¹ Zambi bokumi bo likóló bo ko ulani la biongá láábo banè betsi lémbéli balómé banè, bosili tâmbé yaibó, baka kiá po e bokuláni la molómê o liéngélo, ² bamoyi momolo e ibó bété yàlàkà bikété, pe bamoyi bwèli, ³ bikété, bosili tâmbé yaibó, betsi sili bainá momolo e yekukumèlè. ⁴ Kasi biongá bi bwèli baka tólá bainá momolo e yekukumèlè pe ko la tâmbè yaibó. ⁵ Kunè etsi té lwáká molómé aisángá, bô koatu baka ènà pe baká éngálá. ⁶ A botsio até, mohúyi uka ámáta: ''Lita molómé o liéngéló! Boke boka kulani lahè''. ⁷ Sikane byo bionga binè bitsi lémbéli balómé bô koatu baka umoa, pe baka lowaélà tâmbè yaibó. ⁸ Bikété baka békélà ba bwèli: ''Bo aesi osú mai bainá bainó, po inè tàmbè yaisó ika limálá''. ⁹ Banè ba bwèli bo inési: ''Bokè ngà ngi banè bé támbá yô, pe bo kôlé yô po einó''. ¹⁰ A yélékó yènè yété kiáká bô, molómé aka ya kwèsia; banè bété biáká la bo lowaéli, baka hólá la yè momolo e mbèlè e yéndangélo ye liéngélo, pe yetútú yeka nangànà. ¹¹ Mbusè, biongá binè bitsi lémbéli balómé basiáká baka lwa, pe bo béki: ''Kóló, Kóló, to uwéla osú. ¹² Kasi aka inésélá bô: ''Le békéla onú libékélá, ndji lémbéli onú''. ¹³ Sènzèla kahé, po inè botsi lémbéli sô mwásá sô ngónga. ¹⁴ Po inè i oko yala kùnè po e mitó anò, bokeyi lokèndò, aka étáká basáli bahè, pe aka aesá bô bima bi ahè. ¹⁵ Aka aesá tálètà hôomoyi ngi omoyi o ibó, iyélé ngi osiáká, pe emoyi o basásò, omoyi la omoyi ndenge e makoki mahè, pe aka kia. ¹⁶ Mbàlà emoyi anò été ukoláká ba tálètà hôomoyi aka kia, aka fúlésá, pe aka bakèsá hôomoyi isiáká. ¹⁷ saka kóyó, anò été bââká ba tálètà iyélé aka bakésa iyélé isiáká. ¹⁸ Kasi anò été bââká sáká emoyi été kiáká bófúki liánà momolo e lóbálá, aka itá tálètà i kumi elahè momolo e mbú. ¹⁹ Mbusè e baosé bofélá, kumi aká lénga, pe aka lôngá bô ba mo békélé po e batálètà binè bité aesá yè bô. ²⁰ Mosáli anò été siláká batálètà hôomoyi aka lwa pe aka tólá isáká tálètà hôomoyi. Aka béka: ''Kumi, oté aesàkâ ngô batálètà hôomyi. Litá, Ngò ngá bakésá batálètà hôomoyi isáká''. ²¹ Kumi elahè aka mo békéla: ''Oka kéla wàli mosáli u wàli pe u bwèli! Oka yálá la bwèli la bimà bikèkèli. Le oko mo aesá oyè bokumi katsi bimà bofélá. Hóla momolo e yénángá yé kumi elahò''. ²² Mosáli anò été ukoláká batálètà iyélé aka lwa pe aka béka: ''Kumi, oté aesáká ngô batálètà iyélé. Litá, Ngô nga bakésá iyélé isáká tálètà.'' ²³ Kumi elahè aka mo békéla: ''Oka kélá wáli, mosali u wáli pe u bwèli! Oka yálá la bwèli la bimà bikèkèli. Li oko mo aesa oyè bokumi likóló li bimà bofélá. Hóla momolo e yénángá yé kóló elahò''. ²⁴ Ano été ukoláká tálètà ko emoyi aka ya fila-fila mbusè emoli, pe aka béka: ''Kóló, indé lémbéláká ainè obayi mitó o yékákáli, po ainè oyè o téná atá otsi hôni, pe oyè o sangènésá atá yènè yetsi kéli oyè. ²⁵ Ngô ngá bángá pe ngá kiá bo susi tálètà elahò a mbú; èna, sila inè i bayi i yahò''. ²⁶ Kasi kumi elahè aka mo inóélá pe aka béka: ''Mosali u ekakali pe u mbèsè, o lémbéli ainè ngò le téná atá ndji hôni, pe le sanganésà atá ndji kéli. ²⁷ Ité kokáká la oyè ainè o isé mbélà iya a mbèlè e litángi li mbélà pe boka léngi bohá, indé kokáká ainè le silé inè bo lilési. ²⁸ Aka mo luhólá emoli tálètà, pe aka aesá ngi mosali ano ebayi la tálètà lâabò''. ²⁹ Po inè be oko aesá anò ebayi la yô boféla, pe yè e oko yálá la lindji, kasi anò etsi bayi la yéma be oko mo luhóla atá inè ibayi yè la yô. ³⁰ Bo filingé ahò mosáli u mbèse yéhôlô momolo e ndjima, anè i oko yálá biléli la bo ya mátáki baîno''. ³¹ Anè e oko lwá Monà o Mitó katsi nkèmbo e lahè pe la ba anzelu ngia bahè, sikanè e oko yálá likóló li kèkà e bokumi bó ahè bó nkèmbo. ³² Féló e lahè i oko sángáná mèki ngia, pe e oko fákánésá omoyi la osiáká, kùnè e fákánésá mosenzeli u bibwèlè kondòlò la mèmè. ³³ E oko isá kondòlò múkú u lifindzi li lilómé, kasi mèmè lifindzi li lihàli. ³⁴ Sikanè Kumi e oko békéla banè ba lifindzi li lilómé: ''Bolwè, onú banè be hámbóláni la Aha, bo hólè momolo e bokumi bonè bo kéngáni po e inó téé ko bobandi bo môki. ³⁵ Po inè indé biáká la sémbá boté aesáká ngò bimà bi boleyi; Indé biáká la kàmò e bayé pe boté aesáká ngò bayé; pe indé biáká lifàyà pe boté aesáká mbèlè e bo éngáli; ³⁶ Indé biáká bolimbó pe boté tólési ngò túlú, Indé biáká la botátsi pe boté aesi ngò kusu; Indé biáká momolo e mbèlè e lingà pe boté lwáká bo yaliti ngò''. ³⁷ Kôyo baitó ba bosémbó be oko inésà pe be oko békà: ''Kóló, endei yélékó yété èná osú oyè la sémbá pe toká mo aesá bimà bi boleyi? Tô bobayi la kàmò e báyé pe toté mo aesá oyè báyé? ³⁸ Yéndei yéléko yété énà osú oyè lifáyá pe yété to aesà osú oyè isikáni i bo engáli? Tô bolimbô pe toká mo tólésá oyè túlú? ³⁹ Yéndei yéléko yété énà osú oyè la botatsi tô momolo e mbèlè e lingà pe toté lwáká bo ya liti oyè? ⁴⁰ Sikanè Kumi e oko inésà pe oko békélá bô: ''Ko sôlô Le békélá onú, inè ngia i kélà onú ngi omoyi u banginénà baha, bo kélá yò po elà''. ⁴¹ Kôyô e oko békélá banè lifindzi li liháli: ''Bo okohé anè kele-kele elà, baitó ba mbékoó mbé-mbé, bo hólé momolo e yohé i sékô inè ité kéngélá tzápulu pe la ba anzélu bahè po e inó, ⁴² po inè indé biáká la sémbá, kasi botsi té aesáká ngo yémà yé boleyi, Indé biáká la kámò e báyé, kasi botsi té aesáká báyé ba bonoi, ⁴³ Indé biáká lifáyá kasi botsi aesáká isikáni i bo éngali, bolimbó, botsi tolési ngô túlú; botátsi pe momolo e mbèlè e lingà, pe botsi sálési ngô''. ⁴⁴ Kôyô be oko inésèlá ngo pe bobéki: ''Kóló, yéndeyi yélékô yété éná osú oyè la sémbá, tô la kàmò e báyé, tô lifáyá, tô bolimbó, tô botatsi, tô momolo e mbèlè e lingà pe totsi sálési oyè?'' ⁴⁵ Sikànè e oko békélá onú: ''Kô sôlô Le békélá onú, inè ngia itsi té kélá onú ngi omoyi o bànè, botsi tékélá pe po elà''. ⁴⁶ Bô be oko hólá momolo e yétúmbú yé sékó, kasi banè ba bosémbó momolo e bo umàkè bó sékó''.