¹ Anè aka tswá Yezu a loyé aka kia momolo e yeliki la bokámbámi bo Molimo po ainè ba mo mèkè la tzápúlú. ² Anè aka étésá yè baosé métúkú mèkèlèka pe la botsió métúkú mèkèlèka so boleyi yéma, aka okòká sèmbá. ³ Momèki tzápúlú aka lwa pe aka mo békélá yè: ''La obayi Mona o Mongalima, aesà motsindó la banè bamúkéli ainè báléngé mápá''. ⁴ Kasi Yezu aka mo inéséla: ''Itsi kománi ainè, mitó etsi kóki bo umi sókó po e mápá, kasi la bahoyi ngia banè bé tswá la mohéhé u Mongalima''. ⁵ Sikane tzapulu aka mo sila pe aka mo lilésá likóló li linòngi li tempéló, ⁶ pe aka mo békéla: ''La obayi Mona o Mongalima, yá filinga séésé, po inè ité kómáná ainè: 'E oko aesá motsindó ngi banzelu bo mo téki oyè'', ''pe be oko tándólá bafinzi baibó, po inè otsi bunéhé lilúyi''. ⁷ Yezu aka mo békélá yè: ''Ikomani ko aitútá ainè otsi koki bomèki Mongalima uwahò''. ⁸ Ko aitútá, tzapulu aka mo sila pe aka lilá lahè likóló li itsikóló isóndámi pe aka mo èngèsá bomèngò pe la bokúmi ngia bo mwánó ko la nkémbó yaibó. ⁹ Aka mo békélá yè: ''Binè bima ko la bonè bomèngò ngia le oko aesá oyè, la oka imbánélé ngò'' ¹⁰ Kasi Yezu aka mo békéla: ''Okówá kèlè kèlè elá, Satana! Po inè ité kománá ko ainè: ''Okóki sókó bo imbánéli Kúmi Mongalima uwahò pe okóki sókó bo mo nkémbéli yè matúkè''. ¹¹ Sikanè tzapulu aka mo mina, pe banzelu baka lwá bo mo kémbéli. ¹² Sikanè anè eká okoka Yezu aine baka nángá Yoani a linga, aka úlá momolo e Galilea, ¹³ Aka okówá múkú u Nazarete pe aka kiá boká yáli katsi e Kafarnaun, ènè ebayi kèlè kèlè e libangé li mokwa li Galilea momolo e móki u Zebulo pe Naftali. ¹⁴ Yo ika kélámá po e bokókési inè ité békáná la polofeta Izaya, ¹⁵ Móki u Zebulon pe moki u Naftali, kèlè kèlè e libangé li mokwa, Galilea isikani i yénángá. ¹⁶ Baitó banè beyáli momolo e nzima baka èná bongèngi bofúlákú, pe banè betsikáli momolo e imoli isikani pe ena lòkô, likóló li aibó bongèngi bolila'' ¹⁷ Kwá yémoli yénina Yezu aka bándá botéyi baito pe bobèki: ''Boléngési métémá me ainó po ainè bokúmi bo likóló boká kwá kwawé. ¹⁸ Kunè été biáká yè boyéli keèlè kèlè e libangé li mokwa li Galilea, aka èná banginéná bayélé, Simo anò e tòmi liná li Petelo, pe monginéná Andélé, besówá ményámá me aibó momolo e libangé li mokwa, po iné bétd biáká balòbi ba swé. ¹⁹ Yezu aka békélá bô: ''Bolúwé, bo bilé ngò, pe le oko léngésá onú balòbi bá baitó. ²⁰ Mbala èmoyi baka émálá pe baka mo bila. ²¹ Kunè été yéláká félo eibó aka èná banginéná bayélé Yakobo móngó o Zébédeo, pe Yowani monginéná. Bété yáláká katsi wato boo la ise o ibo Zebedee besówá ményámá me aibó. Aka étáká bô, ²² pe mbala èmoyi baka isélá momolo e bwátò pe baka mo ónga. ²³ Yezu été yéláká momolo e Galilea kwétú boháni mololo e ba Sinagoga yaibó, bosákóli mbóli i bokúmi bo likóló, e umésá batáti ndéngé la ndéngé pe bikètá momolo e baitó. ²⁴ Mbóli iyahè iká yélá momolo e móki u Siria ngia, pe baitó be mo tólélá bane ngia bété biáká la bótáti pe la bikètá, banè bebayi la mélimo-mbé momolo eibó, pe banè betáti bubuluká pe la bikètá bi mékélé, Yesu e umésá bô. ²⁵ Linzi li mòlòkò u baitó baka mo ônga bobándi múkú u Galilea téé Dekapolisi, Yeluzaleme, pe Yudea, pe la múkú félo e libangé li Yordani.