¹ Anè eka anohá mwásá, bakumi ngia ba bamupè pe la bakúmú ba baitó baka okokáná ainè ba ólákési Yezu. ² Mbusè baka mo nángá ngándá, baka mo tólá pe baka mo aesá ngi Pilato kumi e yétuká. ³ Aká èná Yudasi ainè bé oko ôláká Yezu, aka okoká bowaowa pe aka léngésá bakanési pe aka léngá bo ulési mbélá inè ité támbéláká yè Yezu ngi ba bamupè pe bakúmú ba baitó, ⁴ pe aka békà: ''Ngô nga kélá lisúmú kunè éka támbè ngélo itsi kéli yéma yébitsi''. Kasi bô baka mo inéséla: ''Mbi ibayi yô la osú? I mo litsi oyè matúkè. ⁵ Mbusè aka filingá bapálátá i mbélá momolo e tempelo, pe aka kia, pe aka tswá yéhóló pe aka yánángá moliki a ngingô yè matúkè. ⁶ Kumi e bamupè aka silá pálátá i mbélá pe aka béka: ''Itsi bayi wáli bo susi yô momolo e litángi po inè ibayi loúnú lo ngélô''. ⁷ Baka tòngòlá po emoli endeyi kindá ekélá bô, pe baka okokáná bokôli mbú la imoli mbélá po e botáhéli bafáyá. ⁸ Tsina emoli été tòmá yô mbú téé ko sikanè: ''Mbú i ngélô''. ⁹ Kôyô inè ité békáná la makómi ba Mosakoli Yeremia ité kokèsànà, bo pomeli: ''Baka silä mbélá métúkú isásò i pálátá, motúyá unè uté okokaná bô po e bana ba Isalayèlè, ¹⁰ pe baka tòmèsá mbú i ngélô, kunè été aesáká Mongalima ngô metsindó''. ¹¹ Sikanè Yezu aka émálá félo e Kumi o yetúká, pe Kumi o yétúká aka mo uhánèsà yè: ''Oyè obayi Kumi e Bayudá?'' Yezu aka mo ulésélá yè: ''Oyè oká béká kôyô''. ¹² Kasi anè été mo pèlèkáká yè la bamúpè pe la bakúmú ba baitó, etsi té inésélá bô só yéma. ¹³ Sikanè Pilato aka mo békelá yè: ''Oyè oká okoká inè ngia i mo pèlèkèli bô oyè?'' ¹⁴ Kasi étsi ulési só lihoyi limoyi, so linè lisèngèli la Kumi o yétúká bo mo kwèsi a lingá. ¹⁵ Sikanè yéniná yé yéndangèlo ité biáká la momèsáno po e kumi e yétuká botusési mitó momolo e mbèlè e linga anò éminoli bô yè la mòlòkò u baitó ¹⁶ Ko yémoli yéniná mitó omoyi etòmi Barabasi été biaká momolo e mbèlè linga. ¹⁷ Kôyô anè aka sángáná bô isikani imoyi, Pilato aka uhánésá bô: ''Ndá ekundzi unó ainè ngô le mo limbési po e inò? Barabasi tô Yezu anò etòmi Kilisito?'' ¹⁸ Eté lémbéláká ainè bété pèlèkáká Yezu ngu ahè po liáná. ¹⁹ Yéléko yété yáláká yè likóló li kèkà e bosámbèsi, moháli owahè été tómeláká mai mokanda ngu ahè pe bo mo békéli: ''So kélá yéma yemoyi ye bitsi ngi ahò mitó po inè etsi kéli lihoyi. Po inè ngô nga tungesáná boféla bonôombe la sèma ènè eka sèmè ngô po elahè''. ²⁰ Sikanè kumi e bamupè pe la méoholo baka sombányésá baitó ainè ba inolé po e Barabasi, pe ba olakè Yezu. ²¹ Kumi o yétuká aka uhólá bô: ''Ndá katsi e ibó baélé ekundzi onú ainè le mo limbèsi?'' Bô baka béka: ''Barabasi''. ²² Pilato aka békelá bô: ''Mbi ikoki ngô bokéli po e Yezu anò e tomi Kilisito?' Bô baka inésá: ''Mo báká a kúlúsè''. ²³ Sikanè aka béka: ''Mbi ikéli yè inè i mbé-mbé?'' Kasi baka hámá mehuyi me potsi: ''Mo báká yè a kúlúsè''. ²⁴ Kôyô anè eka èná Pilato ainè etsi oko kélá yéma yémoyi, kasi kunè été páanáká mòlòkò u baitó bokéli liéngé, aka sóhá bafindzi bahè félo e ibó pe aka béka: ''Ngô nzi bayi la lihoyi po e ngélo e anò mitó. Boka litá onú matúkè po e yô’'. ²⁵ Baitó ngia baka béka: ''Minà ainè imoli ngélo ikwè likóló lia isó pe likóló li banúkú ba isó''. ²⁶ Sikanè aka minelá bô Barabasi, kasi aka tómá ainè ba nangè Yezu pe ba mo bakè likóló li kúlúsè. ²⁷ Sikanè basolá baka holésá Yezu momolo e lobálá lo kumi lo yétúká pe baka sángánésá basolá ngia kele-kele e lahè. ²⁸ Baka mo okofesá túlú pe baka mo tólésá kasaka e hámákè. ²⁹ Baka kéngá yékátá yè kèkè pe baka mo tôlésá a mótó, pe baka mo isélá yelingi yé likókó a lifindzi li lilómé. Baka mo imbánélá baluyi, baka béka: ''Mopalio, Kumi e Bayuda''. ³⁰ Baka mo sènàkélá tótáyi, pe baka mo túsésá túlú pe bosili yelingi yé likókó be mo ofá fimbó. ³¹ Anè aka fwésá bô bo mo leakoli, baka mo túsèsá kasaka pe baka mo tolésá túlú iyahè, baka kia la yè boka mo báki likóló li kuluse. ³² Anè eka tswá bô yéhóló, baka hèná mitó omoyi etòmi Simo, baka mo tolésá la lokulu kuluse. ³³ Baka twsáná isikani imoyi i tòmi Gologota, inè ilimboláni Isikani i yebôbôlô yé mótó''. ³⁴ Baka mo aesá bayé ba likókó po e bonòyi, pe etsi koki bonòyi yô. ³⁵ Anè eká mo báká bô yè a kuluse, baka fákáná túlú iyahè la bo ofi nzéké. ³⁶ pe baka émala pe baka fúká sinzili félo elahè. ³⁷ Likóló li mótó uwahè baka komá tsinà e mo olakéli bô, inè ité komaná: ''Anò ebayi Yezu, Kumi e Bayuda''. ³⁸ Bété bakáká Yezu la baitó ba bwibá baélé, omoyi lifindzi li lilómé pe osiáká lifinzi li liháli. ³⁹ Banè bété biáká bo etsi ahò bété biáká bo mo sekakoli yè, be nongésá metó me aibo, ⁴⁰ pe la bobéki: ''Oyè oté békáká ainè oko bunákólá tempelo pe oko fuká yo sókó la baosé basásò, ya umésá kahé oyè matúkè! La oyè obayi Móngó o Mongalima, isélá séésé e kuluse!’' ⁴¹ Kô emoli kindá kumi e bamupè été biáká la bo mo liakoli, loléngè lomoyi la bakomi ba mébéko la meohóló, pe be béka: ⁴² ''Eté umésáká basiáká, kasi etsi koki bo ya umési yè matúkè. Yé ebayi Kumi e Isalayèlè. Aya iséisi kahé likóló li kulusè, pe kôyô le oko mo inólà yè. ⁴³ Yè été isáká yélikya ye ahè ngi Mongalima, Mongalima kahé a mo sungé yè sikanè. Po inè yè kahé été békáká ainè: ''Ngô le bayi Móngó o Mongalima''. ⁴⁴ Kô yémoli kindá omoyi u baitó ba bwibá anò été bákáká bô la yè a kuluse pe aka mo sékakola yè. ⁴⁵ Sikanè nzima eka tswáná bobandi ngonga e mbalemoyi likóló li móki ngia téé ko ngonga e olimbónga-yélé. ⁴⁶ A ngonga e olimbonga-yélé, Yezu aka súmbá mohúyi u mohéhé u potákè pe aka béka:''Eli,Eli, lama sabactani?'' inè i limbóláni: ''Mongalima owá, Mongalima owá, mbi ika filingé oyè ngô?'' ⁴⁷ Anè eka okoká banè bété yáláká ahò yô, baka béka: ''Yè e étáká Eliya''. ⁴⁸ Mbala emoyi omoyi o ibó aka tsilá luwélé pe aka silá yetátsi yé túlú, aka putá la vinyo ekakakè, aka nángá la moté, pe aka mo aesá yè po e bonòyi. ⁴⁹ Banè bété tsikálá baka béka: ''Mo miná yè matúkè. To lité ainò ambi Eliya e oko lwá po e bo mo umési yè''. ⁵⁰ Sikanè Yezu aka súmbá mohúyi la mohèhè u potákè aitútá pe aka ténéhá molimo uwahè. ⁵¹ Sikanè, mokèmbè u tempelo uka ahákáná bitátsi biyélé bobandi séésé téé ko likóló, pe mbû ika nôngánà, bamûkéli baka tsángánà múkú la múkú. ⁵² Lombéto loka uwoláná, pe bilóngó bi baitó ba bosémbo banè bété biáká bo éngali bika umoha. ⁵³ Ika tswá momolo e lombéto mbusè e bosékwi bo ahè, baka hólá momolo e lohia lo bosantu, pe baka énáná boféla. ⁵⁴ Sikanè anè aka èná kumi e basólá pe la banè bété yáláká ahò bo okoki Yezu bo èni bonóngani bo mbú pe la bakita banè bété kéláná, baka yálá la bo ngilimi pe baka béka: ’'Libékélá, anò e bayi Móngó o Mongalima''. ⁵⁵ Boféla bo baháli banè bété biláká Yezu téé ko Galilea bo mo kèngèli bètè biáká bo liti yésika. ⁵⁶ Katsi e ibo bété yáláká Maria Magdalèna, Maria inéná o Jamesi pe la Yozefu, pe la inéná o baéngá ba Zebédée. ⁵⁷ Anè eká kwá likosè, mitó omoyi o moki u Arimaté etúki mbélá boféla, etòmi lina li Yozefu, anò été yäláká pe moyekoli umoyi u Yezu. ⁵⁸ Aka ya filá ngu Pilato pe aka lòngá molôndá u Yezu. Kôyô Pilato aka aesá motindo unè u bo mo aesi yè wô. ⁵⁹ Yozefu aka silá molônda, aka mo lingá la túlú è pèmákè, ⁶⁰ pe aka engálésá molônda momolo e lômbétó lonè loté fúkáká yè momolo e limúkèli. Mbusè aka liká mosèlá u lombétó la mobália u limúkèli pe aka kia. ⁶¹ Maria Magdalèna pe la osiáká Maria bété biáká aelo, be yali félo e lombétó. ⁶² Liósé li mbusè, linè li bayi liosè mbusè e bo yá kéngi, kumi e bamupè pe la Bafalizeo baka kiá bosángáni isikani imoyi la Pilato. ⁶³ Baka békà: ''Kumi, toká tòngòlá ainè anè été biáká ahó mitó la bo umákè, été békáká ainè: ''Mbusè e baosé basásò e oko sékwá aitútá''. ⁶⁴ Sôkôyô oyè aesá motindo u bokèngèli lombéto téé mbusè e baosé basásò, emoyi mbala bayekoli bahè be oko lwá pe ba bé silá mólóndà pe ba békélé baitó ainè: ''Aka sékwá momolo lòkò, pe bosámbó bo mbusè bo oko étélá bo félo-félo''. ⁶⁵ Pilato aka békélá bô: ''Bo silé ba sinzili. Kiaka bo kéngé kunè e oko kélá onu. ⁶⁶ Kôyô baka kia pe baka báliá lombétó, baka liká limukéli pe baka isá basinzili.