¹ Yezu aka tswá momolo e tépéló pe aka silá ndólé e lahè. Bayekoli bahè baka mo úhólá po e tsiná e mbèlè e tépéló. ² Kasi aka inésà pe aka békélá bô: ''Botsi èni binè bimà ngia? Libékélá Ngô le békélá onú, só limúkéli limoyi litsi oko tsikálá likóló li lisiáká linè li oko filingáná séésé''. ³ Anè aka yálá bô likóló li itsikóló li mété me húmá i oliva, bayekoli baka lwá kèlè-kèlè elahè pe baka béka: ''To békéla osú, éndéyi yéléko ye oko tswà byo bimà? Mbi i oko yálá yélémbô i bo káléngi bwahô pe botúngési bo yékéké?'' ⁴ Yezu aka inésá pe aka béka: ''Bo yá lowáélé po inè so mitó omoyi atsi kitáké onú. ⁵ Po inè baitó bofélà be oko lwà mbusè la linà lihà. Be mbá béká ombé: ''Ngô lebayi Kilisito'', pe e oko kitáká bofélá bo baitó. ⁶ Bo oko okòkà bitá pe mbóli i bitá. Bolémbélé ainè botsi yà túngési a météma, po inè byò bimâ bikoki botswáni; pe tungési bo mwánó boté tswànáká aitútá. ⁷ Po inè môki umoyi u oko lánésá môki usiáká, môki u bokúmi umoyi u oko lánésá môki u bokúmi usiáká. I oko yálá ombé bongèngi bo sémbâ pe la bo nôngáni bo mbú momolo e bisikáni bofélá. ⁸ Kasi byo bimà ngia bibayi sókó yébándéli i bo ôtáni bo pási. ⁹ Sikanè be oko aésà onú momolo e mènyôkô pe bo ôlaki onú. Be oko fînáká onú la méki ngia po e tsina e lina lilá. ¹⁰ Sikanè boféla be oko kwèsàna, pe be oko pèlèkànà, be oko fináná bamoyi la basiáká. ¹¹ Basakoli boféla ba isúmâ be oko tswáná pe be oko kitáká linzi li baitó. ¹² Po inè bolúmbi botósi bo mébékô me oko fúlá bofélà, lôkundô lo baitó boféla bo oko isélà. ¹³ Kasi anô e oko nàngà motéma téé ko súka e oko úmésàna. ¹⁴ Inè mbóli i wàli i bokúmi bo likóló li oko sákáná momolo e mwánó ainè litátóli po e méki ngia. Sikanè suka e mwánó e oko tswánà. ¹⁵ Sókóyó, anè e oko èná onú bosámbóli bo biléli, inè ité békáná la Mosákôli Daniele, e émali momolo e isikáni i bosántû (minà ainè anô e tángá yô a tôngôlè), ¹⁶ sikanè banè be yáli momolo e móki u Yudéa batsilé múkú u itsikóló, ¹⁷ ainè anô e émáli likóló li mòtòndò u mbèlè atsi isélé séésé po e boka sili yéma yèmoyi momolo e lô mbèlè ¹⁸ pe ainè anô e bayi momolo e yéhwà atsi úlé mbúsè po e boka sili túlú elahè. ¹⁹ Kasi bowaowa po e bahá!i banè be oko tólá liémé pe banè be oko noésá banúkú babèlè bô baosé! ²⁰ Bosámbélé po inè botsíli bo ainó botsi lwè yéléko ye nia lôôlá tô mwaásá u sábátó. ²¹ Po inè lisèngia li pótákè li oko yálá bo étéli, kúnè itsi té biáká lyô kô bobándi bô mwánó téé kô sikànè, pe itsi oko tswáná aitútá. ²² Pe là bô baósé betsi tungésáni, sô mitó omoyi etsi oko úma, kasi po e tsinà e banè be minólámi, bô baosé betsi ukumoa. ²³ La omoyi aka békélá onú ainè: ''Kilisito ebayi anè!, tô ebayi aélò!’' botsi mo inólé. ²⁴ Po inè ba Kilisito ba isúmà be oko yálá bofélá pe ba Sakóli ba isúma be oko twáná boféla. Be oko kélá bahoyi bafúlákú pe la bakámwesi bo étéli po e tsinà e bohèmbi baitó ba sémbô, pe bokwesi bô. ²⁵ Lità, nga engèsá onú féló-félô. ²⁶ Sikanè, la omoyi aka békélá onú: '' Ebayi aelo múkú u londúhú lô limungèlè'' tô ''Ebayi momolo e mbèlè'', botsi mo inoélé. ²⁷ Po inè kùnè e étá yébálibáli múkú u monyèlè pe mo ngèngèsà téé ko aélo múkú u mbálé e môki, sókóyó e oko tswáná Mona o Mitó. ²⁸ Isikàni ngia inè i oko yálá môlôndá u námá, aho i oko sángáná nôli i nzô. ²⁹ Kasi mbúse e bô baosé ba lisèngia, mwásá u oko nôônà, pe màlôôlà otsi oko ngènga, tòndòfi oko kwá likóló, pe bokúmú bo likóló bo oko nôngànà. ³⁰ Sikanè bilémbo bi Mona o Mitó bi oko énànà momolo e lôôlà, pe bilómbô ngia bi mbû bi oko tungésànà. Be oko ènà Mona o Mitó botswi momolo e bapâtâ ba lôôlà la nguyá elahè e potsi pe la nkèmbo e kòlòngi. ³¹ E oko tómà ba anzélu bahè la kèlèlò e potsi pe be oko sángésá ba minólámi ba miúkú ngia lisángá, bobándi suká e lôôla téé kô múkú usiáká. ³² Bo hánáne la li úláni li moté u sawu. La boka èná ainè kási i faî-faî ika bándá botswiyi pe la bitáhe bika liha, bo oko lémbélà ainè yéléko ye ngángé ika tswáná kele-kele. ³³ Sókóyó aitútá, anè e oko èna onú byo bilémbó, bo lémbéle ainè Monà o Mitó ebayi kele-kele, múkú u mosèlá u mbèlè u sôlô. ³⁴ Libékélà le békélá onú, yènè yèkèkè yetsi oko étà féló e binè bahoyi batswánè. ³⁵ Likóló la mbú i oko étà, kasi bahoyi baha betsi oko étá. ³⁶ Kasi inè i litsi mwásá tô yéléko ye súká e mwánó só mitó omoyi etsi lémbéli, simi ko ba anzélu ba likóló, simi ko Monà, kasi soko Aha. ³⁷ Kunè été yáláká tango e yéléko yé Nóha, i oko yálá lô kindá bo luwi bó Monà o Mitó. ³⁸ Po inè kúnè e bô baôsé féló e félà, bété yáláká la bonoyi pe la bolei, bosili báháli pe bosilési banúkú téé mwásá uté hólá Nóha momolo e wâtò, ³⁹ Betsi té lémbéláká sô yémà téé ko anè eka lwà félà pe bo filingi bô _ sókóyó iko yàlà boluwi bó Monà o Mitó. ⁴⁰ Sikanè baitó balómè baélé banè be oko yâlá momolo e yehwá, omoyi e oko silàma pe omoyi e oko tsikala. ⁴¹ Katsi e baháli baélé bané be tútá tofoé à yélîngî, omoyi e oko siláma pe omohi e oko tsikala. ⁴² Sókóyó bô ya lówáélé, po onú botsi lémbéli undeyi mwásá wu oko lwá Kóló. ⁴³ Kasi bo lêmbélé ainè, la matúkè o mbèlè élémbéli yendei yéléko ye botsio ye oko lwá mitó o bwibá, ekoki bo ya lowàélé pe etsi kúndá bo aesi ndólé inè ba búné mbèlè. ⁴⁴ Sókóyó bo ya lowaélê, po inè Monà o Mitó e oko lwá yéléko yènè yetsi oko kôngà onú. ⁴⁵ Sikanè ndá ebayi mosáli u wàli pe u botósi ànò été mo aesá matúkè o mbèlè motindo u bofakéli baitó bahè bimà bi boleyi la ngónga esèngèli? ⁴⁶ Ahámbólàmè ahò mosáli anò bo mo èni bokéli kóyó anè e oko kaléngà yè. ⁴⁷ Libékélà le békéla onú ainè matúkè o mbèlè e oko mo aesá mbánó e boyali kumi e bimá ngia binè bibayi yè la byo. ⁴⁸ Kasi mosali u mbéko mbé e béka momolo e motéma u wahè: ''Kumi ela etsi oko lwá sikanè'' ⁴⁹ a bandè bo ofi basáli basiáká, pe anwè báná pe alè bima la baitó ba mbéko mbé-mbé. ⁵⁰ Anè e oko káléngá matúkè o ahô mosáli mwásá unè utsi lowaéli yè pe ngónga ènè etsi lémbéli yè. ⁵¹ Kumi elahè e oko mo ôfá pe e oko mo isá isikani imoyi la baitó ba isúmà, anè i oko yálá biléli la bo ya matáki bo baîno.