mina banè bewei batáhè ba wei baibó''. ²³ Anè aka hólá Yezu momolo e wátò, bayekoli bahè baka mo bilá momolo e yô. ²⁴ Litá, ika kwa yefófó ye ekúmbáki yefúlákú momolo e libangé li mokwa, sikanè bayé baka hólá momolo e wátò. Kasi Yezu été engáláka. ²⁵ Bayekoli baka lwá nguahè pe baka mo umakèsa, la bobéki, ''To umésá, Kóló; tokakia bowei!'' ²⁶ Yezu aka békêlá bô, ''Po e mbi i ingilima onú, onú baitó ba boinóli bokèkèli?'' Sikanè aka émálá pe aka angólélá yefófó ye ekúmbáki pe kola libangé li mokwa. Sikanè ikabia hai.' ²⁷ Mbusè baitó baka yálá la bokamwi pe baka békana, ''Endei kindá e bayi anò mitó, simi ko bifófó bi mo okòkèlá yè?'' ²⁸ Ane aka yakwesa Yezu mbálé e libangé pe múkú u môki u Gadarenesi, baitó baélé banè bebayi la mélimo mbé momolo eibó baka kuláná la yè. Bété tswáká momolo e lombétó pe bété yáláká la yékàkáli yepótsi, la kinda inè so mitó omoyi itsi tékókáká bo eti wô múkú. ²⁹ Baka emala, baka súmbá mehúyi pe baka béka, ''Mbi ibayi osú la oyè, Móngó o Mongalima? Oka lwá anè po e bonyòkòli osú féló e yéléko ye bohóomi?'' ³⁰ Sikanè molénga u ndéhe i lohia ité biáká boleyi ahò, só yesika yènè yeté biáká bô. ³¹ Mélimo mbé meka bándá bo ondèli Yezu pe baka béka, ''La oka sésá osú momolo, to tóma osú momolo e molénga u ndéhe''. ³² Yezu aka békêlá bô, ''Boke!'' Mélimo mbé meka tswa pe meka kia momolo e ndéhe''; pe lita, molénga u ndéhe'' ngia moka filingáná múkú u itsikóló pe ika filingáná momolo e libangé. ³³ Baitó banè bété yáláká la bokengeli yô ndéhe'' bakakia a lohia pe baka tángóléla baitó yô ngia, bo étéli mpenza inè ika tswélá baitó bane bété yáláká la mélimo mbé. ³⁴ Lita, lohia koitu baka lwa bo kuláni la Yezu. Anè eka mo èná bô yè, baka mo ondèla ainè a okohé momolo e yétúká ye môki waibó.