¹ Botsi ya lefólé la bokélá yéma ye bosémbó félo e baitó, po inè bo enane, la tá kóyó, botsi oko ukólá lifutsi ngi Atò o inó anò ebayi a likóló. ² La oká kélá lifáko, so ôfá moyèpè félo elahò, ko unè e kélá baitò be lúmbi bosémbó momolo e ba Sinagoga pe a mélóló, po e boyáli la lokúmo ngi baitó. Le békélá onú ko sòlò, be oko ukólá lifutsi lyaibó. ³ Kasi tango e aesá oyè lifáko, tá ainè likàlò li liháli li lémbélé inè i kélá li lilómé, ⁴ Tsina ainè lifáko li ahò li kélámè la bo itámi; pe Atò o ahò ano e èná a bo itákè, eko mo inésélá lyò lifáko. ⁵ La o sámbéla, só yálá ainè baitó bé lúmbi bosémbó, banè be kundji bosámbéli bo émali likóló li ba Sinagoga pe a bitúmú bi mélóló, po inè ba ènánè ngi baitó. Le békélá onú ko sòlò, be oko ukólá lifútsi li aibó. ⁶ Kasi tango e sámbélá oyè, hóla a yefindji ye mbèlè ye ahò, nángá mobáliyá u ahò pe sámbéla Atò owahò anò ebahi aelo a isikáni i bo itámi; pe Atò owahò, anò momolo e bo itámi, e oko mo inésélá oyè mbáno. ⁷ La bosámbéla, só fúlésia bahoyi belúmbi tsina, ainè bapakano, banè bekánési ainè la baka túsésá bahoyi boféla be oko inóláma. ⁸ Só yálá ainè bò; po inè Atò o inó e lémbéli yéma mbi yebayi onú la kamo félo inè bo mo uhólé yè. ⁹ Lita kahé iyá ekóki onú bosámbéli: ''Isé o isó anò ebayi a lôôla! Lina li ahò li yále Mosanto, ¹⁰ Bokúmi bo ahò bo lwé; Mokáno u wahò u kélámé anè séésé ainè a lôôla. ¹¹ To aesa osú bonôômbé bima bi boleyi mwásá la mwásá, ¹² Tolimbèsá osú mbékó mbé ya isó, kunè e limbésá osú banè bété tokélá osú mbékó mbé! ¹³ Só to kwesá a yèmèkèlo ye mbé-mbé, kasi to umésá a bakita ba mbé-mbé, po inè, kwa ngwuahò nga e bayi, a bikeke la bikeke, Bokúmi, Lokúlú pe Nkémbó. Iyale ko ôyô! ko ôyô!'' ¹⁴ La oka limbésá baitó mbékó mbé-mbé yaibò, Atò o inó o lôôla e oko limbésá onú lokola. ¹⁵ Kasi la oyè otsi limbési baitó Atò o inò etsi oko limbésá aisiáká mbékó mbé-mbé yainó. ¹⁶ La oká kilá bima só yálá la bowaowa ainè baitó be lúmbi bosémbó banè be ènèsá bo bowaowa po bo ènèsi la baitò ainè bekili bima. Le békélá onú ko sòlò, be oko ukólá lifútsi li aibò. ¹⁷ Kasi tango ènè e kilá oyè bima, púlá púmbá a môtô pe sò ènèsá bosio bowaowa, ¹⁸ po inè otsi ènèsi ngi baitó ainè o kili bima, kasi ngi Atò o inó anò eyäli aelo a isikáne i bo itámi, pe Atò o ahò anò e èná momolo e bo itámi, e oko mo inéséla. ¹⁹ Só súsá bomèngo momolo e mbú, isikani inè i lia mokáló la mèkèsè mènè me féngésa, aelo baitó ba bwiba be twélésa pe be iba. ²⁰ kasi ndé bo súsé bomèngo bo inó likóló aelo etsi féngésá mèkèsè pe mékáló, aelo pe betsi twèlèsá po ba ibé. ²¹ Po ainè isikani ibayi nkita i ahò, isikani imoli i oko yálá motéma uwahò. ²² Lisó li bayi mwènzi u bilóngó, la lisó li ahò libayi wáli, bilóngó ngia bi oko biá la bongèngi. ²³ La lisó li ahò libayi la loléngé e mbé, bilóngó bi ahò ngia bi oko yálá ndjima, la bongèngi bonè bobayi ngwahò boka kwá ndjima, yéénga ye oko yálá la ndjima e fúlákú. ²⁴ Atá mitó etsi koki bo sáléli bakúmi baélé po inè e oko kúnda omoyi pe e oko fétá osiáká. Otsi koki bosáléli Mongalima pe tzapulu. ²⁵ Po inè ngá békélá onú: ''Botsi bángé likita li bo umákè bo ainó kunè mbi yo i okolè ngò pe i oko nwé ngò, atá likita li bilóngó bi ainó, mbi i oko tólé ngò, bo umákè botsi étéli bima, pe bilóngó bitsi étéli túlú? ²⁶ Lita nòli i likóló: betsi ona pe betsi téna bihua, pe betsi bayi la bisúséli bi bima; pe Aha o inò o likóló e leyisá bô. Onú botsi étéli bô? ²⁷ Ndá o inó la bo bángi bo ahè, pe ekoki bobákési motúndúlú u bo umákè bo bo umi bo ahè? ²⁸ Pe likita li mbi li bángá onú po e túlú? Lita ainò kinda e ôlá lòsò momolo e bihua: ''Betsi kélá mosálá pe betsi kélá ményámá. ²⁹ Nzoka ndé le mo békélá ainè simi ko Salomoni katsi e nkémbó e bokúmi bo ahè etsi te tóláká túlú ainè omoyi o ibó. ³⁰ La Mongalima e tólésá biingi bi bihua, binè bi bayi bonôômbé pe fiifi binè bi oko filingáná a liana, mbi itsi kóki yè bo tólési onú, onú baitó ba boinóli bokèkèli? ³¹ Só tungisámá ni, pe so béká kunè: ''Mbi i oko liá osú? mbi i oko nwá osú? a mbi i oko tólá osú túlú?'' ³² Po inè bima byo kwitu, ibahi bapakano nga páánakola. Atò o inò anò o Likóló e oko aesá onú binè bibayi onú la kamò. ³³ Kasi bopáánè ainò félo kèka pe e bosembo bo Mongalima, pe byo bima ngia bi oko aesánélá onú séésé. ³⁴ Sókóyó, só túngisámá po bosuéli po inè bosuéli eko silá bakita bahè manginè. Mwásá ngia ekokisa likita li ahò.