¹ Po inè kèkà e likóló e úláni la manginè o mbèlè etsuyi a kómbé fòli po e bosili baitó a yésili po e yèhwá yé vinyo ye lahè. ² baka okokáná la ibo lopátá lòmoyi a mwásá pe aka tómá bô a yèhwá ye vinyo yelahè. ³ Aka tswá à ngóngà e isàsò pe aka èná basiáká básáli isikani imoli be émàli. ⁴ Aka békélá bô: ''Bokè pe à yehwà yé vinyo yehà, pe le oko aesá onu inè yo okoyálá la bakanisi''. Sikanè bakakia. ⁵ Kwaitútá aka tswá à yehóló a ngóngà e mbàlè emoyi pe aitutá à ngóngà e sumbàngà emoyi, pe aka kéla kóyó. ⁶ Kwaisiáká aka tswá à ngóngà e láábò la omoyi, aka hènà basiáká banè bété yáláká à imóli isikani, pe aka békélá bô po embi e émáli onú anè mwásá kwitu só bokéli yémá? ⁷ Baka mo inéséla: ''Itsi bayi só la mitó anò etsi to sili à yésili''. Aka békélá bô: ''Bokè pe lokólà à yehwà yé vinyo yehà''. ⁸ Anè eká tswáná likósé, matúkè u yehwà yé vinyo, aka békélá mokèngèli kûnè: ''Etákà basáli pe éndà bô lifútá liya ibó la bóbándi la anò o mbùse téé bóféló. ⁹ Banè ba ngóngá e láòbo la emoyi baka tswána, baka úkólá lopàtà lòmoyi. ¹⁰ Anè aka lwá basáli baféló féló baka súmàákésá ainè be oko ukólá lindj, kasi baka ukólá pe omoyi la omoyi lopátá lomoyi. ¹¹ Anè aka úkólá bô lifúti li aibó, baka hima hima mabé po e matúkè o yèhwà yé vinyo. ¹² Baka béká: ''Banè ba mbusè baka kélá mosálá sánga ngóngá emoyi, pe okakéla bô ndéngé emoyi la osú, osú banè toté okokàkà bo héni bo mwásá pe la lúmbé''. ¹³ Kasi aka yanólä omoyi o ibó: ''Mwininá owá Ngò ndji mo kéli oyè bóbé, otsi okokáni la ngô la lopátá lomoyi? ¹⁴ Silà linè likoki la áhò pe kiáká. Ngò nga kúndá bo aesi anò mosáli o mbúsè sókó lô kindá''. ¹⁵ ''Ngò nzi bayi la makóki i bokúndésámi la ngò bokéli la yéma yéhá yènè yé kundji ngò? Tô kahé oyè o èni la báisó bóbé kúnè eyáli ngò mitó o lifákò? ¹⁶ Sókóyó ba mbúsè be oko yálá féló pe ba féló be oko yálá ba mbúsè. ¹⁷ Yélékó yété lilá Yezu à Yelusalèmè, akasilá bayekoli láaábò bayélé, pe aka békélá bô à ndolé: ¹⁸ Litá, tolilá à Yelusalèmè, pe Mona o mitó e oko aesámá ngi ba ngángá bafúlákú pe a ba Saduséya, be oko mo tómá à lôkô, ¹⁹ pe be oko mo aesa ngi bapákánó po inè ba mo òlè, ba mo ófé fimbó, pe ba mo hólákèsi; pe mwásá u básásò e oko sékwà. ²⁰ Sikanè inéna o baéngá ba Zébédéo aka yáfilá ngu Yezu la bánúkû bahè. Aka mo tsimélá balúwi po e bo mo lôngi yemá yèmoyi. ²¹ Yezu aka mo békéla yè: ''Mbi ikundji oyè? Aka mo békéla: ''Aesà motindó 'te baéngá bahá bayélé bayálè la bokúmi bo ahò, omoyi à lifindji lilahò li lilómé, osiáká â lifindji lilahò li liyàli''. ²² Yezu aka inésélá bô: ''Botsi lémbéli inè i lòngá onú ngô. Bókóki bo nwòyi kèni ènè e oko nwé ngô? ''Tó bayi la mákókí, eká béká bô''. ²³ Aka békélá bô: ''Kèni elá bo kóki bo nwòyi. Kasi bo yáli là lifindzi lihá li lilómé pe là lifindzi lihá li liháli itsi kokéli ngô bo aési, kasi ibayi po e bànè be kéngàni la àhá owá''. ²⁴ Anè aka okòká bayekoli basiáká kôyô, baka ángóélá bô bayekoli bayélé makási. ²⁵ Kasi Yezu aka étáká bô, pe aka béka: ''Bolémbéli ainè mébékô me bapakano me yélésà bô, pe ainè mitó o litómbá eyélésá bokumi likóló li aibó. ²⁶ Kasi itsi koki boyáli kindá emoyi mwátsi wainó. Sókó lô kindá, anò ekundji ainè ayálè lofúlákú momolo e ino, ayale mosáléli o inó, ²⁷ pe anò ekundji boyáli féló katsi einó, ayálè motúké wainó, ²⁸ lóléngé lòmoyi ainè Mona o mitó etsi té lwá tâ po inè ba mokélélé, kasi po akélé pe aesi bomoyi bowahè ainè mbéká po mòlòkô u lindji li baitó. ²⁹ Kunè aka okoha bô múkú u Yeriko, mòlòkô u baitó baka bilà Yezu. ³⁰ pe litá baofá bayélé bété yáláká kèlè-kèlè e ndolé. Anè aka okókä bô Yezu e étá wô múkú, baka hámá: To okòkèlà bowaowa, Kóló, Mona o Dawidi''. ³¹ Mòlòkò u baitó baka fétésá bô, bo békéli bô bayálè haî, kasi bô baka hámá la lokúlú: ''to okokélà osû bowaowa, Kóló Mona o Dawidi''. ³² Yezu aka émálá pe aka étáká bô, pe aka béka: ''Mbi ikundji onû ngò lekélé po e inó? ³³ Baka mo békéla yè: ''Kóló, ainè báisó baisó ba uwôlámé''. ³⁴ Kôyô, bo okokèli bô bowaowa, Yezu aka tálá báisó baibó pe sikanè baka ènà pe baka mo bila.