¹ Tango eka fwésá Yezu bobéki bô bahoyi, aka békélá bayekoli bahè: ² ''Bo lémbéli inè Pásiká e oko koka mbusè e baosé baélé, pe ainè Mona o Mitó e oko tambémá po inè a bàkàmè a yekúlúsú''. ³ Sikanè bakumi ba banganga pe méohóló me baitó baka sángáná momolo e lóbálá ló kumi e banganga, étòmi Kaifa: ⁴ Baka okokáná po e tsina e endéyi kindá e bombwesi Yezu la bo itákèmi, pe bo mo ólakesi. ⁵ Ba okokáná bô matúkè: ''Itsi yalè mwásá u yéndangélo yé Pasika, po inè baitó batsi angohé pe ba kélé liéngé''. ⁶ Kunè été biaká Yezu a Bétania, momolo e mbèlè e Simo ano etátsi mbálá, ⁷ moháli omoyi aka yafilá ngu ahè, e iki yeisélo yé mokèbò u liali la málási lo loúnu lofúli, pe, yéléko ye yáli bô a mèzà, oka utáká málási likóló li motô u Yezu; ⁸ Kasi anè aka èná bayekoli ba Yezu kôyô, baka angoha pe baka béka: ''Mbi ibayi tsina po e bo mbéngési yô malasi?'' ⁹ I sèngèláki la botámbi yô málási la lounu lofúli pe bo aesi babólá''. ¹⁰ Kasi Yezu bo lémbéli yô, aka békélá bô: ''Po e mbi e angoélà onú anò moháli? Po iné yè aka kélá yéma ye itáni po e ngò. ¹¹ Onú bo bayi la babólá isikani imoyi la inó, kasi onú botsi oko yálá la ngô baosé ngia''. ¹² Po inè kunè e pitólá yè bilóngô bihá la malasi, e kélá po e tsina e bo táhémi bohá. ¹³ Libékélá le békélá onú, tosikáni ngia inè i oko sákóláná mbóli i wáli katsi mwánó ngia, inè iká kélà anò mohali i oko békáná po e bo mo kánèsi yè''. ¹⁴ Sikanè omoyi u lâabo la baélé, anò etòmi Yudasi Isikaliote, aka kiá múkú u kumi e bamupè ¹⁵ pe aka béka: ''Mbi i oko aesá onú ngô po e bo aeseli yè onú?'' Baka mo aesá mbélá i ba pálátá mètúkú mèsáso. ¹⁶ Po inè été ukoláká loléngé lô bo mo támbi ngu aibò. ¹⁷ Sikanè anè ité tswáná mwásá u félo u lipá lilumbi kusu e bofulèsi bayekoli baka yá filá ngu Yezu pe baka béka: ''Kohé e kundzi oyè ainè osú to lèngèlè po elaho boleyi lipáti li Pasika?'' ¹⁸ Yezu aka béka: ''Bokè momolo e lohiá ngú mitó omoyi pe bo mo békélé, Moháni aka béká ainè: ''Yéléko yéhà yé katswáná. Le kundzi bo nangéli yéndángèlo yé Pasika momolo e mbèlè elahò isikani imoyi la bayekoli bahá''. ¹⁹ Bayekoli baka kélá kunè été aesáká Yezu bô métindô, pe baka lèngèlá lipâti li Pasika''. ²⁰ Anè eka twáná likòsè, aka yálá likóló li meza la bayekoli bahë lâabo la baélé. ²¹ Yéléko yété yáláká bô boleyi, aka béka: ''Libékélà Ngò le békélá onú ainè omoyi momolo e inó e oko támbá ngò’'. ²² Baka kwá la bokamwi boféla, pe omoyi la omoyi baka bándá bo mo uhánési: '' Kô libékélá itsi bayi Ngô, Kóló?'' ²³ Aka ulésélá bô: ''Anò e oko isá lifindzi lilahè isikani imoyi la ngò momolo e yekukumèlè yèmoyi ibayi anò e oko també ngò. ²⁴ Móngó o Mitó e oko wâ kunè ité kománá po e tsina elahè. Kasi bowaowa ngi mitó kwa ndólé e anò e oko támbáná Móngó o Mitó! Ibahi wáli po e ahò mitó ainè atsi otámè''. ²⁵ Yudasi, anò été kundáká bo támbi Yezu aka béka: ''Ibayi Ngò, Molakesi?'' Yezu aka mo békéla yè: ''Oka béká yô oyè matúkè''. ²⁶ Kunè été biáká bô boleyi bimà, Yezu aka silá lipá, aka hámbolà lyo, pe aka búná lyo. Aka aesá ngú bayekoli bahè pe aka béka: ''Bosilè, bolè. Inè ibayi bilôngô bihà''. ²⁷ Aka silá kèni pe aka hambolá yô, pe aka aesá ngú bayekoli pe aka béka: '' Bo nwè yô, onú koatú. ²⁸ Po inè yô ibayi ngélo iyá, ngélo i molémbó u aesáni po e inó la tsina i bolimbési bô masumu. ²⁹ Kasi ngò le békélá onú ainè, Ngô nzi oko nwá aitutá inè hûma i finyo, téé ko mwásá unè u oko nwá Ngo la inó inè i fai-fai katsi e bokumi bo Ahá''. ³⁰ Anè aka hàmbá bô liambò, baka kiá múkú u yèhwá yé oliva. ³¹ Sikani Yezu aka békélá bô: ''Le oko yálá po e ino libya li bofilingani bonè botsio, po inè ikomani ainè: ''Le oko ofá mosènzèli u kondolo, pe kondolo i litóngà i oko tsángana''. ³² Kasi, mbusè le oko sékwà pe le oko yafilá félo e inò múkú u Galiléa'' ³³ Kasi Petelo aka béka: ''La o oko yálá po e isô ngia libya li bofilingani, oyè otsi oko yálá só pèèni po elá''. ³⁴ Yezu aka békéla Petelo: ''Le mo békéla oyè libékélá, sáká bonè botsio, félo ainè kòkò e hambè, oko lámbólé ngò mbálá isásò''. ³⁵ Petelo aka mo uléséla: ''La isèngèli boweyi ko ahò, Ngô nzi oko mo làmbolà oyè''. Bayekoli ngia baka béká kôyô. ³⁶ Sikanè Yezu aka kiá molénga umoyi la ibó isikani imoyi itòmi Getsémani pe aka békélá bayekoli bahè: ''Boyàlè anè yénina yènè yè yáfilé ngo aèlo boká sámbéli''. ³⁷ Aka silá la yè isikani imoyi Petelo la baéngá bayélé ba Zébédéo, pe aka bándá bo okoki bowaowa pe la sômô momolo elahè. ³⁸ Sikanè aka békélá bô: ''Molimo uwá ubayi la bowaowa bô lòkò; Botsikàlè anè pe bolowaélé la ngô''. ³⁹ Mbusè bo yáfili mai pèèni, aka kwá a bosio, pe aka sámbéla, pe aka béka: ''Ahá, la ikokisàmi, mina ainè ènè kèni e okohé félo elá. Tá ainè, kúnè e kundji ngô, kasi kúnè e kundji oyè''. ⁴⁰ Aka ulá múkú u bayekoli bahè pe aka hèná bô be éngali, pe aka békélá Petelo: ''Otsi koki bolowaéli simi ko ngóngà emoyi la ngô? ⁴¹ ''Bo lowaélé pe bo sámbélé po ainè botsi kwè momolo e bo filingani, molimo u kéngámi, kasi bilóngó bitsi pótsi''. ⁴² Aka okowa ahò mbala e iyélé pe aka sámbéla. Aka béka: ''Ahá, la ikoki ainè ènè kèni e été yésika yéhá sôkô ainè i nzi nwè yô, kasi miná ainè mokáno uwahò ukokésáni.'' ⁴³ Aka úlá kwaitutá múkú u bayekoli pe aka hèná bô be éngáli, po inè baisô ba ibó be lihi la ilôhô. ⁴⁴ Aka okowa ahò aitútá pe aka kiá mbàlà e isásò bosámbéli soko loléngé lo moli. ⁴⁵ Sikanè Yezu aka ulá múkú u bayekoli bahè pe aka béka: ''Bobayi saka bo éngali pe bo hôomi? Litá, ngonga eka tswáná, pe Móngó o Mitó ebayi la botámbámi ngú bafindzi ba baitó basúmu. ⁴⁶ Bo émálé, tokè. Litá, omoyi o banè be támbè ngô ebayi kele-kele''. ⁴⁷ Yéninà yété biáká bopómi, Yudasi, omoyi o bayekoli lâabô la twélé, aka tswáná. Bofélà bo baitó baka lwá molénga umoyi la bakumi ba banganga ba Mongalimá pe la méohôlô me baitó. Baka lwá la bilèkà pe la bakóngá. ⁴⁸ Sikanè mitó anò été páanáká botámbi Yezu été aesá bô molémbo, bo béki: ''Omoyi anò e oko aesá ngô yekopi ibayi ahò mitó. Bo mo mbwé yè''. ⁴⁹ Mbala emoyi aka yafila múkú u Yezu pe aka béka: ''Mopalio, Molakesi!'' pe aka mo lingá yekopi. ⁵⁰ Yezu aka mo békéla yè: ''Mwininá owa, kéla kunè inè i lwèli oyè bokéli''. Sikanè baka lwa, baka kasolá bafinzi pe baka mbwá Yezu. ⁵¹ Omoyi o banè bété yáláká la Yezu, aka kasólá lifindzi, aka tusésá yèlèká, pe aka téná mosáli u kumi e fúlaku e bamupè litoyi. ⁵² Sikanè Yezu aka mo angoéla pe aka mo békéla yè: ''Ulésà yèlèka yé ahò momolo e liwôwô, po inè banè ngia bé láná la bilèká be oko wá kwa yèlèká. ⁵³ Bokánesi ainè nzi koki bo étáki Ahá owá, pe ekoki bo tóméli ngô linzi bo étèli molénga u ba anzelu? ⁵⁴ Kasi endeyi kindá i koki bakómá bo kokesami, ainè itsi koké bo kéláni?'' ⁵⁵ Ko yemoli yéniná Yezu aka békélá mòlòkò u baitó: ''Boka lwâ la bakóngá pe bilèká po e bo mbwi ngô ainè mitó o bwibá? Baosé boféla le yáláki bo hâni momolo e témpélo, pe botsi té mbwáká ngô. ⁵⁶ Kasi inè ngia ika tswáná po inè mékómá me basakoli me kokesámè'' Sikanè bayekoli baka mo minà pe baka tsilà. ⁵⁷ Banè bété mbwáká Yezu baka mo tólá ngú Kaifa kumi e bamupè isikani inè itè biáká bakomi ba mébéko pe ko la méohóló bo sángáni isikani imoyi. ⁵⁸ Kasi Petelo aka mo óhóngá mbusè mai yesikà yé lobálá lo kumi e fulákú e bamupè. Aka hólá momolo pe aka yálá momolo e lobálá isikani imoyi la basinzili po e bo liti inè i oko tswáná. ⁵⁹ Sikanè kumi e bamupè pe la lisángá li bakúmú baka pàaná lióhi li isúma po e bopèlèki Yezu po ainè ba mo aesi yétúmbú yé lòkô. ⁶⁰ Betsi hèni so yéma yémoyi simi ko lioyi li isúma linè i bo itámákè. Kasi mbusè ba témô bayélé baka lwá yésika ⁶¹ pe baka béka: ''Anò mitó été békáká ainè ngô le bayi la makoki ba bùnákoli ènè tempélo e Mongalimá pe bofúki lyo mbusè e baosé basásò''. ⁶² Lifúlaku li bakumi e bamupè aka émala pe aka mo békéla: ''Oyè otsi bayi la eyano? Mbi ibayi inè i békéli bô sèko po elaho? ⁶³ Kasi Yezu aka yálá haî. Lifúlaku li bakumi e bamupè aka mo békéla yè: ''Ngô nga aesà oyè motindo kwa liná li Mongalima anò ebayi la bo umákè, to békélà là oyè obayi Kilisito, Móngó o Mongalima?'' ⁶⁴ Yezu aka mo inéséla yè: ''Oyè oka béká lyo oyè matukè. Kasi Ngô le mo békélá oyè, ko sikanè oko èná Móngó o Mitó boyáli likóló li kèkà múkú u lifindzi li lilómé li Lokùlu, pe eyéli likóló li bapâtâ ba lôolá''. ⁶⁵ Sikanè lifuláku li bakumi e bamupè aka aháká túlú elahè pe aka béka: ''Aka túká Mongalima!'' Po e mbi ibayi osú bopààni yéma ye bo mo pèlèki? Litá, sikanè boká okokà botúki Mongalima. ⁶⁶ Iyá ekanési onú?'' Baka inésá pe baka béka: ''Ekoki la yétúmbu yé bówô''. ⁶⁷ Sikanè baka mo útákélá totáyi a bosió pe baka mo ofá yè bibotú pe ko la mbátá, ⁶⁸ pe baka béka: ''To sakolélá osú, Kilisito, ndá aká mo ofá oyé?'' ⁶⁹ Ko yémoli yéniná Petelo été yáláká yéhóló yé lobálá, pe mosali omoyi u moháli aka yafilá nguahè pe aka béka: ''Oyè pe obayi omoyi o baitó ba Yezu mitó o Galiléa ⁷⁰ Kasi Petelo aka lámbóla yô félo eibò ngia bobéki: ''Ngô nzi lémbéli inè i pomélá oyè''. ⁷¹ Anè aka twsá yè yéhóló yé lobálá, usiáká mosali u moháli aka mo lémbéla yè pe aka békélá banè bétè yáláká aelo:''Anò mitò été yáláká pe la Yezu mitó o Nazareti'' . ⁷² Ko aitutá Petelo aka làmbolà yô la mohéhé u pótàkè: ''Ngô nzi lémbéli ahò mitó!'' ⁷³ Mbusè e mai yéniná banè bété emáláká ahò baka yafilá nguahè pe baka békélá Petelo: ''Ko libékélá oyè pe obayi omoyi o ibò, po ainè loléngé lo pomélà oyè i ènèsá ainè oyè obayi owahè''. ⁷⁴ Sikanè aka bándá bolámbóli pe bosémbi: ''Ngô nzi lémbéli ahò mitó'', pe mbala emoyi kòkò eká lélà. ⁷⁵ Petelo aka tòngòlá bahoyi banè bété mo béláká Yezu: ''Félo ainè kòkò e lélé oyè oko lámbólé ngô mbala isásò''. Sikanè aka tswá yéhóló pe aka kwá la biléli.