¹ Katsi e bô baosé Yoani Mobatesi aka bándá bosákóli momolo e yéliki ye Yudea, ² Akabeka: ''Boléngési métemá me ainó, po inè kèkà e bokúmi bo likóló ebayi kwawé.'' ³ Yoani ebayi anò été tángólámáká la Yisaya, polofeta, yéniná yété békáká yè: ''Anò ebayi mohéhé wu anò e hámátá momolo e yéliki: ''Kéngá ndólé e Kóló, éngálésá tóôhóló to ahè''. ⁴ Yoani été tóláká túlú e lòtètò ló kámélà enángi mokábá u námá a mópótó uwahè. Eté biáká bo yá leyisi bapáálá pe báiná ba bóhé bo ngángángé. ⁵ Baitó ba Yelusaleme, ba Yadea ngia pe ba móki koitú kèlè kèlè e libangé li Yolodane, baka kiá nguahè; ⁶ baka yámbólá basúmú baibó, aka batésá bô momolo e libangé li Yolodane. ⁷ Kasi anè aka èná yè ainè Bafalisayo boféla pe ba Sudukai baka lwá nguahè po e batisimo, aka békélá bô: ''Onu báóta ba bámáté, ndá umésá onú po e botsili bwángó bonè boyéli mbusè? ⁸ Botusési kahé húma i wáli i bo yá léngési bo ainò, ⁹ Só kanésá onú manginè: "Tobayi la Abalayama po e Isé!'' Po inè le békélá onú ainè banè bamúkéli Mongalima e kóki boléngési po e bò aesi Abalayama banúkú.'' ¹⁰ Ko félo ité isámá la mésilè me mété. Moté la móté unè utsi ôtá húma i wáli u oko ténéma pe u oko filingámá momolo e yóhé. ¹¹ Ngò le bátésá onú la bayé po e botómi onú a boléngésámi, kasi anò e oko lwá mbusè ela e étéli ngo la lokúlú pe ndji yáli la likóki li bo andóli bilátó biyahè. Ye e oko bátésá onú la Molimo Mosantu pe la yóhé. ¹² Ebayi la lúngú lo ahè a lifindji, e òmbá isikani iyahè, pe e oko sángánèsá fâtè i yahè a mbèlè momolo e oko hiákésá biingi momolo e yóhé inè itsi limáná. ¹³ Sikanè Yezu aka lwá bobandi Galileya téé ko múkú u libangé li Yolodane po ainè Yoani a mo bátési. ¹⁴ Kasi Yoani etsi kundji, aka béka: '' Ngò nga ebayi la kàmò aine oyè o bátési ngò, oyè oká lwá inè ngè le bátési oyè?'' ¹⁵ Yezu aka mo inéséla pe aka mo békéla, ''Mina ainè i kélámè kóyó, po inè ibayi wáli po e isó tokókési inè ibayi sémbó. Pe Yoani etsi fétési a isiáká. ¹⁶ Mbusè e bobátisami bó Yezu, aka tswá a bayé. Pe litá, likóló lika uwóláná, pe aka èná Molimo u Mongalima bo iséli ainè yébéngá pe bolúyi likóló li ahè, ¹⁷ Pe litá, mohéhé uka okòkáná bolúyi likóló li lóhóla la banè bahóyi: ''Anò ebayi Mona owa o lokúndó, lahè le isi lokúndó lolá kó lotú''.