¹ Ité yáláká koyo ane aká fwélésà Yezu bô bahóyi, aka okóhá múkú u móki Galiléa pe aka kiá múkú u môki u Yúdéa unè u bai mbálé e libangé li Yolodani ² Mòlòkò u fúlákú u baitó baka mo bilá yè, pe aka úmèsa bô aélo. ³ Bafalizéo baka yá filá ngu ahè, po e bo momèki, baka mo békéla: '' Itsi kúndésámi po mólómè bo féti moháli owahè à liéngéló àtá po e tsina emoyi?'' ⁴ Yezu aka inésélà bô pe aka béka: ''Botsi té tángáká inè ité kéláná ko féló yé yébandéli ye móki inè ité kélá bô molómé la moháli?'' ⁵ Ano été kélá bô été béká aitútá ainè: ''Po e tsiná émóli molómé atsiké Isé la Inéná pe a sángánè la moháli owahè, pe bô bayélé ba léngé bilóngó bimoyi'' ⁶ Sokóyo betsi yáli aitútá bayélé, kasi bilóngó bimoyi. Sokóyó inè inángi Mongálimá, sô mitó omoyi etsi fàkànésá''. ⁷ Mbi kàhé ité to áésá Moize osú mobékó u bo aesi yésáli i bo ôláki liéngéló pe bo úlési moháli ngwaibó?'' ⁸ Aka békélá bô: ''Ibayi po e bopótákè bo motéma wainó ndé été kúndésélá yè onú bo fàkàni la baháli ba inó, kasi ko yébándéli itsi té biáká lô kindá. ⁹ Le békélá onú, anò ngia e fákáná la moháli owahè, oko fésà sákä po e yétébá, pe la aka silá molómé osiáká, aka kélá yétébá, pe molómé anò e oko silá ahò moháli aka kélá yétébá''. ¹⁰ Bayekoli baka békélá Yezu: ''La ibayi lô kindá po e molómé la moháli owahë, itsi bahi la litómbá li bo siláni''. ¹¹ Kasi Yezu aka békélá bô: ''Baitó ngia betsi sòsòlá lyo lióyi, kasi sáká bànè bekoki la bo inóli lyò. ¹² Po inè ibahi baitó banè betsi bayi la lokúndô ló bosili baháli téé ko sòlò e ba inénà baibó, pe ibayi baitó banè be tómáni la bofetsi baháli la baitó, pe ibayi la baitó banè betsi yakùndési bosili baháli bô matúkè po e bo kumi bô likólô. Ano e bayi la lokúlú lo bosòsòli linè lióyi, minà ainè à sòsòlè lyò.'' ¹³ Sikanè baka mo tólélá ndámbó e banúkú po aine a tándèlè bô bafindji pe a sambélé po eibó, kasi bayekoli baka fétésá bô. ¹⁴ Kasi Yezu aka béka: ''Aesá bô ndólé balwè, botsi fétési bô inè yá filé múkú uwá, po inè bokúmi bo likóló bo úláni la bànè''. ¹⁵ Aka isá bakàlò bahè likólô li balèngèlà, pe aka okówà ahò. ¹⁶ Litá, mitó ômoyi aka ya filá múkú u Yezu pe aka béka: ''Moháni, mbi ikóki ngo bókèli i wáli po e bohôli momolo e bo úmàkè bósékó?'' ¹⁷ Yezu aka mo békéla yè: ''Po e mbi e úhànésà oyè ngò inè ibayi wáli? Sókô yema yemoyi nga ibayi wáli po bo hóli momolo e bo úmàkè: ''Tósà mébékó''. ¹⁸ Aho mitó aka mo békéla: '' Méndeyi mébéko'' Yezu aka béka: ''Só óláka mitó, só kélá yètébà, so yibà, só téná mosémbô u isúmà, ¹⁹ kumèsá atô la anohè, pe kúndá banginéná bahò ainè oyè matúkè''. ²⁰ Aho monà ólómé aka mo békélá yè: '' Yô ngia ngò le tósá yô. Mbi ikoki ngò bo kundji aisiáká?'' ²¹ Yezu aka mo békélà yè: ''Là okundji boyáli sémbó, kiáka, támbá inè ngià ibayi oyè la yô, pe aesà ngi baitó bétúndji, pe oyè oko úkólá bomèngò à likóló; pe lwá, bilè ngò''. ²² Kasi anè aka okòká ahô mona olomé inè ité békáká Yezu, aka okóhà ahô la bowaowa, po inè yè été biáká la bomèngò bofélà. ²³ Yezu aka békélá bayekoli bahè: ''Libékélá le békélà onú, ibayi mátátá po e mitó o bomèngo bo hóli momolo e bokúmi bo likóló. ²⁴ Pe aisiáká le békélá onú, itsi pótsi po e kamélà bo hóli momolo e ndufáka e tônga kunè mitó o bomèngo bo hóli momolo e bo úmi bo Mongálimá''. ²⁵ Anè eká okòká bayekoli kôyó, baka kámwá bofélà pe baka béka: ''Ndá kahè ekóki bo úmi?'' ²⁶ Yezu aka litá bô pe aka békà: ''Po e baitó yô itsi kóki bokélàni, kasi po e Mongálimá bimà ngia bikoki bokélàni''. ²⁷ Sikanè Petelo aka mo uhánésà yè pe aka békà: ''Lità, osú tókà miná bima ngia pe toká mo bilá oyè. Mbî kahé i oko ukólá osú?'' ²⁸ Yezu aka békélá bô: ''Libékélá le békélá onú, yénina yé bikèkè bi mbusè anè e oko yálá Móngó o Mitó à kèkâ e làhè e nkèmbó, oyè anò oká bilé ngò'o oko yàlà pe likóló li kèkà láábò la iyélé, po e bosámbési bilómbó láábò la iyélé bi Isalayèlè''. ²⁹ Anò ngia aka miná mbèlè iyàhè, banginéná, basékinéná, isé, inéná, banúkú , pe mbú po e liná lihá e oko úkólá mokámá umoyi u yélékó pe be oko sángólá bo úmàkè bo sékó. ³⁰ Kasi bofélá banè bebayi féló be oko yálá mbusè, pe banè bebayi mbúsè be oko yálá féló''.