¹ Ane eteyalaka ko felofelo, pe eteyakoka osu ano eteyanesa osu a baiso e iso, ano etehenaki osu pe la bafindji e iso, eyali liekela a bumake, ² po ine bumake eteyaenesia osu, pe eteyaenesia osu la boyali temo e lae, po e boheki likita li bumake e libela. ³ Ane etanesiake osu la bokoki, tohekeli osu, oye pe, po e ino lokola ayale esikani umoyi e iso. ine bomoyi e iso ebayi kwa Aha la Mona o wae Yesu Klisto. ⁴ Pe tokomi yo bakita, po ine yenanga e iso eyitane. ⁵ Yo mboli ano etehokoka osu po e lae, pe ano etehekelaki osu, aine Mongalima ebayi mwendji, po e lae ndjima etsi bayi. ⁶ Kasi toheka ine toyali esikani emoyi e lae, po ine toyali katsi e ndjima. Boheki isuma, pe totsiheka liekela. ⁷ Po ine toyali katsi e bongengi, ndenge ye matuke eyali katsi e bongengi, toyali a bomoko a litumano, pe ngelo ye Yesu mona owae eka topetola a basumu e iso. ⁸ La toheki ine totsibayi a basumu, toyakosa usu angine, pe liekela etsi bayi katsi e iso. ⁹ La toyamboli basumu e iso, ebayi wali pe sembo po e bolimbesi e iso, la bopetoli osu a bosoto la bakita ngia. ¹⁰ La toheki ine totsi bayi baito e basumu, toheka isuma, lo liekela etsi bayi katsi e iso.