¹ Sikanè mbusè e Sabato, a ikombé-kombé fòli u liosé li félo e pòsò, Maria Magdalèna pe osiáká Maria baka ulá múkú u lombéto. ² Lita, ika tswáná likamwisi limoyi, po anzelu omoyi o Kóló été iséla múkú u likóló, été lwa pe été nángólá limukéli, pe aka yáélá lyo likóló. ³ Loléngé lwahè lo ngèngá ainè mwènzi, pe túlú iyahè ibayi pèè ainè múhutú ⁴ Basinzili be ngilimá la bo bángi pe baka léngá ainè mélóndá. ⁵ Anzelu aka litá baháli pe aka békélá bô: ''Botsi yalè la bo bángi, po inè le lémbéli ainè bo pááná Yezu, anò été mo bákáká bô. ⁶ Yè etsi bayi aitútá anè, kasi aka sékwa, ko kindá été békáká yè. Bolwè bolité anè été éngáláká Kóló. ⁷ Bokè luwélé pe boká tángoélé bayekoli bahè ainè: ''Yè aka sékwá momolo e mélóndá. Sikanè, e kiá múkú u Galilea. Onú bo oko mo hèná aelo''. Kunè aka békélé Ngô onú''. ⁸ Baháli baka okowa luwélé múkú u lombétó la bobángi pe la yénángá ye fulákú, pe baka tsilá boká bo tángoleli bayekoli bahè mbóli. ⁹ Pe litá, Yezu aka kúláná la ibó pe aka béka: ''Losákó!'' Bahali baka ya filà, baka imbáná félo e mékélé me ahè pe baka mo ôndèlà. ¹⁰ Sikanè Yezu aka békelá bô: ''Botsi bángè. Bokè bo békélé bangwáyá bàkè múkú u Galilea. Aelo bé oko ènè ngô''. ¹¹ Sikanè yéniná yété kiaká baháli, litá, ndámbó e basinzili baka kiá luwélé momolo e lohia pe baka tángolélá kumi e bamupè bakita ngia banè bété tswáná. ¹² Anè aka kúláná ba mupè pe la méoholo baka bandá bopoméli po émoli likitá bô la bô, baka aesá basolá boféla bó motángò u mbélá ¹³ pe baka aesa bô motindo: ''Bo békélé baitó basiáká ainè: ''Bayekoli ba Yezu baka lwá a botsio boyibi molóndá yéniná yé éngali osú''. ¹⁴ La yô mbóli iká tswáná ngi kumi o yétúká, to oko mo kélá isúmbányá ainè yémá ye bitsi yé kélánè po e inò''. ¹⁵ Sikanè basolá baka silá mbéla pe baka kélá kunè été aeséláká bô metsindo. Yô mboli ika yélá makasi momolo e Bayuda pe ibayi la boyéli téé ko yènè yénina. ¹⁶ Kasi bayekoli láabo la emoyi baka kiá múkú u Galilea, múkú u itsikóló inè ité sákáká Yezu bô. ¹⁷ Anè aka mo èná bô yè, baka nángá yekopi, kasi ndámbó e ibò baka bia la móngá. ¹⁸ Yezu aka ya filá ngu aibó pe aka pomélá bô pe aka béka: ''Bokumi ngia bo aesanéli ngô momolo e likóló pe likóló li méki ngia, ¹⁹ Bokè sikanè pe bo kélé baitó ba méki ngia bayekoli bahá, Bo aesi bô batisimo kwa lina li Aha, li Mona, pe li Molimo Mosantú. ²⁰ Bo hánè bô bakita ngia banè bété aesi Ngô onú métsindo. Litá, le oko yálá la inò baosé ngia, simi ko botungéli bo bikéké''.