¹ Sikanè Yezu aka békélá mòlòkò u baitó pe la bayékoli bahè. ² Aka béka: ''Bakomi bá mébékó pe la Bafalisayo beyáli likóló li kèká e Moîze. ³ Inè ngia i aésá bô onú métsindó mè bo kéli, bokélé pe botósé yô. Kasi botsi mekólè inè ngia i kélá bô, po inè bô be béká mbékó pe betsi kélá yô. ⁴ Sokoyo betólésä baitó mekúmbá me lîyî la bakélé kéle. kasi bô mátúkè betsi kasólá só lótáká po e botóli yô. ⁵ Be kélá bakitá po bo yá ènèsi ngi baitó. Be tóli túlú i sútánè i lókúmú; ⁶ Bekundji bo yáli isikáni i kèkà i féló isikáni i yéndángéló pe la kèkà i bokúmi momolo e sinagógá, ⁷ pe be kundji bo aesi bô mbôtè i lokúmú isikáni i baitó bofélá, pe la bo étákémi ’'Molákèsi'' la baitó. ⁸ Kasi onú botsi étákàmé 'Molakési'', po ainè onú bobayi sókó la molakési úmoyi, pe onú ngia bobayi banginéná. ⁹ Pe botsi étákè só mitó omoyi anè séésé e mwánó Atô o inó, po inè bobayi sáká la Isé omoyi, pe yè ebayi momolo e likóló. ¹⁰ Botsi étákémé ''Molakési', po inè onú bobayi sáká la Molakési úmoyi, Kilisito. ¹¹ Kasi anô ebayi lifúlákú momolo e inó a yálè mosálisi. ¹² Anô ngia eyá kúmésá yè matúkè e oko isélá séésé, pe anô eyá isélisi yè matúkè e oko kúmésànà. ¹³ Kasi, bowaowa po e inó bakómi ba mébekó pe la bafalisayo, baitó ba isúmá, po inè bonángèlá baitó bokúmi bo likóló, pe botsi hólá onú matúkè, pe botsi kúndésá bo hólési baitó banè be kundji bo hóli. ¹⁴ Bowaowa po e inó bakómi ba mébékó pe la bafalisaya ba isúmá, bokitáká baháli be wéli balómé po e lósámbó lo isúma, po e tsinä emóli, bo oko sámbésáná mákási. ¹⁵ Bowaowa po e inó bakómi ba mébékó pe la bafalisayo, baitó ba isúmá, boyélá likóló li libángé pe la mbú po e boháni baitó mbékó nzáli, kasi la boká úkólá bô, bo léngésá bô báná ba liféló mbálá iyélé bo étéli onú. ¹⁶ Bowaowa po e inó baitó ba lólándá be yélésá baitó, banè be béka: ''La o sémbá ndáyi po e témpéló, itsi bayi la tsina, kasi la oká sémbá ndáyi po tsina e páuni i témpéló, ebayi la litómbá. ¹⁷ Baitó ba bólémá pe ba lólándá! Mbi i étéli likòlòngò katsi e páúni la témpéló ènè e hámbólá páúni? ¹⁸ La omoyi e sémbá mósémbó po e lótáló, e béká onú aitútá, itsi bayi la litómbá; kasi la omoyi e sémbá mosémbó po e tsiná e libonzá liahè linè li bayi likóló li lótálè, ibayi la litómbá. ¹⁹ Onú baitó ba lólándá, mbi i étéli bòkòlòngi, libónzá tô lótálè lônè lo hámbólá libónzá? ²⁰ Kasi, anô ngia e sémbá mosémbô kwà lótálè e sémbá la lyo pe la binè ngia biyáli likóló li lyo. ²¹ Anò ngia e sémbá mosémbô kwà tempélo e sémbá kwà li lyò pe kô la anè e yáli momolo e àhò. ²² Anô e sémbä mosémbó kwa likóló e sémbá kwa kèkà e Mongalimá pe kwa yè anô e yáli likóló li kèkà. ²³ Bowaowa po e inô, bakómi ba mébékó pe la Ba Falisayó, baitó ba isúmá! Po inè bo éndá pákó e láabô li mókámá i malási, pe i aneti pe kumini, pe onú bo miná inè ibayi litómbá momolo e mobékó, bósémbó pe la lokúndó pe la boyámbi. I yáli byò binè bikoki onú bo kéli só bo léndánési binè bisiáká. ²⁴ Onú baitó ba lólándá banè be yélésá baitó, bo útáká tótóki kasi bo nwá kamélá! ²⁵ ''Bowaowa po e inó, bakómi ba mébékó pé la BaFalisáyá, baitó ba isúmá! Po inè onú bo pétólá yéhóló yé kèni pe yé sáani, kasi momolo i liáli la mbindó pe la bimá bi bósámbó. ²⁶ Onú ba Falisáyá baitó bá lólándá! Pétólá ainò féló momolo e kèni pé e sáani, sókóyó yéhóló ye koki pé bóléngi pétwá''. ²⁷ ''Bowaowa po e inó, bakómi ba mébékó pe la Ba Falisáyá! Bobayi ainè lómbétó ló pèmâkè, lonè lobai yéhóló wáli, kasi momolo lo liáli la bawè ba baitó bété wá pé la bimá ngia binè bibitsí. ²⁸ Kô lô kindá, onú pé bo yá èngèsá ainè baitó ba mbékó nzáli ngi baitó, kasi momolo e inó bo liálîsàni la isúmá pe bo lúmbi bótósî mébékó''. ²⁹ ''Bowaowa po e inó, bakómi ba mébèkó pe Ba Falisáyà, baitó ba isúmá! Po ainè bofúká lómbétó lo basakóli pe bo kéngá lómbétó lo baitó ba sémbô. ³⁰ Onú bo béká: ''La osú toté úmáká yélékó yé ba isé ba isó, totsi té kokáká bosángáni la ibó po e bo útáki ngéló i basákóli'' ³¹ Kasi onú kahè bo inólà onú màtúkè ainè bobayi yélómbó yé banè bété óláká basákóli''. ³² Onú pe bo kôkèsá bilémbó bi ba isé ba inó. ³³ Onú félé, onú yélómbó lô bamáté, éndéyi kindá ekoki onú bo úmi bo sámbèsi bô liféló? ³⁴ Sókóyô kahé, litá, Nga tômélá onú basákóli pe baitó bahôméli pe la bakómi ba mébékó. Ndámbó e ibó bo oko ôláká pe bo oko báká bô likóló li ékúlúsú, ndámbó e ibó bo oko ôfá bô momolo e ba sinagógá pe bo oko sésá bô yéhóló yé yéngúmbá la yéngúmbá. ³⁵ Litómbá libayi inè likóló li ainó i oko lwá i ngéló i baitó ba sémbó inè ité útákémá likóló li mbú, bobándi ngéló i Abele mitó o sémbó i ngéló i Zakaria móngó Barak, anó été óláká onú momolo e isikáni i bosantú pe la lótáló. ³⁶ Libékélá Ngò le békélá onú, byò bima ngia bi oko lwá likóló li yènè yèkèkè. ³⁷ Yelusalèmè, Yelusalèmè, oyè anô e óláká basákóli pe bamukéli banè be tóméli bô onu! Endeyi kindá kahé i koki Ngò basángánési banúkú ba inó isikáni imoyi, sókó kúnè e súsá kòkò e owáli bana bahè séésé e i yàhè, kasi onú botsi kundji! ³⁸ Bolité, mbèlè ya inó i oko tsikálá la bo yá sémési. ³⁹ Po inè Ngô le békélá onú inè, Onú botsi oko ènè ngô bo bándi sikánè tée ko anè e oko béká onú: '' A hâmbôlàmè anô e oko lwá kwà liná li Kôlô''.