¹ Bana bake baha, le komela onu bio mbeko, po e ino, botsi kele masumu. Pe la omoyi aka kela masumu, toyali la mosambeleli wa iso ngi Aha, Yesu Klisito mito semba. ² Ebayi ye matuke moimbaneli po e basumu ba iso, so saka po e ine yaiso, kasi po e bine bi moki ko motu. ³ La osu to ita mebeko me ahe la ewolo tolembeli ine tote molembela. ⁴ Ano e beka: Lete molembela, pe etsi ita mebeko meyahe, ebayi mito o masumu pe bosolo botsi bayi katie lahe. ⁵ Kasi ano e ita liohi li lahe, lokundo lo Mongalima lo bayi liekela so liunga kati elahe. ⁶ Ano ebeka ine etsikali kati elahe esengeli la boyeli a isiaka une ete yela ye matuke. ⁷ Ba-lokundo, etsi bayi mobeko mo sika mone mokomela ngo onu, kasi mobeko umoyi u kala mone mote ukola onu tee ko libandela; yoo mobeko mo kala obayi liohi line li teokoka onu. ⁸ Nzoka ibayi mobeko mo sika mone mokomela ngo onu ine ibayi liekela katsi elahe pe katsi e ino, zambi ndjima e limwa pe bongengi bo liekela bo tsui kala. ⁹ Ano e beka une ebayi katsi e bongengi, pe ano ebayi la findji la monginena, ee koyala katsi e ndjima. ¹⁰ Ano ekundji monginena etsikala katsi e bongengi, pe so libia li bokwei limoyi litsi bayi katsi elahe. ¹¹ Kasi ano ebayi la findji e monginena, ebayi katsi e ndjima, e yela katsi e ndjima, pe etsi lembeli ane e kia ye, po ine ndjima eka moolaka baiso ba ahe. ¹² Le komelaonu, ba Aha, po ine bolembelaki ano ebayi tee ko libandela. ¹³ Lete komela onu, bana ba holome, po ine bo te longa mito o bayelembe. Lete komela onu, bana bake, po ine bo te lembela Aha. ¹⁴ Lete komela onu, ba aha, po ine bote lembela ano ebayi tee ko libandela. Lete komela onu, bana ba olome, po ine bo potsi, pe ine liohi li Mongalima itsikale katsi e ino, pe onubo te longa mito o bayele. ¹⁵ Bo tsi kunde mwano, so bima bine bibayi katsi e mwano. Laa omoyi ekundji mwano, lokundo lo Aha lotsi bayi katsi elahe; ¹⁶ Zambi ko itu ine ibayi katsi e mwano, kamo e bilongo, kamo e baiso, pe la mondandalia u bo umake botsi lwa ngi Aha, kasi bolui a mwano. ¹⁷ Pemwano u eta pe la kamo iyahe a isiaka; kasi ano e kela mokano mo Mongalima etsikala seko la seko. ¹⁸ Bana bake, ibayi ngonga e suka, pe une etelembela onu molamboli Klisito: omoyi e lwa, ibayi sikane bofela o balamboli Klisito: laa aho tolembeli ne ibayi ngonga e suka. ¹⁹ Betsui katsi e iso, kasi betsi te yalaka ba iso; zambi la beteyalaka ba iso, ko bete tsikala ba iso, kasi yoo itsi te kelama po ine yeenani aine boo kwatu betsi bayi ba iso. ²⁰ Po e ino, bo te ukola lihamboli li molimo ngu ano ete pekwama pe onu kwatu bobayi la bolembeli. ²¹ Le te komela onu, te ine botsi lembeli liekela, kasi po ine bolembeli yo, pe po ine isuma imoyi itsi itama katsi e liekela. ²² Nda ebayi mito isuma, soko ano elambola Yesu ano ebayi Klisito? Ye aho ebayi molambole u Klisito, ano elambola a isiaka Aha. ²³ Mito soko mito elambola Mona etsi bayi lo Aha; mito soko mito ano e yambola Mona ebayi pe la Aha. ²⁴ Mina bine bi te okokaka onu ko a libandela litsikale katsi e ino. La bine bitsi okokaki onu kwa libandela litsikali katsi e ino, bookotsikala katsi e Mona pe katsi e Aha. ²⁵ Pe la elaka ene ete twaeseka ye osu, ebayi boumake boo seko. ²⁶ Etekomela onu yo mbeko a tsina e bane e unganesa onu. ²⁷ Po e ino, boutakelami lihambo li molimo line li te ukola onu litsi tikali katsi e ino, pe botsi bayi la bosenga po ine bahane onu, kasi kune lihamboli li molimo li hana onu, yo mbeko kwitu pe libayi li liekela pe a ine litsi bayi isuma, otsikale katsi elahe engebene la bahano bete aesaka ye onu. ²⁸ Pe sikane, bana bake, bitsikale katsi elahe, po ine, ane eko tsua ye, toyale la ba inoli ba boukoli pe a yeleko ye bolengi boo ane totsi yale la bosambo pe boyali esika eyahe. ²⁹ La bolembeli ine ebayi semba bo inole ine mito ko mito esalela bosembo eotami lahe.