¹ Yezu, bosili liohi, aka pomélá bô la ndolé e yèkwè yemoyi pe aka béka: ² ''Bokumi bo likóló bo úláni la kumi emoyi anô été kéláká yendangèlô yé liéngéló po e mônà o ahè o olómé. ³ Eté tómá basáli bahè boká étáki bànè be étákémi a yéndangèlô; kasi betsi té kundáká boluyi. ⁴ Aka tómá aitútá basiáká basáli, la bo béki: ''Bo békélé ba étakémi: ''Litá, nga kéngà lipáti lilá: ngombe pe námá iha i báiná bi ôlákèmi, bakita ngia baka kokà, boluwe à lipáti li liéngélo''. ⁵ Kasi, só bo ya tungési la yô bo étàkèmi, baka kiá, anò à yehua ye ahè ahò a molunga mo ahè; ⁶ Basiáká baka mbwá basáli ba kúmi, baka sámbwesá bô pe baka óláká bô. ⁷ Kumi aka angóâ, aka tómá basólá bahè, aka olákésá banè bété oláká basáli; aka hámbáká lohia lo kôlôngi lo aibó. ⁸ Mbúsè aka békélá basáli bahè: ''Yéndangélo ye liéngélo ye ka kókà; kasi banè be étákámi betsi bayi la mákóki, ⁹ Bokè kahé mwátsi u botúmáni bó ndólé, pe bo étákè baitó koàtú banè be ko ukólá onú''. ¹⁰ Bô basáli baka kià à ndólé pe baka sángánésá banè koatú banè bété ukólá bô, baitó ba mbékó mbé pe ba mbékó nzáli, pe mbèlè e lipáti e ka liálá la baitó. ¹¹ Kumi aka hólá momolo pe aka litá banè bété yáláká à mèzá, pe aka ènà mitó omoyi etsi té toláká túlú e lipáti. ¹² Aka mo békéla yè: ''Mwininá owá, endeyi ndéngé eka hólá oyè anè só botóli túlú e lipáti''. Ahò mitó aka nàngà monwâ. ¹³ Mbusè Kumi aka békélá básáli: ''Bo mo nángè méliki à mékélé pe le bafindji, pe bo mo filingè momolo e nzima à yehóló, ahò i oko yálá ményoko, boléli pe bo yá mákáki báino''. ¹⁴ Po ainè báitó bófélá be étákèmi, kasi be minólámi be tsifuli''. ¹⁵ Mbuse ba falisayo báká kiá bo yá húláni po e éndéyi kindá e bo úkóli ndólé e bo mbwi Yezu la ndólé e bálóbá bahè matúkè. ¹⁶ Baka tómélá yè bayekoli ba ibó isikáni imoyi la baitó ba Herode. Baka békélá Yezu: ''Kóló, to lémbéli ainè oyè obayi sémbá, pe o hánésá ndólé e Mongalimá èngèbènè la libékélá só bo bángi mitó, zambi otsi litákólá lóléngé lo mitó. ¹⁷ Békelà osu kahé inè ikanésà oyè: Iyaesàmeli ndingisà, to tee po e bo éndi pákó ngi Kaisálá?'' ¹⁸ Kasi Yesu, bolémbéli mbékó mbé yaibó, aka inésa: ''Po e mbi émekà onú ngô, baitó ba bayèlè mbé? ¹⁹ Bo litési ngô lófálángà lónè lo éndélá onú pákô''. Pe baka mo litésá lófálángà lomôyi. ²⁰ Yezu aka úhólá bô: ''Ngi ndá ébayi yènè yélilingi pe lòné lókómá?'' ²¹ ''Ngi Kaisálá'', eká bo inésélá bô yé. Mbuse aka békélá bô: ''Ulésà ngú Kaisálá yènè yebayi ye Kaisálá, pe a Mongalimá yènè yebayi yé Mongalimá. ²² Bokàmwi la ènè kindá eká okôká bô, baka okóha anè eyáli yè, pe baka kiá laibó. ²³ U moli mwásá, ndámbó é basàdisáyá, bànè békáká ainè lisékwá litsi báyi, bakalwâ ngi Yezu, pe baka mo úhóla, ²⁴ ’'Molakisi, Moîze été békáká: la mitó a kawâ la etsi tsiki monà, monginéná e oko silá moháli e wéli mólómé, pe e oko aesá mòlóngô u baitó la monginéná''. ²⁵ Po inè, ité biáká momolo e ibó bánginénà mbai-twélé. Onè o féló aka silá moháli, pe akawâ; pe, kúnè etsi té yáláká yè la bànúkú, aka tsiká moháli o ahè ngi monginénà. ²⁶ Ano baélé ndéngé ko emoyi, ô basásò lókólà, téé o mbai-twélé. ²⁷ Mbusè eibo ngia, moháli pe akawâ. ²⁸ Yélékó yé lisékwâ, yè e oko yálá moháli o ndá katsi e bô mbai-twélé? Po inè bô ngia bété siláká ahò moháli''. ²⁹ Kasi Yezu aka aésá bô eyàno, onú bobayi la libúngá, po ainè onú botsi lémbéli atá Bakômi, atá pe lokúlú ló Mongalimá. ³⁰ Po inè, yélékó yé lisékwâ, balómé betsi oko silá baháli, atá baháli ngi balómé, kasi be okobyâ ainè ba anzélú ba Mongalimá u likóló. ³¹ Po e bakitá be litî bosékwî bo bawéyi, botsi té tángáká inè ité békéláká onú Mongalimä, bo béki: ³² Le bayi Mongalimá ù Abàlàyàmà, Mongalimá u Isáká, pe Mongalimá ù Yakobo? Mongalimá etsi bayi Mongalimá ù bawéyi, kasi banè bé bayi lá boúmákè. ³³ Lindji li baitó, banè bété okòká, baka inólá batéya ba Yezu. ³⁴ Bafalisáyô, bo okòki ine Yezu aka isá basadisayi haî só lióyi li bobéki, baka sángáná bo matúkè isikáni imoyi. ³⁵ Pe omoyi momolo eibó, molakesi u ntôkiá i mébékó, aka mo uhólá lioyi, po e bo momèki. ³⁶ ''Molakisi, kindá endéyi e mótindó u bayi u fúlákú bo étéli momolo e mébékó?'' ³⁷ Yesu aka mo inèsélà: ''Oko kúndá Nkóló, Mongalimá uwahò la motémá uwahò ngia, la bo mitó bo ahò ngia, la bakánési bahò ngia, pe la lokúlú lwahò ngia. ³⁸ Yô u bayi unè u féló-féló pe u étéli mébékó ngia. ³⁹ Pe litá unè u bayélé, unè u úláni la áhô: ''O oko kúndá báyàlânesi bahò kúnè oyá kundji oyè manginè. ⁴⁰ Katsi e mètsindó byo biyélé ndé iliti mébékó ngia pe la básákóli. ⁴¹ Sikanè kùnè été túmánáká ba falisáyô isikáni imoyi Yezu aka úhólá bô. ⁴² Aka béka: ''Mbi i kanésá onû po e Kilisito? ebayi mônà ô ndá? Baka mo hûlésá: ''Mônà o Dawidi''. ⁴³ Yezu aka békélá bô: ''Po e mbi Dawidi, bofilámi la Molimo, e mo étáká Nkóló, yènina yeká béká yè: ⁴⁴ ''Nkóló aka békélá la Nkolo elá: ''Yálá á lifindji lilá li lilómé, téé ko ànè e okokélé ngò bangúná bahò bisikáni bi bo iséli mékélé me ahò? ⁴⁵ La Dawidi kahé e étáká Kilisito ''Nkolo'' ndéngé mbi kahé ebayi mônà o Dawidi? ⁴⁶ Só omoyi etsi mo huléséli lioyi. Pe, téé ko wô mwásá só mitó omoyi etsi mo békéli só mwihú.