¹ Olusiku lwa makumigabirhi lwa ogwo mwezi, abana b'israeli barhimanana bayambirhe obusunzu na babwikire lutulo, okujira okucishalisa. ² Abali n'obuko bw'israeli baciberula n'ebigolo, bacilerha na bahungama ebyaha byabo n'amahushe gab'ishe. ³ Erhi batamala, basoma omu citabu c'irhegeko lya Nnamubaho, Nnamahanga wabo lugero lwa cihumbi ca kani ca mulegerege; na ecindi cihumbi bahungama ebyaha byabo n'okucikuba embere za Nnamubaho, Nnamahanga wabo. ⁴ Yoshua, Bani, Kadmieli, Shebania, Buni, Sherebia, Bani, na Kenani bayubaka olutari lw'abalawi et bayakuza Nnamubaho okw'izu linene, Nnamahanga wabo. ⁵ N'abalawi Yoshua, Kadmieli, Bani, Hashabnia, Sherebia, Hoadiya, Shebania na Petashya, baderha: muyimange, mukuze Nnamubaho, Nnamahanga winyu, emyaka n'emyaka! Bakuze izino lyawe ly'irenge linali enyanya lya ngasi migisho na ngasi bukuze. ⁶ Weri, Nnamubaho, wene, wajiranga empingu , empingu z'empingu n'emirhwe yazo yoshi, igulu na ngasi birimwo byoshi, enyanja n'ebirimwo byoshi. Onahane abuzine kulibyo byoshi, n'omurhwe gw'empingu gucikumbe embere zawe. ⁷ We, Nnamubaho Nnamahanga, walondolaga Abramu, wamukulaga omu Uri ya bakalidayo, n'oku muyirika izino lya Abrahamu. ⁸ Wabona omurhima gwage mwikubagirwa embere zawe, wajira endagano naye, na walaganya okuwaha iburha lyage ecihugo c'abakanani, abahiti, abaamori, aba perezi, abayebusi, n'abagirgasi. Na wanakuhikiriza bulya oli mushinganya. ⁹ Wabona amalibuko ga balarha e Misri, na wayunva endulu zabo ebwa nyanja ndukula. ¹⁰ Wajira ebirhangazo Binui kuli Farao, oku bakozi bage boshi, oku lubaga lw'ecihugo cage coshi, bulya walimanyire, bulyalya buligurhi bairire ba larha, na wabonesa irenge lyawe nkoku binali ene. ¹¹ Wabera enyanja embere zabo, banagera ahakazire omukagarhi k'enyanja, na wahonolera emubi, nk'ibuye omw'iziba, abali bakulikire. ¹² Wabalongolana mulegerege oku citu, na budufu oku ngulumira y'omuliro yajaga yabamolekera omunjira balikwanine oku kulikira. ¹³ Wahonoka oku ntondo ye Sinai, wabaderheza kurhenga emalunga, na wabaha amarhegeko gashinganine, marhegeko g'okuli, mahano na marhegeko minja. ¹⁴ Wabamanyisa e Sabato gawe ecesibwe, na wabayandikira kugerera Musa, mukozi wawe, amarhegeko gawe, amahano n'obworhere. ¹⁵ Wabaha, kurhenga emalunga, omugati amango bali shalisire, na wakula amishi omu lwala amango baligwerhwe n'enyorha. Na wababwira oku bagwarhe ecihugo wacigashaga oku wabaha. ¹⁶ Cikwone ba larha baja mw'enzizi na bazibuhya amagosi. barhayunvagya amarhegeko. ¹⁷ Balahira oku kenga banayibagira ebi wabajiriraga. Bazibuhya amagosi gabo, na omu kugoma kwabo, baciha omurhambo mpu abashubize omu buja. Cikwone we oli Nnamahanga mubidu oku babalira, wa bwonjo na wa lukogo, orhalibirhira kuhana, mwinji wa lukogo, na orhanabalekaga. ¹⁸ ciru erhi bacijirira akanina kayayuse n'okuderha: lolaga Nnamahanga wawe wakurhenzagya omuciugo c'e Misri, n'oku mujira mahushe manji. ¹⁹ Omu lukogo lwawe lunene, orhabalekaga omw'irungu, na ecitu c'olwikungu cirhalekaga bwabalongolana mulegerege, erhi engulumira y'omuliro oku bamolekera budufu omunjira balikwanine. okugera. ²⁰ Wabaha muka wawe mwinja oku abajire banyabwenge, orhayimaga orhunwa rhwabo amana gawe, na wabaha amishi omu nyorha yabo. ²¹ Lugero lwa miaka makumi gani wabajirira ebibakwanine omw'irungu, na barhabulaga bici, emyambalo yabo erhaberekaga, n'amagulu gabo garharhundaga. ²² Wabaha amami n'embaga, na wababwira ecihugo cabo, n'okugwarha ecihugo c'e Shihoni, mwami w'e heshboni, n'ecihugo ca Ogu, mwami w'e Bashani. ²³ Wayushula abana babo nka ntonde z'emalunga, na wabadahya omucihugo wabwiraga b'ishe oku bacigwarha. ²⁴ Na bagala babo bacigwarha, wabulabuza embere zabo abikala b'omucihugo, abakanani, na wabaheba omu maboko gabo, haguma n'abami babo, oku babajire oku balonzize. ²⁵ Bahinduka barhegesi ba mirhundu mizibuhye na madaho gakuyera. bagwarha enyumpa ziyunjwiremwo birugu bya ngasi lubero, mariba mahumbe, nkoma za mizabibu, mirhi ya malehe okubwinji; bakalya n'okuyigurha, batwera, balama omu bibirhi oku bwinja bunene. ²⁶ Ciruankabantyo, bacirhundulika banakugomera, baheba irhegeko lyawe enyuma ly'emigongo yabo, bayirha Abalebi bawe, abakagi babwira oku bashubire emwawe, na bakujirira mahushe manji. ²⁷ Lero wabalekera omu maboko g'abashombanyi babo, babarhindibuzagya. Cikwone erhi akasangi k'amalibuko gabo, bakuyakuza, nawe wayunva kurhenga emalunga, na omu lukogo lunene, wabaha omuciza wabakulaga omu maboko g'abashombanyi babo. ²⁸ Erhi barhamuka, baciri rhondera okujira amabi embere zawe. Lero wabalekera omumaboko g'abashombanyi babo, babarhegeka. Cikwone baciri kulakira buhyahya, nawe wanayunva omu malunga, na omu lukogo lwawe lunene wabaciza kanji. ²⁹ Wabayinginga oku bashubire okw'irhegeko lyawe; na banabera omu bwirhundulike, barhayunvagya amarhegeko gawe. Bagomera amarhegeko gawe, galamya ogakulikira, bajira ebirhugo bigoma n'okuzibuhya amagosi gabo, barhana kengaga. ³⁰ Wabashibirira myaka minji, wanabarhonda kugerera muka wawe, omunjira y'abalebi bawe; barharhegaga kurhwiri. Lero wabaheba omumaboko g'embaga z'ekuli. ³¹ Cikwone, omu lukogo lwawe lunene, orhabayukirizagya, orhana balekereraga, bulya oba Nnamahanga wa bwonjo na wa lukogo. ³² Na bunola, mashi Nnamahanga wirhu,. Nnamahanga mukulu, ntwali na wakuyobohya, wekalanga endagano yawe n'okujira olukogo, orhabone nka kantu kasungunu amalibuko goshi rhwageziremwo, rhwe, abami birhu, abarhambo birhu, abagula birhu, abalabi birhu, ba larha n'olubaga lwawe lwoshi, kurhenga amango ga mwame w'e Ashuru kuhik'ene. ³³ Wali mushinganya okubwyoshi byarhuhikire, bulya wacibosize mwikubagirwa, n'irhu rhwajira amabi. ³⁴ Bami birhu, abarhambo birhu, abagula birhu na ba larha barhakengaga irhegeko lyawe, na barhayunvirhizagya ciru amahano gawe erhi oku kurhonda wabarhonzire. ³⁵ Amango bali ba nahano, omuminja goshi wabajirire, omucihugo cigali na ca kuyera wabahaga, barhakukoleraga na barhahindamukiraga emikolo yabo mibi. ³⁶ Na ene, rhubonane baja! orhubonage baja oku Idaho wahaga ba larha, oku bacishingire amalehe gamwo n'ebinja byamwo. ³⁷ Ciri caleheka amalehe oku bami barhurhegesire enyanya z'ebyaha birhu; barhambwire emibiri yirhu oku balonzize, n'ebishwekwa birhu, na rhuli omu malibuko manene! ³⁸ Kulibyo byoshi, rhwajira endagano, rhwahibire oku lwandiko; na abarhambo birhu, abalawi birhu, n'abagula birhu bahebakwo ebyunkumwe byabo.